Fakatumau e Mahani Fakamoli ki a Iehova

KO E mahani fakamoli, pete kua lavea e fakaaoga he vaha nai, ka ko e mahani ne mailoga ai e tau fekafekau he Atua moli, ko Iehova. Ko e tagata mahani fakamoli ne tu mauokafua mai he tau kamatamata ti nakai fagahuatia pete e mole atu he magaaho. Manamanatu la ke he patuiki mahani mitaki ko Hesekia. “Nakai fai tagata ke tatai mo ia he tau patuiki oti a Iuta ne mumui atu kia ia, ti pihia foki mo lautolu ne fakamua atu kia ia,” he talahau he Tohi Tapu. Ko e heigoa ne fakamahomo ai a Hesekia? “Ne pipiki ni a ia kia Iehova,” pete ne agaagai a ia he tau tagata tapuaki he atua fakavai ko Moloka. E, ko Hesekia ne “nakai fano kehe a ia he mui atu kia [Iehova], ka e omaoma a ia ke he hana tau poaki ne poaki mai.”—2 Tau Patuiki 18:1-6.

Ko e aposetolo ko Paulo e taha tagata ne tumau e mahani fakamoli ki a Iehova. Ko e fakamauaga he hana a fekafekauaga ne moua ke he Tohi Tapu Kerisiano Heleni kua talahaua fakamahino ki a Paulo ne fakatumau e fekafekauaga mo e loto katoa ke he Atua. Ke he fakahikuaga he moui hana he lalolagi, maeke ia Paulo ke pehe hagaao ki a ia ni: “Kua tau tuai au ke he tau mitaki, kua fakahiku e au e poitufi, kua taofi au ke he tua.”—2 Timoteo 4:7.

Ko e tau fakafifitakiaga mitaki ha ia he mahani fakamoli ma tautolu ia Hesekia mo Paulo! Kia fifitaki a e tautolu e tua ha laua he fakatumau e mahani fakamoli ke he ha tautolu a Atua Homo Ue Atu, ko Iehova.—Heperu 13:7.