2 Nofoaga he Tau Patuiki

10 KUA fano a Rehopoamo ki Sikema ha kua o mai a Isaraela oti ki Sikema, ke eke a ia mo patuiki.

2 Kua logona ai e Ierepoamo ko e tama a Nepata, (he nofo a ia i Aikupito, ne hola a ia ki ai mai mua he patuiki ko Solomona,) ti liu mai ai e Ierepoamo i Aikupito.

3 Ti fakafano atu e lautolu kia ia, mo e ui atu a lautolu kia ia. Ti o mai ai a Ierepoamo mo Isaraela oti, ti vagahau atu a lautolu kia Rehopoamo, kua pehe atu,

4 Ne fakamamafa he matua hau ha mautolu a lakau hahamo; hanai kia fakamāmā e koe e gahua uka he hau a matua, mo e hana lakau hahamo mamafa ne tuku mai e ia kia mautolu, ti fekafekau atu ai a mautolu kia koe.

5 Ti pehe au a ia kia lautolu, Kia liliu mai a mutolu kia au anoiha. Ti o ai e motu.

6 Ti pulega ai e patuiki ko Rehopoamo mo e tau patu ne tutu ki mua he matua hana ko Solomona he moui ai a ia, kua pehe atu, Ko e heigoa kia e mena ke vagahau mai e mutolu ke tali atu ai au ke he motu nai?

7 Ti vagahau mai a lautolu kia ia, kua pehe mai, Kaeke ke totonu atu a koe ke he motu nai, mo e fakalotomafola e koe a lautolu, mo e vagahau atu a koe kia lautolu ke he tau kupu mitaki, ti eke a lautolu mo tau fekafekau hau tukulagi.

8 Ka e tiaki e ia e tau kupu he tau patu ne fakatonu mai ai e lautolu kia ia, ti pulega a ia mo e tau fuata ne tutupu hake fakalataha mo ia, ne tutu ai a lautolu ki mua hana.

9 Ne pehe atu a ia kia lautolu, Ko e heigoa kia ha mutolu a vagahau mai, ke tali atu ai a tautolu ke he motu nai kua vagahau mai kia au, kua pehe mai, Kia fakamāmā e koe e lakau hahamo ne tuku mai he matua hau kia mautolu?

10 Ti vagahau ai e tau fuata ne tutupu hake fakalataha mo ia kua pehe mai, Kia pehe atu a koe ke he motu nai kua vagahau mai kia koe, kua pehe mai, Ne fakamamafa he matua hau ha mautolu a lakau hahamo, ka kia fakamāmā mai e koe kia mautolu; kia vagahau atu pehe a koe kia lautolu, Kua mua he lahi e matalima tama haku ke he tokupu he haku matua.

11 Ne tuku atu he matua haku e lakau hahamo mamafa kia mutolu; ka ko au, to lafilafi atu e au ke he lakau hahamo ha mutolu; ne akonaki atu haku a matua kia mutolu ke he tau akau; ka ko au to akonaki atu e au kia mutolu ke he tau akarava.

12 Ti o mai a Ierepoamo mo e motu oti kia Rehopoamo ke he aho tolu, tuga ne vagahau atu e patuiki, kua pehe atu, Kia liliu mai a mutolu kia au anoiha.

13 Ti tali atu ai e patuiki kia lautolu mo e favale, kua tiaki he patuiki ko Rehopoamo e kupu he tau patu;

14 Ka e vagahau atu a ia kia lautolu ke lata mo e tau kupu he tau fuata, kua pehe atu, Ne fakamamafa he matua haku ha mutolu a lakau hahamo, ka ko au, to lafilafi atu e au ki ai; ne akonaki atu haku matua kia mutolu ke he tau akau, ka ko au, to akonaki atu e au kia mutolu ke he tau akarava.

15 Kua nakai ni fanogonogo e patuiki ke he motu; ha kua mai he Atua e mena ia kia fakamoli ai e Iehova hana finagalo, ne vagahau mai ai kia Akia ko e tagata Sailo kia Ierepoamo ko e tama a Nepata.

16 Kua kitia e Isaraela oti nakai ni fanogonogo e patuiki kia lautolu, ti tali mai ai e motu ke he patuiki, kua pehe mai, Ko e heigoa kia e tufaaga ma mautolu ia Tavita? Ti nakai fai tufaaga a mautolu ke he tama a Iese; Isaraela na e, kia takitaha a mutolu mo e o ke he tau fale ie ha mutolu. Hanai, Tavita na e, kia pule a koe ke he magafaoa hau. Ti o ai a Isaraela oti ke he tau fale ie ha lautolu.

17 Ka ko e fanau a Isaraela ne nonofo ke he tau maga a Iuta, ne eke a Rehopoamo mo patuiki ha lautolu.

18 Ti fakafano atu he patuiki ko Rehopoamo a Atoramo ko e tagata ne pule ke he tau poa, ka e pinimaka he fanau a Isaraela a ia ke he tau maka ti mate ai a ia. Ti alumaki e patuiki ko Rehopoamo ke hake ke he hana kariota, ke hola ai a ia ki Ierusalema.

19 Ti fakafualoto ai a Isaraela ke he magafaoa a Tavita ke hoko mai ke he aho nai.