Heperu

3 HANAI, ko e tau matakainaga tapu na e, ko mutolu kua igatia mo e ui mai he lagi, kia manamanatu a mutolu e aposetolo mo e ekepoa ne mua kua tokutoku ai e tautolu, ko Keriso Iesu haia.

2 Kua fakamoli a ia kia ia ne kotofa a ia, tuga a Mose foki ke he hana fale katoa.

3 Ha kua talahaua kua lata a ia mo e lilifu kua mua ke he lilifu a Mose, tuga e tagata foki ne tufugatia ai e fale, kua mua hana lilifu ke he lilifu he fale.

4 Ha kua takitaha e fale mo e tufugatia ai e taha, ka ko ia ne tufugatia ai e tau mena oti kana, ko e Atua haia.

5 Kua fakamoli ni a Mose ke he hana fale katoa, ko e fekafekau a ia, ke eke mo talahau ke he tau mena nakala vagahau atu.

6 Ka ko Keriso, ko e Tama a ia ke pule ke he hana fale, ko e fale hana ko tautolu nai, kaeke ke taofi mau e tautolu e fakamalolo mo e olioli ke he amaamanaki ato hohoko ke he fakahikuaga.

7 Ko e menu ia tuga e talahau mai ai he Agaga Tapu, Ko e aho nai, kaeke ke fanogonogo ai a mutolu ke he hana a leo,

8 Aua neke fakamao e tau loto ha mutolu, tuga e fakahogohogomanava ke he aho ne kamatamata ai ke he tutakale;

9 Ne kamatamata mai ai he tau tupuna ha mutolu kia au, mo e ahiahi kia au, ne kitia foki haku a tau gahua ke he fagofulu a tau.

10 Ko e mena ia ne vihiatia ai e au e hau ia, mo e pehe age, Kua hehe mau a lautolu ke he tau loto ha lautolu, mo e nakai iloa e lautolu haku a tau puhala.

11 Ti omonuo ai au ke he haku a ita, Nakai hao atu ni a lautolu ke he haku a okiokihaga.

12 Ko e tau matakainaga na e, a mutolu, neke toka ia taha e loto kelea mo e nakai talia fakatonu, ke o kehe ai a mutolu mai he Atua moui.

13 Ka kia fetomatomāki a mutolu ke he taha aho mo e taha aho, ka kua talahaua agaia ko e aho nai, neke loto mao taha ia mutolu ha ko e fakavai he hala.

14 Ha kua igatia a tautolu fakalataha kia Keriso, kaeke ke taofi mau e tautolu e tua fakamua ha tautolu ato hoko ke he fakahikuaga.

15 Ha kua talahaua mai, Ko e aho nai kaeke ke fanogonogo ai a mutolu ke he hana a leo, aua neke fakamao e tau loto ha mutolu tuga e fakahogohogomanava.

16 Ha ko hai kia a lautolu ne fanogonogo a lautolu ti fakahogohogomanava ai? nakai kia ko lautolu oti ne o mai i Aikupito ke he takitakiaga a Mose?

17 Ko hai kia a lautolu ne vihiatia ai e ia ke he fagofulu a tau? nakai kia ko lautolu ne hala, ne mamate hifo foki e tau tino ha lautolu ke he tutakale?

18 Ko hai foki a lautolu ne omonuo a ia ki ai, nakai hao atu a lautolu ke he hana okiokihaga? ka e nakai kia ko lautolu ne faliuliu?

19 Haia, kua iloa ai e tautolu nakai maeke ia lautolu ke hao atu ki ai, ha kua nakai talia fakatonu.