Iesu Keriso—Haana Fekau mo Koe
“Kua hau au kia moua e lautolu e moui, kia moua lahi ai ni.”—IOANE 10:10.
KUA hau a Iesu Keriso ke he lalolagi matapatu ke foaki atu ka e nakai ke moua mai. Puhala he gahua fakamatala haana, ne foaki e ia e mena fakaalofa uho lahi ke he tau tagata—ko e fekau ne fakakite e kupu mooli hagaao ke he Atua mo e Haana finagalo. Ko lautolu kua talia e fekau ia ka olioli e moui mitaki mogonei, ti totou miliona e tau Kerisiano mooli ne talahau pihia.a Ka ko e matapatu he fekau ne fakamatala e Iesu ko e mena fakaalofa uho lahi—ko e moui mitaki katoatoa ne foaki e ia ke lata mo tautolu. Ko e fiafia tukulagi ha tautolu kua fakavē ke he tali atu ha tautolu ke he matapatu vala nei he fekau haana.
Tau mena ne foaki he Atua mo Keriso Ne iloa e Iesu to matulei a ia ke he mate mamahi he tau lima he tau fī haana. (Mataio 20:17-19) Ka e he tau kupu talahaua haana ia Ioane 3:16, ne pehē a ia: “Nukua pihia e fakaalofa mai he Atua ke he lalolagi, kua ta mai ai hana Tama fuataha, kia nakai mate taha ne tua kia ia, ka kia moua e ia e moui tukulagi.” Ne pehē foki a Iesu na hau a ia “kia foaki atu foki hana moui mo lukutoto ke hukui aki e tau tagata tokologa.” (Mataio 20:28) Ko e ha ne pehē a ia to foaki atu haana moui ka e nakai ke uta ai?
He omoomoi he fakaalofa mua ue atu, ne taute he Atua e foakiaga ma e tau tagata ke fakahao mai he agahala pauaki mo e tau mena ne tutupu mai ai—ko e nakai mitaki katoatoa mo e mate. Ne taute he Atua e mena nei he fakafano mai e Tama fuataha haana ke he lalolagi ke matulei ke he poa he mate. Ko e omaoma fakamakai a Iesu, he foaki haana moui mitaki katoatoa ke lata mo tautolu. Ko e foakiaga nei, ne fakahigoa ko e lukutoto, ko e mena fakaalofa mua ue atu he Atua ke he tau tagata.b Ko e mena fakaalofa ka takitaki ke he moui tukulagi.
Mena kua lata ia koe ke taute Ko e lukutoto kia ko e mena fakaalofa ma haau? Uta ne mena ia ki a koe. Ke fakatai: Manamanatu la kua atu he taha tagata e puha he mena fakaalofa kua hafīfī. To nakai eke mo mena fakaalofa haau ato oho atu a koe ti talia ai. Pihia foki, ne foaki atu e Iehova e lukutoto ki a koe, ka e nakai moua e koe e mena fakaalofa nei ato oho atu a koe ti talia ai. Fēfē?
Ne pehē a Iesu ko lautolu ne “[fakagahua e] tua” ki a ia ka moua e moui tukulagi. Ko e tua kua putoia e puhala ne moui ai a koe. (Iakopo 2:26) Ko e fakagahua e tua ia Iesu kua kakano ke fakalautatai e moui haau mo e tau mena ne talahau mo e taute e ia. Ke taute e mena ia, kua latatonu ia koe ke iloa mitaki a Iesu mo e Matua haana. “Ko e moui tukulagi foki hanai,” he talahau e Iesu, “kia iloa e lautolu a koe, ko e Atua moli tokotaha ni, katoa mo ia ne fakafano mai e koe, ko Iesu Keriso haia.”—Ioane 17:3.
Kavi ke he 2,000 tau kua mole, ne talahau e Iesu Keriso e fekau ne hiki e tau momoui he tau miliona tagata he lalolagi oti. Manako nakai a koe ke iloa lahi hagaao ke he fekau ia mo e puhala ka aoga ki a koe mo e tau fakahele haau, he mogonei ke hoko ke he tukulagi? To fiafia e Tau Fakamoli a Iehova ke lagomatai a koe.
Ko e tau vala tala ka mumui mai to fakamahani fakalahi a koe mo Iesu Keriso, ko e tagata ne fakamatala e fekau ka liga hiki tukulagi e moui haau.
[Tau Matahui Tala]
a Nakai ko e tau tutaki mooli he Keriso e tau tagata oti ne totoku ko e tau Kerisiano. Ko e tau tutaki mooli ha Iesu a lautolu ne fakalautatai e tau momoui mo e tau kupu mooli ne fakaako e ia hagaao ke he Atua mo e Haana finagalo.—Mataio 7:21-23.
b Ma e falu vala tala foki hagaao ke he fakaakoaga he Tohi Tapu ke he lukutoto, kikite e veveheaga 5, “Ko e Lukutoto—Mena Fakaalofa Mua Ue Atu he Atua,” he tohi Ko e Heigoa ne Fakaako Moli he Tohi Tapu? ne taute fakailoa he Tau Fakamoli a Iehova.