Numera

Ko e Numera. Ko e Tohi Fa a Mose

1 KUA vagahau mai a Iehova kia Mose ke he tutakale ko Sinai, ke he fale uta fano he tutuutaga, ke he aho fakamua he mahina ua he tau ne ua aki he o mai ai a lautolu he motu ko Aikupito, kua pehe mai,

2 Kia totou e mua e fakapotopotoaga katoa he fanau a Isaraela, ko lautolu kua lata ke totou, ko e tau magafaoa ha lautolu, ko e tau faoa he tau matua ha lautolu, ko e tau higoa ha lautolu kua lata ke totou, ko e tau tane oti takitokotaha;

3 Ke kamata mai he tau tagata ne uafulu ha lautolu a tau tau katoa mo lautolu ne fakamua atu, ko lautolu oti ia Isaraela kua fahia ke o ke tau; kia totou e mua mo Arona a lautolu, ko lautolu mo e tau kau he lautolu.

4 To fakalataha foki mo mua e falu a tagata ke takitaha e tagata mai he tau magafaoa; ko e tau patu ni a lautolu he tau magafaoa he tau matua ha lautolu.

5 Ko e tau higoa foki he tau tagata ke fakalataha mo mua hanai; ko Elisura ko e tama a Seturo, ma e magafaoa a Reupena.

6 Ko Salumielu ko e tama a Surisatai ma e magafaoa a Simeona;

7 Ko Naasona ko e tama a Aminatapu, ma e magafaoa a Iuta.

8 Ko Natanielu ko e tama a Suaro, ma e magafaoa a Isakara.

9 Ko Eliapo ko e tama a Helona, ma e magafoa a Sepulona.

10 Ko e fanau a Iosefa; ko Elisama ko e tama a Amihuta, ma e magafaoa a Efaraimo; ko Kamalielu ko e tama a Petasuro, ma e magafaoa a Manase.

11 Ko Apitamo ko e tama a Kitione, ma e magafaoa a Peniamina.

12 Ko Ahieseru ko e tama a Amisatai ma e magafaoa a Tano.

13 Ko Pagielu ko e tama a Okirano, ma e magafaoa a Asera.

14 Ko Eliasafo ko e tama a Tuelu, ma e magafaoa a Kato.

15 Ko Akira ko e tama a Enano, ma e magafaoa a Nafatali.

16 Ko lautolu hana ne talahaua, ke he fakapotopotoaga, ko e tau iki he tau magafaoa he tau matua ha lautolu, ko e tau iki haia he tau takiafe i Isaraela.

17 Ti uta e Mose mo Arona e tau tagata na kua talahaua ai ha lautolu a tau higoa,

18 Ti fakapotopoto ai e lautolu e fakapotopotoaga oti ke he aho fakamua he mahina ua, ti talahau ai e lautolu ha lautolu a hakeaga ko e ha lautolu a tau magafaoa, ko e faoa he ha lautolu a tau matua, ko e tau higoa kua lata ke totou takitokotaha, ke kamata ia lautolu ne uafulu ha lautolu a tau tau katoa mo lautolu ne fakamua atu.

19 Tuga ne poaki mai e Iehova kia Mose, ne totou ai pihia e ia a lautolu ke he tutakale ko Sinai.

20 Ko e fanau a Reupena ko e tama uluaki a Isaraela ko e ha lautolu a tau hau ko e ha lautolu a tau magafaoa ko e faoa he ha lautolu a tau matua, ko e tau higoa kua lata ke totou ko e tau tane oti takitokotaha, ke kamata ia lautolu ne uafulu ha lautolu a tau tau katoa mo lautolu ne fakamua atu ko lautolu oti kua malolo ke o ke tau;

