Hokotia e Tau Tega he Kupu Mooli ke he Tau Faahi Mamao

KO E Repapiliki a Tuva i Rusia kua haia he faahi toga mamao atu ki Sipelia, ko Mongolia ke he faahi toga mo e faahi uta. Tokologa e tagata i Tuva ne nonofo he tau maaga mamao ne uka ke hoko atu ki ai e fekau he Kautu. Pete ia, fai magaaho ne mole, ne fenoga atu e matakau mai he tau faahi mamao ne kehekehe ha Tuva ki Kyzyl, ko e taone i ai, he o atu ke he fono. Ko Maria, ko e paionia i Kyzyl, ne iloa kua hohoko mai fai a lautolu, ti mailoga ai e ia kua foaki he mena nei e taha magaaho ke fakamatala e tala mitaki ki a lautolu.

Ne talahau e Maria e mena ne tupu: “Ko e aoga ne gahua faiaoga ai au ne setulu ke taute e fonoaga hagaao ke he puhala ke fehagai mo e fakaaoga fakahehē he tau mena tuga e tau tegavai mo e kava. Kavi ke 50 e tagata ka fakalataha mai he tau matakavi mamao ha Tuva. Putoia ke he matakau ko e tau faiaoga, tau tagata kumikumi ke he manamanatuaga, tau tagata tivi ke he levekiaga he tau tama, mo e falu.” Ki a Maria, kua foaki he fonoaga nei ki a ia e magaaho ke fakamatala mo e kua paleko foki. Ne fakamaama e ia: “Na mā pauaki au, ti uka ia au ke fakamatala he tau magaaho noa. Pete ia, ne liogi au ki a Iehova ke fakamalolō ke kautū mai he matakutaku haaku mo e fakaaoga e magaaho nei ke fakamatala.” Kautū nakai a ia?

Ne matutaki e Maria: “Ne moua e au e mekasini Awake! ne tutala ke he matakupu he gagao matakutaku (phobia). ‘Liga to fiafia ki ai e tagata kumikumi ke he manamanatuaga,’ he manatu e au, ti uta e au e mekasini ke he aoga. He aho ia, taha he tau faiaoga ne ō mai ke he fonoaga ne hau ki loto he ofisa haaku, ti age e au e mekasini ke he fifine ia. Ne talia fiafia e ia. Ne talahau e ia, na moua foki a ia he gagao phobia. He aho hake, ne tamai e au ma haana e tohi Questions Young People Ask—Answers That Work, Volume 1. Ne talia fiafia foki e ia e tohi ia. Ha kua talia fiafia e ia, ne manamanatu ai au liga manako foki e falu faiaoga ke he tohi ia. Ti uta e au e puha he tau tohi Young People Ask mo e falu tohi foki ke he aoga.” Nakai leva ti gatigati e puha. Ne talahau e Maria e mena ne tupu: “Tokologa e kau gahua he faiaoga ne age e au e tohi Young People Ask ki ai, ne o mai ke he ofisa haaku mo e hūhū, ‘Tufa i fe e lautolu e tau tohi?’” Kua hako e mena ne o mai a lautolu ki ai!

Ko e Aho Faiumu e aho fakahiku he fono. Ne nakai ko e aho gahua ha Maria a ia, ti tuku e ia e tau tohi he falu fuga laulau he ofisa haana. Ne tohi e ia he lapa: “Tau Faiaoga Fakahele! Maeke ia mutolu ke uta e tau tohi ma mutolu mo e falu ne iloa e mutolu. To lagomatai he tau tohi mitaki lahi nei a mutolu ke kautū ke he tau gahua ha mutolu mo e to fakamalolō e tau magafaoa ha mutolu.” Ko e heigoa e tali? “Ne fano au ke he ofisa haaku he aho ia ti kitia kua teitei oti e tau tohi he uta. Ne fakamafiti au ke tamai e tau fufuta foou he tau tohi mo e tau mekasini.” He oti e fonoaga, ne foaki e Maria 380 e mekasini, 173 e tohi, mo e 34 e porosua. He liliu atu a lautolu ne o mai ke he fonoaga ke he tau matakavi mamao ne nonofo mo e gahua ai a lautolu, ne uta foki e lautolu e tau tohi. Ne pehē a Maria, “Kua fiafia lahi au ha kua hokotia e tau tega he kupu mooli mogonei ke he tau faahi mamao ligo ha Tuva!”—Fakama. 11:6.

[Mepe he lau 32]

(Ma e puhala katoa ne tohi aki, kikite e tohi)

RUSIA

REPAPILIKI A TUVA