1 Peteru

Ko e Tohi Fakamua a Peteru

1 KO au ko Peteru ko e aposetolo a Iesu Keriso, ko e haku a tohi hanai ke he tau tagata kehe kua paea fano i Pono, mo Kalatia, mo Kapatokia, mo Asia, mo Pitunia,

2 Ko lautolu kua fifili ke lata mo e fioia tuai he Atua ko e Matua, ke he fakatapu he Agaga, kia hoko ai e omaoma mo e pīpīaga he toto a Iesu Keriso; kia fakalahi kia mutolu e fakaalofa noa mo e monuina.

3 Fakaaue ke he Atua ko e Matua he Iki ha tautolu ko Iesu Keriso, ko ia kua fanau fakafou ai a tautolu ha ko e hana fakaalofa lahi, kia moua e tautolu e amaamanaki kua moui, ha ko e liu tu mai a Iesu Keriso mai ia lautolu kua mamate.

4 Kia moua e tufaaga nakai tuai popo, nakai fai kelea nakai tuai fifigo, kua toka ke he lagi ma tautolu.

5 Ko tautolu kua leoleo he mana he Atua ke he tua, ke hoko ke he fakamouiaga kua taute ke fakakite mai ke he tau aho ke fakahiku ai.

6 Kua fiafia ai a mutolu, pete ni he fakatutuku a mutolu ke he na aho nai, (kaeke kua lata ai,) ke he tau mena kamatamata kehekehe.

7 Ko e kamatamata foki he tua ha mutolu, kua mua hana mitaki ke he auro ke mole atu, ka e kamatamata ni ke he afi, kia eke a ia mo mena ke hoko ai e navaaga, mo e lilifu, mo e fakahekeaga ka fakakite mai a Iesu Keriso;

8 Ko ia kua nakai kitia e mutolu, ka e fakaalofa atu kia ia, kua nakai kitia a ia ainei, ka e tua ni ki ai kua olioli ai a mutolu, mo e fiafia kua nakai maeke ke fakamatala atu, kua homo atu ni;

9 Kua moua e fakahiku he tua ha mutolu, ko e fakamouiaga ia he tau agaga ha mutolu.

10 Ko e fakamouiaga ia ne hūhū ki ai mo e kumi fakamakutu ai he tau perofeta, ko lautolu ne perofeta mai e fakaalofa noa ke hoko kia mutolu na.

11 Ko lautolu kua kumi po ke vaha fe, po ke heinoa foki e kakano he vaha ne fakailoa mai he Agaga a Keriso ha i loto ia lautolu, he fakailoa fakamua mai e ia e tau mamahi a Keriso, mo e lilifu ke mui atu ai;

12 Ne fakakite kia lautolu kua nakai ma lautolu, ka ko tautolu, ne tuku age ai kia lautolu e tau mena, ko e tau mena kua fakamatala atu nai kia mutolu e lautolu kua fakamatala e tala mitaki kia mutolu, mo e Agaga Tapu ne fakafano mai mai he lagi; ko e tau mena ia kua foli ki ai e tau agelu he fia kitekite ki ai.

13 Hanai, kia pipi hake e tau tokupu he tau loto ha mutolu, kia nonofo fakalatalata, kia amaamanaki mo e loto katoatoa, ke he fakaalofa noa ke ta mai kia mutolu ka fakakite mai a Iesu Keriso;

14 Kia tuga e fanau omaoma, aua neke fakatai e mutolu a mutolu ke he tau manako lahi tuai ha mutolu ke goagoa ai a mutolu;

15 Ka e tuga ne tapu a ia kua ui kia mutolu, kia pihia foki a mutolu ke tapu ke he tau mahani oti ha mutolu;

16 Ha kua tohi Kia tapu a mutolu, ha ko au nai kua tapu ni au.

17 Kaeke foki kua tauui a mutolu ke he Matua, ko ia kua nakai fakamailoga tagata, ka e fakafili fakalata ke he tau gahua he tau tagata takitokotaha, kia nonofo a mutolu mo e matakutaku, ka kua api a mutolu ki hinei.

18 Ha kua iloa e mutolu nakai lukutoto a mutolu ke he mena ke popo, ko e ario po ke auro, mai he mahani nakai aoga ha mutolu ne tuku mai he tau matua ha mutolu;

19 Ka ko e toto uho a Keriso, tuga ne toto he punua mamoe kua nakai fai ila, ti nakai fai kelea.

20 Ne fioia tuai ni a ia ka kua nakaila fakave e lalolagi, ka kua fakakite mai ha ko mutolu ke he na aho nai ke fakahiku ai,

21 Ko mutolu kua tua ha ko ia ke he Atua, ko ia ne fakatu mai a ia mai ia lautolu kua mamate, mo e ta age kia ia e lilifu, kia ha he Atua ha mutolu a tua, mo e ha mutolu a amaamanaki.

22 Kua fakamea tuai e mutolu ha mutolu a tau loto he omaoma a mutolu ke he kupu moli, ke he Agaga, kua hoko ke he fakaalofa fakomoli ke he tau matakainaga, ko e mena ia kia feofanaki fakalahi ai a mutolu mai he loto mea;

23 Kua fanau fakafou a mutolu nakai ko e fua ke popo, ka ko e fua nakai tuai popo, ko e kupu he Atua haia kua moui mo e tumau tukulagi.

24 Ha ko e mena tuga ne motietie e tau tagata oti kana, ko e fulufuluola oti foki he tau tagata tuga ne fiti he vao ia; kua fifigo e motietie, kua mokulu foki hana fiti;

25 Ka ko e kupu he Atua kua tumau ia tukulagi ni. Ko e kupu foki ia kua fakamatala atu kia mutolu ke he tala mitaki.