Kamataaga

KO E tohi anei he tau tala moolioli. Kua moua mai ai he tohi ne mua ue atu he lalolagi, ko e Tohi Tapu. Kua foaki atu he tau tala ki a koe e fakamauaga tuai he lalolagi mai he magaaho ne kamata e Atua ke tufuga ti hoko mai ke he magahala ha tautolu. Kua talahau foki hagaao ke he tau mena kua mavehe e Atua ke taute he vahā anoiha.

Kua fakalaulahi he tohi nei e maamaaga haau hagaao ke he Tohi Tapu. Talahau ai hagaao ke he tau tagata i loto he Tohi Tapu mo e tau gahua ha lautolu ne taute. Kua fakakite foki e amaamanakiaga mua ue atu he moui tukulagi he parataiso he lalolagi kua tuku age he Atua ke he tau tagata.

Ha ha i ai 116 e tala i loto he tohi. Kua fakavahega ai ke he valu e vala. Ko e lau he kamataaga he tau vala takitaha kua talahau fakakū e tau tala i loto he vala ia. Kua tohi fakapapahi e tau tala hagaao ke he magaaho ne tutupu ai he fakamauaga tala tuai. Kua lagomatai he mena nei a koe ke iloa e tau mena ne tutupu he fakamauaga tala tuai he fakatatai mo e falu mena foki.

Ko e tau tala kua talahau ke he vagahau mukamuka. To tokologa a mutolu e tau fanau ikiiki kua maeke ke totou ni e mutolu. To mailoga e mutolu ma tau mamatua to fiafia lahi e tau fanau ikiiki ha mutolu ka totou ti liu totou foki e mutolu e tau tala nei ki a lautolu. To iloa e koe ha ha he tohi nei e tau mena loga ne fiafia ki ai a lautolu kua ikiiki fakalataha mo lautolu ne momotua.

Kua tohi ai e tau kupu Tohi Tapu he matahiku he tau tala takitaha. Kua fakamafana ki a koe ke totou e tau vala nei he Tohi Tapu ne fakavē ki ai e tau tala. Ka oti he totou e koe e tala, liu fakamanatu foki e tau hūhū fakaako ma e tala he mole e Tala 116 ti lali ke manatu e tau tali.