21 Ti totou ai e lautolu he magafaoa a Reupena, ko e fagofulu ma ono e afe ti lima e teau.

22 Ko e fanau a Simeona, ko e tau hau ha lautolu ko e ha lautolu a tau magafaoa ko e faoa he ha lautolu a tau matua, ko lautolu ne totou, ko e tau higoa kna lata ke totou, ko e tau tane oti takitokotaha, ke kamata ia lautolu kua uafulu ha lautolu a tau tau katoa mo lautolu kua fakamua atu, ko lautolu oti kua malolo ke o ke tau;

23 Ti totou ai e lautolu he magafaoa a Simeona, ko e limagofulu ma hiva e afe ti tolu e teau.

24 Ko e fanau a Kato, ko e tau hau ha lautolu ko e ha lautolu a tau magafaoa ko e faoa he ha lautolu a tau matua, ko e tau higoa kua lata ke totou, ke kamata ia lautolu ne uafulu ha lautolu a tau tau katoa mo lautolu kua fakamua atu, ko lautolu oti kua malolo ke o ke tau;

25 Ko lautolu ne totou ai he magafaoa a Kato, ko e fagofulu ma fa e afe mo e ono e teau ti limagofulu.

26 Ko e fanau a Iuta, ko e tau hau ha lautolu ko e ha lautolu a tau magafaoa, ko e faoa he ha lautolu a tau matua, ko e tau higoa kua lata ke totou, ke kamata ia lautolu kua uafulu ha lautolu a tau tau katoa mo lautolu kua fakamua atu, ko lautolu oti kua malolo ke o ke tau;

27 Ko lautolu ne totou ai he magafaoa a Iuta, ko e fitugofulu ma fa e afe ti ono e teau.

28 Ko e fanau a Isakara, ko e tau hau ha lautolu ko e ha lautolu a tau magafaoa, ko e tau faoa he ha lautolu a tau matua, ko e tau higoa kua lata ke totou, ke kamata ia lautolu ne uafulu ha lautolu a tau tau katoa mo lautolu ne fakamua atu, ko lautolu oti kua malolo ke o ke tau;

29 Ko lautolu ne totou ai he magafaoa a Isakara, ko e limagofulu ma fa e afe ti fa e teau.

30 Ko e fanau a Sepulona, ko e ha lautolu a tau hau, ko e tau magafaoa ha lautolu ko e tau faoa he ha lautolu a tau matua, ko e tau higoa kua lata ke totou, ke kamata ia lautolu ne uafulu ha lautolu a tau tau katoa mo lautolu ne fakamua atu, ko lautolu oti kua malolo ke o ke tau;

31 Ko lautolu ne totou ai he magafaoa a Sepulona, ko e limagofulu ma fitu e afe ti fa e teau.

32 Ko e fanau a Iosefa; ko e fanau a Efaraimo, ko e tau hau ha lautolu ko e ha lautolu a tau magafaoa ko e tau faoa he ha lautolu a tau matua, ko e tau higoa kua lata ke totou, ke kamata ia lautolu ne uafulu ha lautolu a tau tau katoa mo lautolu ne fakamua atu, ko lautolu oti kua malolo ke o ke tau;

33 Ko lautolu ne totou ai he magafaoa a Efaraimo, ko e fagofulu e afe ti lima e teau.

34 Ko e fanau a Manase, ko e tau hau ha lautolu ko e ha lautolu a tau magafaoa, ko e tau faoa he ha lautolu a tau matua, ko e tau higoa kua lata ke totou, ke kamata ia lautolu ne uafulu ha lautolu a tau tau katoa mo lautolu ne fakamua atu, ko lautolu oti kua malolo ke o ke tau;

35 Ko lautolu ne totou ai he magafaoa a Manase, ko e tolugofulu ma ua e afe ti ua e teau.

36 Ko e fanau a Peniamina, ko e tau hau ha lautolu, ko e ha lautolu a tau magafaoa ko e tau faoa he ha lautolu a tau matua, ko e tau higoa kua lata ke totou, ke kamata ia lautolu ne uafulu ha lautolu a tau tau katoa mo lautolu ne fakamua atu, ko lautolu oti kua malolo ke tau;

