Ko e Tali ne Pulotu

TOKOTOLU e fuata taane he Lotouho i Aferika ne manako ke o atu ke he fonoaga he faahimotu he matakavi ha lautolu. To hohoko fēfē a lautolu ki ai? Kua teitei 90 e kilomita he mamao, ko e hala hagahaga kelea, efu, ti nakai fai peleōafi a lautolu. Ne fifili a lautolu ke ole tolu e pasikala taholi ka kua nakai maeke ia lautolu ke moua e tau pasikala taholi hagahaga mitaki.

Ne mailoga he taha motua he fakapotopotoaga e lekua ha lautolu ti foaki e pasikala taholi haana—tuai ka e holo. Ne fakamaama e ia e puhala haana mo e falu he tau vahā kua mole ne fakatokatoka ke hohoko atu he fonoaga. Ne tala age e motua ke fakaaoga auloa a lautolu tokotolu he taha e pasikala taholi. Ko e tali mukamuka ka e paleko. To maeke fēfē ke gahua e puhala nei?

Ke kalo mai he vela e laā, ne feleveia e tau fuata he pogipogi kī mo e tuku e tau taoga ha lautolu he pasikala taholi. Ko e matakainaga fakamua he pasikala ne taholi atu ka e mumui fakamafiti e kau tokoua he tua he o hui. He kavi 500 e mita, ne hopo a ia ne heke he pasikala taholi mo e tau taoga ti fakapiki e pasikala taholi he akau. Ka e fakaeneene a ia ke fakatū e pasikala taholi he mena ke kitia he kau tokoua ke nakai maeke e tagata kehe ke “kaiha” ai. Ne matutaki a ia ne heke mua ke fano hui.

He hohoko e kau tokoua ke he pasikala taholi, ne heke taha ka e matutaki ni taha ke fano hui ke he kavi 500 e mita ato hoko e mogo haana ke heke. Ti ko e fakatokatoka mo e fakamakamaka mitaki ha lautolu tokotolu, ne maeke ai ke mumutu hifo e o hui ha lautolu mai he 90 e kilomita ke he kavi 60 e kilomita. Kua fua mitaki e laliaga. Ne feleveia a lautolu mo e tau matakainaga Kerisiano ha lautolu he fonoaga ti olioli ke he galue fakaagaaga. (Teu. 31:12) He tau nei, to lali fakamakamaka nakai a koe ke hoko atu ke he fonoaga faahimotu he matakavi haau?