Ko e Higoa he Atua

“Kaeke ke nakai talaga e Iehova e fale, ti gahua teao e tau tagata talaga.” Ti pihia he totou he tohiaga talai fakamau Latini nei. Kua fakave e tau kupu ke he Salamo 127:1 i loto he Tohi Tapu, mo e kua moua ia lautolu e hokulo he kupu moli: Ko e ha laliaga ne nakai ha ha i ai e fakamonuinaaga a Iehova to fakahiku teao ni.

Ko e tohiaga talai fakamau, ne fakamau ai he 1780, kua moua ai ke he fale i Colombo, Siri Lanaka, kua kitia ai kakano kua ha ha i ai e higoa he Atua, Iehova. (Kikite e ata.) Ke he tau senetenari fakamua ko e higoa ia kua fakaaoga lahi. Kua fa talai fakamau ai ke he tau fale, tau fale tapu, pihia foki he tau tupe mao. Kua fakaaoga he tau misionare e higoa he Atua he magaaho ne uta e lautolu e Tohi Tapu ke he tau motu mamao, ne kua nakai fakauaua e talahauaga he tohiaga talai fakamau nei i Siri Lanaka.

Kua kehe ha a ia he tau mena he vaha nei! Gahoa a lautolu ne pehe ko e tau Kerisiano ne fai manatu ke he higoa he Atua. Kua fa fakafili foki he falu tagata fakaako tokoluga e Tau Fakamoli ha Iehova he pehi ki ai. Ko e ha? Hagaao ke he falu, kakano ko e fakaleoaga faka-Heperu kua nakai iloa tonu. Ka e tokofiha ne iloa e fakaleoaga he higoa ha Iesu ke he vagahau faka-Heperu fakamua? Ka ko e hana higoa kua fakaaoga he lalolagi katoatoa mo e fakalilifu.

Ki a Iesu, ko e higoa he Atua kua aoga lahi mahaki. Kua fakaako e ia a tautolu ke liogi: “Kia tapu hau a higoa.” (Mataio 6:9) Mo e ato hoko hana mate, kua talahau e ia ke he Atua: “Kua fakakite atu e au hau a higoa ke he tau tagata ne foaki mai e koe kia au mai he lalolagi.” (Ioane 17:6) Ko e tau Kerisiano moli ko e tau muitua he tuaga hui ha Iesu. Kua nakai kia lata foki ia lautolu ke ‘fakakite atu e higoa he Atua’? Kua taute pihia he Tau Fakamoli a Iehova, ti fakamonuina lahi e Iehova e ha lautolu a “fale.” Ma lautolu kua hako e salamo: “Uhoaki e motu kua eke a Iehova mo Atua ha lautolu.”​—Salamo 144:15.