Ko e Tagata ne Hiki e Lalolagi
Totou piliona e tau tagata ne momoui ti mamate hifo he lalolagi nei. Laulahi ne nakai manatu ha kua nakai talahaua e tau mena ne taute. Ka e tokogahoa ne omoomoi e puhala he fakamauaga tuai—ti liga lauia e moui haau he tau aho takitaha.
KUA ala a koe he magaaho pogipogi ti tauteute ke fano ke gahua. Ne fakapuho e koe e tau molī he tauteute a koe. Ne uta e koe e pepa po ke mekasini ke totou he pasi. Ne manatu e koe ke inu e tegavai ne atu he ekekafo ke lagomatai a koe ke totoko e gagao pikitia. Nakaila kamata ia e aho haau, ka kua fitā a koe he aoga mai he tau lagomataiaga he tau tagata talahaua tokogahoa.
Michael Faraday Fanau he 1791, ko e tagata fisiki (physicist) Peritania nei ne talaga fakamua e enisini hila mo e matini dynamo. Ko e tau iloaaga haana ne lagomatai ke maeke he tau tagata ke fakaaoga e hila.
Ts’ai Lun Ko e tagata gahua fakatufono he hopoaga tokoluga ha Saina ko Ts’ai Lun, ne talahaua he fakaholo ki mua e puhala ne talaga laupepa he kavi ke he 105 V.N. ati loga lahi e mouaaga he tau laupepa.
Johannes Gutenberg Kavi ke he 1450, ne fakatū fakamua he tagata Sihamani nei e matini lolomi tohi ne maeke ke holo. Ne nakai tauuka e lolomiaga ne taute he matini, ati tokologa ai ne moua e tau vala tala ke he tau mataulu kehekehe.
Alexander Fleming He 1928, ko e tagata kumikumi Sikotelani nei ne moua fakamua e vai ekekafo ne fakahigoa ko e penicillin. Kua fakaaoga lahi e tau vai ekekafo mogonei ke tului aki e tau gagao pikitia.
Nakai fakauaua, ko e tau mouaaga mo e tau mena foou ne taute he tau tagata tokogahoa ati maeke he tau tagata piliona ke moua falu tuaga hagahaga mitaki po ke tino malolō.
Ka e taha e tagata taane ne kehe mai ia lautolu ia. Nakai talahaua a ia ha ko e ha mouaaga fakasaiene po ke tau vai tului fakaekekafo. Ka ko e tagata nei ne feaki mai he tuaga tokolalo ne mate he teitei 2,000 tau kua mole ne toka hifo e fekau—ko e fekau malolō lahi mo e mafanatia. Ka fuafua e laulahi he fekau haana ne lauia e tau momoui he tau tagata he lalolagi katoa, tokologa ka talia ai ko ia mooli e tagata ne hiki e lalolagi.
Ko e tagata ia ko Iesu Keriso. Ko e heigoa e fekau ne fakamatala e ia? Ti ko e puhala fe ne lauia e moui haau he fekau ia?