2 Tau Patuiki

4 KUA ui mai kia Elisaio e fifine ko e hoana he taha he fanau he tau perofeta, kua pehe mai, Kua mate hau a fekafekau ko e tane haku, kua iloa foki e koe ne matakutaku hāu a fekafekau kia Iehova, ka kua hau a ia ne uta ai e mautolu e tau mena ia ia ke totogi, ko e uta ne fai e ia haku na tama tane tokoua ke eke mo tau tupa hana.

2 Ti pehe atu a Elisaio kia ia, Ko e heigoa kia e mena ke eke ai e au māu? Kia tala mai la kia au po ke heigoa e tau mena ha ha ia koe ke he fale? Ti pehe mai a ia, Nakai ni fai mena hāu a fekafekau fifine ke he fale ka ko e lupo puke lolo.

3 Ti pehe atu a ia, Kia fano a koe ti ogo kapiniu mai i tua he tau tagata oti ne katofia mo koe, ko e tau kapiniu nakai toka ai ha mena, aua neke ogo mai fakagahoa.

4 Ti hu atu a koe ki fale, ti pa e koe e gutu hala ki tua hau, ki tua foki he na tama tane hāu, ti liligi atu ai e koe ke he tau kapiniu oti na, mo e toka kehe e koe e tau mena ne puke.

5 Ti fano a ia ia ia, ti pa ai e ia e gutuhala ki tua hana, ki tua foki he na tama tane hana, ti ta mai e laua e tau kapiniu kia ia, ti liligi atu ai e ia.

6 Kua puke e tau kapiniu ti pehe atu a ia ke he hana tama tane, Kia ta mai foki e koe taha kapiniu kia au; ti pehe mai a ia kia ia, Nakai toe foki ha kapiniu. Ti oti ai e puke lolo.

7 Ti hau ai a ia mo e tala mai ke he tagata he Atua. Ti pehe atu a ia kia ia, Fano ā a koe, kia fakafua atu e koe e puke lolo, ti totogi ai e koe e tagata ne ta mai ai e mutolu e tau mena ke totogi, ko e tau mena ne toe foki ke momoui ai a mutolu mo e hau a tau tama.

8 Ko e taha aho ne fina age ai a Elisaio ki Sunema, ne ha i ai taha patu fifine lahi; ti fakamakamaka mai a ia kia ia ke kai mena ai a ia. Ti eke ni pihia, ka fina age ai e fenoga hana he puhala ia ti afe atu ai a ia ke kai mena ai.

9 Ti pehe age a ia ke he tane hana, Kitiala, kua iloa e au ko e tagata tapu he Atua hanai, kua fa hau kia taua.

10 Kia eke ai e taua e poko tote mana ki luga he kaupā he fale; ti tuku ai e taua māna e mohega, mo e laulau, mo e nofoa, mo e fakatuaga lamepa, ka hau foki a ia kia taua, ti fina age a ia ki ai.

11 Ko e taha aho ne hoko atu a ia ke he mena ia, ti afe age ai a ia ke he poko kua mohe ai.

12 Ti pehe age a ia ke he hana fekafekau ko Kehasi, Kia ui la a koe ke he fifine Sunema na. Ti ui age a ia kia ia, ti tu mai a ia ki mua hana.

13 Ti tala age a ia kia ia, Kia pehe atu a koe kia ia, Kitiala, kua fakafita a koe ha ko maua ke he tau mena oti nai kua taute, ko e heīgoa kia e mena ke eke māu? po ke talahau ai kia a koe ke he patuiki, po ke iki ne pule ke he kau? Ti pehe mai a ia, Kua nofo au fakalataha mo e haku a motu.

14 Ti pehe age ai a ia, Ko e heigoa kia e mena ke eke mana? Ti tali age a Kehasi, Nakai ni fai tama a ia, kua motua foki hana tane.

15 Ti pehe age ai a ia, Ui atu a kia ia, Ti ui atu a ia kia ia, ti tu mai a ia ke he gutuhala.

16 Ti pehe atu ai a ia, Ko e vaha pehenai ka hoko mai ai, to hapai ai e koe hau a tama tane. Ti tali mai a ia, Nakai, ma iki na e, ko e tagata he Atua, aua neke fakavai e koe hau a fekafekau fifine.

17 Ti fatu e fifine, ti fanau ai e ia e tama tane ke he vaha ia, ke lata mo e vaha he moui ne vagahau atu ai e Elisaio kia ia.

18 Kua lahi e tama, ti hoko ke he taha aho, ti fina age ai a ia ke he hana matua tane ke he tau tagata ne helehele saito.

19 Kua pehe age a ia ke he hana matua tane, Haku ulu, haku ulu! Ti pehe age a ia ke he taha fuata kia uta a e koe a ia ke he hana matua fifine.

20 Ti toto e ia e tama, ti uta ai e ia ke he hana matua fifine; ti hapai e ia a ia ke he hana tau hui ato hoko ke he tupou la ti mate ai a ia.

21 Ti hake ai e fifine, ti fakatakoto e ia a ia ki luga he mohega he tagata he Atua, kua pa e ia e gutuhala, ti fano ai a ia ki fafo.

22 Ti ui age e ia ke he tane hana, kua pehe age, Kia fakafano mai a e koe kia au taha fuata mo e taha asini, ke alumaki atu au ke he tagata he Atua, ti liu mai au.

23 Ti pehe age ai a ia, Ko e heigoa kia e mena ke fano ai a koe kia ia ke he aho nai? nakai ko e mahina pula fou ainei, ti nakai ko e sapati. Ka kua tali age ai a ia, Kua mitaki.

