1 Korinito

8 KA ko e tau mena kua keli mo poa ke he tau tupua, kua iloa e tautolu, ha kua igatia a tautolu mo e maama; kua fakaikaluga e maama, ka kua fakamafana e fakaalofa.

2 Kaeke kua manatu taha kua iloa e ia ha mena, kua nakai la iloa e ia ha mena tuga ne lata he iloa e ia;

3 Kaeke ke fakaalofa taha ke he Atua, kua iloa e ia e tagata ia ni.

4 Ko e tau mena kai foki kua keli mo poa ke he tau tupua, kua iloa e tautolu ko e mena noa e tupua ke he lalolagi; kua nakai fai Atua kehe foki, ka ko ia tokotaha ni.

5 Ha ko e mena pete ni he talahaua ko e tau atua, ko lautolu ha he lagi, katoa mo lautolu ha he lalolagi, (ha kua tokologa e tau atua, mo e tokologa e tau iki,)

6 Ka e ha ha ia tautolu e Atua tokotaha ni ko e Matua, kua tupu mai ia ia e tau mena oti, ko tautolu foki kua eke mana; mo e Iki ne tokotaha ko Iesu Keriso, ko ia ne eke e tau mena oti, ko tautolu foki kua eke e ia.

7 Ka kua nakai igatia e tau tagata oti mo e maama ia; ka ko falu kua kai e lautolu mo e manatu hifo ke he tupua kua hoko ni ke he aho nai, tuga mo e mena kua keli mo poa ke he tupua, kua kelea ai foki ha lalu tau loto manamanatu ha ko e lolelole.

8 Kua nakai mitaki a tautolu ki mua he Atua ha ko e mena kai; ha ko e mena kaeke ke kai mena a tautolu ti nakai au atu ai ha tautolu a mitaki, kaeke foki ke nakai kai mena a tautolu ti nakai au atu ai ha tautolu a kelea.

9 A mutolu, neke uta e pule ia ha mutolu mo mena ke tupetupe ai a lautolu kua lolelole.

10 Ha ko e mena kaeke ke kitia e taha a koe ha ha i ai e maama ha ne takoto ke kai mena ke he fale he tupua, nakai kia fakamalolo e loto manamanatu hana kua lolelole ke kai ai e tau mena kua keli mo poa ke he tau tupua;

11 Ko e hāu a maama foki, ke malaia ai kia e matakainaga lolelole ne matulei a Keriso ke hukui aki ai?

12 Ka hala pihia foki a mutolu ke he tau matakainaga, mo e fakatupetupe ai ha lautolu a tau loto manamanatu lolelole, kua hala tuai a mutolu kia Keriso.

13 Ko e mena ia, kaeke kua tupetupe e matakainaga haku he mena kai nakai tuai kai au e kakano he tau manu tukulagi, neke tupetupe haku a matakainaga kia au.