37 Ko lautolu ne totou ai he magafaoa a Peniamina, ko e tolugofulu ma lima e afe ti fa e teau.

38 Ko e fanau a Tano, ko e ha lautolu a tau hau ko e ha lautolu a tau magafaoa ko e faoa he ha lautolu a tau matua, ko e tau higoa kua lata ke totou, ke kamata ia lautolu ne uafulu ha lautolu a tau tau katoa mo lautolu ne fakamua atu, ko lautolu oti kua malolo ke o ke tau;

39 Ko lautolu ne totou ai he magafaoa a Tano, ko e onogofulu ma ua e afe ti fitu e teau.

40 Ko e fanau a Asera, ko e tau hau ha lautolu ko e ha lautolu a tau magafaoa ko e faoa he ha lautolu a tau matua, ko e tau higoa kua lata ke totou, ke kamata ia lautolu ne uafulu ha lautolu a tau tau katoa mo lautolu ne fakamua atu ko lautolu oti kua malolo ke o ke tau;

41 Ko lautolu ne totou ai he magafaoa a Asera, ko e fagofulu ma taha e afe ti lima e teau.

42 Ko e fanau a Nafatali, ko e tau hau ha lautolu ko e ha lautolu a tau magafaoa ko e faoa he ha lautolu a tau matua, ko e tau higoa kua lata ke totou, ke kamata ia lautolu ne uafulu ha lautolu a tau tau katoa mo lautolu ne fakamua atu, ko lautolu oti kua malolo ke o ke tau;

43 Ko lautolu ne totou ai he magafaoa a Nafatali, ko e limagofulu ma tolu e afe ti fa e teau.

44 Ko lautolu haia ne totou, ne totou ai e Mose mo Arona mo e tau iki i Isaraela, ko e tau iki tokohogofulu ma ua; ne takitokotaha ma e tau magafaoa he ha lautolu a tau matua.

45 Ko lautolu oti ia he fanau a Isaraela ne totou, ko e tau faoa he ha lautolu a tau matua, ke kamata ia lautolu ne uafulu ha lautolu a tau tau katoa mo lautolu ne fakamua atu ko lautolu oti i Isaraela ne malolo ke o ke tau;

46 Ko lautolu oti ne totou hanai, ko e ono e teau e afe ti tolu e afe mo e lima e teau ti limagofulu.

47 Ka ko e tau tagata Levi, mo e tau magafaoa he ha lautolu a tau matua nakai totou ai fakalataha mo lautolu.

48 Ha kua vagahau mai a Iehova kia Mose, kua pehe mai,

49 Ka ko e magafaoa a Levi aua neke totou ia, ti ua totou ai e mutolu a lautolu kua lata ke totou ia lautolu fakalataha mo e fanau a Isaraela;

50 Ka kia kotofa e koe e tau tagata Levi ke pule ke he faituga ne ha i ai e fakatufono, mo e hana tau kapiniu oti, mo e hana tau mena oti, ke uta e lautolu e faituga mo e hana tau kapiniu oti mo e fekafekau a lautolu ki ai; ke he api takai foki a lautolu he faituga.

51 Ka uta foki e faituga ti vevete ai he tau tagata Levi; ka fakatu foki e faituga, ti fakatu ai he tau tagata Levi; ka ko e tagata kehe, ka fakatata a ia ki ai ti mate ni a ia.

52 Ti he api ai e fanau Isaraela ko e tagata mo e heaga api he hana magafaoa, ko e tagata foki ke he mena ne tau ai ha lautolu a matini, ke he ha lautolu a tau kau.

53 Ka e he api takai e tau tagata Levi he faituga ne ha i ai e fakatufono, ke aua neke hoko mai e ita ke he fakapotopotoaga he fanau a Isaraela; ke omaoma foki he tau tagata Levi ke he fekau he faituga ne ha i ai e fakatufono.

54 Ti eke he fanau a Isaraela e tau mena oti tuga ne poaki mai ai e Iehova kia Mose, ti eke ni pihia e lautolu.