24 Ti fakanofoa ai e ia e asini, ti pehe age a ia ke he hana fekafekau, Kia fakaave ā he o a taua aua neke fakapoi fakatuai e koe e asini ha ko au, kaeke ke nakai tala atu pihia kia koe.

25 Ti fano ai a ia, ti hoko atu a ia ke he tagata he Atua ke he mouga ko Karamelu. Kua kitia mamao atu foki he tagata he Atua a ia, ti pehe age a ia ke he hana fekafekau ko Kehasi, Kitiala, ko e fifine Sunema hanā.

26 Kia poi a a koe ke fonofono a ia, ti pehe age a koe kia ia, Kua monuina nakai a koe? kua monuina nakai e tane hāu? kua monuina nakai e tama? Ti tali age ai a ia, Kua monuina ni.

27 Kua hoko atu a ia ke he tagata he Atua ke he mouga ti toto ai e ia hana tau hui; ka e fakatata age a Kehasi ke tulei kehe a ia ia ia; ka e pehe age e tagata he Atua, Tokai a ia, ha kua mamahi hana loto; ka kua fufu e Iehova e mena ia ia au, nakai tala mai ai e ia kia au.

28 Ti pehe mai a ia, Ne ole atu kia e au e tama tane he haku a iki? nakai kia pehe atu au aua neke fakavai e koe au?

29 Ti pehe age a ia kia Kehasi, Kia pipi e koe hau a tokupu, ti uta e koe haku a tokotoko ke he lima hau, ti fano a koe, ka feleveia foki a mua mo e taha aua neke fakaalofa atu a koe kia ia; ka fakaalofa mai foki e taha kia koe aua neke tali age a koe kia ia; ti tuku ai e koe haku a tokotoko nai ki luga he mata he tama.

30 Ti pehe mai e matua fifine he tama, Kua moui a Iehova, kua moui foki a koe, nakai toka e au a koe. Ti matike ai a ia, kua mui atu kia ia.

31 Kua mua atu a Kehasi kia lautolu, kua tuku ai e ia e tokotoko ki luga he mata he tama; ka e nakai ni fai leo, ti nakai logona foki. Ti liu mai a ia ke fonofono a ia, ti tala age a ia kia ia kua pehe age, Nakai ala e tama.

32 Ti hu atu a Elisaio ke he fale, kitiala, ko e tama kua mate kua fakatakoto ai ki luga he mohega hana.

33 Kua hu atu a ia, ti pa ai e ia e gutuhala, kua ha i loto a laua, ti liogi atu ai e ia kia Iehova.

34 Ti hake a ia, ai fakafohifo ai a ia ki luga he tama; kua fakalata e ia hana gutu ke he gutu hana, mo e nana tau mata ke he tau mata hana, mo e hana tau lima ke he tau lima hana; kua takoto a ia ki luga hana; ti mafana ai e tino he tama.

35 Ti liu atu a ia, kua tafeliuaki lagataha a ia ke he loto fale; ti hake a ia, ti takoto ai a ia ki luga hana; ti tihe lagafitu e tama, ti ala ai e tau mata he tama.

36 Ti ui age a ia kia Kehasi, kua pehe age, Ui la a koe ke he fifine Sunema na. Ti ui atu a ia kia ia. Kua hau foki a ia kia ia, ti pehe atu ai a ia, Kia lagaaki ā e koe hāu a tama.

37 Ti hu mai a ia, ti fakaveli ai a ia ke he hana tau hui, ti fakaveli fakafohifo ai a ia; ti lagaaki ai e ia hana tama, ti fano ai a ia.

38 Kua liu atu a Elisaio ki Kilikala; kua hoge e motu, kua nonofo foki e fanau he tau perofeta ki mua hana. Ti pehe age a ia ke he hana fekafekau, Kia tuku a e koe e ulo lahi ke he afi, ke tuhu ai e tau mena kai ma e fanau he tau perofeta.

39 Ti fano ai taha tagata ke he vao ke kumi e tau mena kai, kua moua ai e ia e vine vao, ti faki ai e ia hana tau fua, kua puke ai hana tapulu, ti hau a ia, ti helehele ai e ia ke he ulo ke tunu ai e tau mena kai; ha kua nakai kitia e lautolu e tau mena ia.

40 Ti liligi atu ai e lautolu ke kai e tau tagata. Kua kai ai e lautolu e mena ne tunu, ti tagi ai a lautolu, kua pehe mai, Ko e tagata he Atua na e, ha ha he ulo e mate. Kua nakai maeke ke kai ai e lautolu.

41 Ka kua pehe atu a ia, Kia ta mai a e falaoa. Ti liti ai e ia ke he ulo, ti pehe atu a ia, Kia liligi atu a ma e tau tagata, ke kai ai e lautolu. Ti nakai tuai fai mena kelea ke he ulo.

42 Kua hau taha tagata i Paala-salisa ti ta mai ai e ia ke he tagata he Atua e tau mena kai he tau fua uluaki, ko e uafulu e tau areto karite, katoa mo e tau fua saito mata ke he hana kato. Ti pehe atu a ia, Kia ta atu la ke he tau tagata ke kai ai e lautolu.

43 Ti pehe mai ai hana fekafekau, Po ke tuku atu kia e au e tau mena nai ki mua he tau tagata tokoteau? Ti pehe atu foki a ia, Kia ta atu ā ma e tau tagata, ke kai ai e lautolu; ha kua talahau mai pehe a Iehova, to kai ai e lautolu, ti toe ni.

44 Ti tuku atu ai e ia ki mua ha lautolu, kua kai ai e lautolu, to toe ni, tuga ne vagahau mai ai e Iehova.