Fakamamao Neke Eke Fakavai
KUA teitei ni e tuai he mahani fakavai ke tatai ke he moui leva he tau tagata. Ko e taha mena fakamua ne fakamau hifo he tala i tuai ko e eke he mahani fakavai. He magaaho ia ne fakavai e Satani a Eva ke he kaina i Etena.—Kenese 3:13; 1 Timoteo 2:14.
Tali mai he magaaho ia nakai mataofi e mahani fakavai ke he lalolagi, ka kua tolomaki lahi atu ke he vaha nei. Hahaga ai ke he tau vaha fou, kua tomatoma e Tohi Tapu: “Ka ko e tau tagata mahani kelea mo e tau tagata kua fakavai, to tolomaki atu a lautolu ke au atu he kelea, kua fakahehe atu ti fakaheheina foki a lautolu.”—2 Timoteo 3:13.
Ne loga e tau kakano nukua fakavaia ai e tau tagata. Ko e tau tagata fakavaia mo e tau tagata taute lagatau ne fakavaivai e falu ke moua e tau tupe ha lautolu. Falu a tagata politika kua fakavaia e tau tagata ne vili ma lautolu, he manako lahi ke tumau e ekepule ha lautolu pete he ha mamahi. Ka e pete ia, ko e falu ne fakavai e lautolu hoko lautolu ni. Ha kua nakai manako ke fehagai ke he tau mena nakai mitaki, ne tua a lautolu ki a lautolu ni ko e mena nakai kelea ka tutuli e tau gahua hagahagakelea, tuga e ula tapaka, fakaaoga kelea he tau vaikona, po ke tau mahani fakatane mo e fifine.
Mo e ha ha i ai foki e mahani fakavai ke he tau mena fakalotu. Na kua fakavai he tau takitaki lotu he vaha a Iesu e tau tagata. He tau tagata fakavai ia, kua pehe a Iesu: “Ko e tau matapouli a lautolu ke takitaki e tau matapouli; kaeke ke takitaki he matapouli e taha matapouli, ti veveli ai a laua tokoua ke he luo.” (Mataio 15:14) Lafi atu, kua fakavai he falu tagata a lautolu ni hagaao ke he tau mena fakalotu. Kua talahau he Tau Fakatai 14:12: “Ha ha i ai e puhala kua hako ke he manatu he tagata; ka ko e hana fakahikuaga, ko e tau puhala ke mate ai haia.”
Tuga ke he vaha a Iesu, tokologa he magaaho nei kua fakavaia he tau mena fakalotu, mo e moli ha ai! Ne talahau ia he aposetolo ko Paulo na “kua fakapouli he atua he lalolagi nai e tau manatu ha lautolu kua nakai tua, neke kikila atu kia lautolu e maama he vagahau mitaki he lilifu a Keriso, ko ia kua fakatai ke he Atua.”—2 Korinito 4:4.
Kaeke fakavai he tagata taute lagatau a tautolu, kua galo e tau tupe ha tautolu. Kaeke fakavai he tagata politika a tautolu, ato liga galo foki e ataina ha tautolu ha ko e fua. Ka e, kaeke fakavai e Satani a tautolu ti fakatikai e tautolu e kupu moli hagaao ki a Iesu Keriso, to galo noa e moui tukulagi ha tautolu! Ti fakamamao neke eke fakavai. Hafagi e loto mo e manamanatuaga hau ke he kupu moli tokotaha ni, ko e Tohi Tapu. Ha ha i ai e palepale mua ue atu ke moua kaeke nakai fakateaga e mena nai.—Ioane 17:3.