Mataulu he Tau Fekafekau Gahua Mau e Gahua Fakamatala

Liga ko e fekafekau foafoa gahua mau po ke misionare e tagata fakamua ne ahi atu ki a koe mai he Tau Fakamoli a Iehova. Ha kua nakai ko e gahua totogi tupe e fekafekauaga he Tau Fakamoli a Iehova, liga kua tuaha a koe kua maeke fefe e tau tagata nei ke gahua mau ke he fekafekauaga.

Ko e tau fekafekau oti kana e Tau Fakamoli a Iehova kua tukulele mo e papatiso, ka e lahi mahaki e numela ha lautolu ne fai magafaoa po ke falu mena kua lago ki a lautolu, ti kua taofi ai a lautolu mai he tuku atu fakalahi, ati gahoa ai e tau tula he fahi tapu ne tuku atu ke he ha lautolu a fekafekauaga. Ka e pete ni ia, kua ha ha i ai e tau afe he Tau Fakamoli he lalolagi katoa ne mutu e tau aga he moui ha lautolu ke maeke ni a lautolu ke maluia ha lautolu a tau mena fakamole tupe mai he tau gahua vala magaaho mo e foaki e 1,000 e tau tula po ke mole atu mai he tau ke he fekafekau.

Moli, kua nakai lahi e tau tupe kua maeke e tau fekafekau foafoa gahua mau ke fakamole ki a lautolu ni, ka e ki a lautolu ko e puhala a nei ke kumi fakamua e Kautu he Atua. Mo e moua e lautolu e tau monuina loga. Ko e mena ha kua maeke ke tutala ke he falu hagaao ke he Kupu he Atua ke 90 e tau tula po ke mole atu he mahina taha kua eke ai ni ko e mena mitaki ke feleveia mo e taha. Kua fakaholo ki mua he fekafekau gahua mau hana iloilo ke he fekafekauaga mo e eke foki ke fai magaaho ke liu ke fakaati fakamitaki e tau tagata ne talia fiafia. Kua moua mai he mena nei e tau fua kua fakamafanatia lahi. Kua ha ha ia lautolu e tau koloa he tino kua lata, mo e kua loto fakaaue lahi a lautolu ke he tau mena kua moua e lautolu.—Mataio 6:33.

Ia Fepuari he tau 1943, ne fakatu he Kaufakalatahaaga Kolo Toko e Aoga Tohi Tapu he Kolo Toko a Kiliata. Ko e kakano a nai ke fakamahani e tau fekafekau foafoa gahua mau ke fekafekau atu ko e tau misionare ke he tau motu kehe. Kua ha ha he fakaholoaga ne lima e tau mahina e kumikumiaga fakahokulo lahi ke he Tohi Tapu, ke he fakamauaga tuai he Tohi Tapu, ke he fakatokatokaaga a Iehova, mo e tau tala ne matutaki ki ai, ke tauteute tuai a lautolu ma e fekafekauaga he tau fonua he tau motu kehe.

Kua totogi he Kaufakalatahaaga e tau pasese ke o ke he tau kotofaaga misionare mo e foaki e tau mena kai mitaki mo e tau mena ke momohe ai he tau kaina misionare. Kua age foki e tau lagomatai tupe ikiiki ke he tau misionare takitokotaha ma e tau mena fakamole fakatagata. Kua igatia e tau misionare ke fai magaaho ka taute e tau gahua kaina, ke fano ke fakatau kai, kaitunu, mo e fakamea e kaina. He moua e levekiaga mitaki nei kua maeke e tau misionare ke tuku fakamoli e tau tula kua 140 he mahina ke he gahua fakamatala mai he taha fale ke he taha fale mo e taute e tau fakaakoaga Tohi Tapu mo e tau tagata ne talia fiafia.

Kua tokologa mai he tau misionare nei kua moua e tau kotofaaga ke he tau afe e tau maila ka o kehe mai he tau kaina mo e tau magafaoa. Kua eke ni a lautolu ke hiki ke he tuaga moui kehe mo e mahani fakamotu, ke mahani ke kai mena fou, ke he matagi kehe, mo e ke vagahau e taha vagahau kehe. Kua taute e lautolu e gahua nei ha kua fakaalofa a lautolu ke he tau tagata mo e manako lahi ke lagomatai a lautolu ke ako ke iloa e Kautu he Atua.

Mai he tau 1943 ke he tau 1992, kua 93 e tau vahega ne taute he Aoga Tohi Tapu he Kolo Toko a Kiliata mo e kua molea e 6,500 he tau misionare ne fakafano mai i ai. I lalo he takitakiaga he Kaufakalatahaaga, ne mataulu e lautolu nei e fakalaulahiaga he fakaholoaga he fakaakoaga Tohi Tapu i Aferika katoa, i Amerika Lotoga mo Toga, he Fahi Uta, mo e Pasifika Toga, mo e kua fakakatoatoa e lautolu e gahua lahi i Europa.

Po kua gahua e Tau Fakamoli a Iehova ke he fekafekauaga gahua mau, ko e tau foafoa po ke tau misionare, po ke ke he gahua vala magaaho, kua fekafekau noa a lautolu nakai moua tupe. Kua fakamole e lautolu ha lautolu ni a tau magaaho mo e tau tupe, mo e tau malolo ha lautolu, ke lagomatai e falu ke moua e lotomatala kua takitaki atu ke he moui tukulagi.—Ioane 17:3.

• Kua maeke fefe e falu he Tau Fakamoli a Iehova ke gahua mau moli a lautolu ke he fekafekau, mo e taute fefe e lautolu e mena nei?

• Ne fa mahani fefe e tau fekafekau ma e gahua misionare?

• Ne moua lagomatai tupe fefe e tau misionare ke he ha lautolu a tau kotofaaga ke he tau motu kehe?

[Tau Fakatino he lau 22]

Hema: poko aoga he Aoga Kiliata, i Brooklyn, N.Y., F.K.A.

Matau: Misionare kua fakaako e Kupu he Atua i Papua Niu Kini

[Tau Fakatino he lau 23]

Tau fekafekau foafoa mo e tau misionare kua fakamatala e Kupu he Atua i loto he tau motu kehekehe

Pasili

Tominika Pule he Tagata

Sepania

Siera Leone, i Aferika