Tau Hūhū he Tau Tagata Totou
Ko e ha ne ita a Mose ke he tau tama taane ha Arona ko Eleasaro mo Itamaro he mole e mamate he lafu ha laua ko Natapu mo Avihu, ti fakatotoka fēfē e ita haana?—Levi. 10:16-20.
Nakai leva he mole e fakatū e fakatokaaga fakaekepoa ke gahua he faituga, ne tamate e Iehova e tau tama taane ha Arona ko Natapu mo Avihu ha kua foaki e laua e poa he afi kehe ki mua Haana. (Levi. 10:1, 2) Ne poaki e Mose ke he tau tama taane ha Arona ne momoui agaia ke nakai tagi tatuki ha ko e lafu ha laua ne mamate. Nakai leva e mole, ne ita a Mose ki a Eleasaro mo Itamaro ha kua nakai kai e laua e koti ne poa ha ko e hala. (Levi. 9:3) Ko e ha ne pihia ai a Mose?
Kua talahau fakamahino he tau fakatufono ne age e Iehova ki a Mose, ko e ekepoa ne taute e poa he hala ka kai taha vala kakano he poa ia i loto he lotopā he fale uta fano he tuutaaga. He taute pihia kua onoono ki ai ko e tali ma e tau agahala ha lautolu ne taute e poa. Kaeke ke uta taha maga toto he poa ke he Mena Tapu, ki loto he vala fakamua he faituga, ko e mena mo poa kua nakai lata ke kai. Ka e lata ke huhunu.—Levi. 6:24-26, 30.
He mole e tau mena matematekelea ne tutupu he aho ia, kua kitia e Mose e lata ke taute taha mena ke mailoga mooli kua muitua agaia ke he tau poakiaga oti ha Iehova. He iloa kua huhunu e koti ne foaki mo poa ha ko e agahala, ne ita lahi a ia he hūhū ki a Eleasaro mo Itamaro ke iloa e kakano ne nakai kai ai e laua tuga ne poaki, ha ko e toto ia kua nakai foaki ki mua a Iehova ke he Mena Tapu.—Levi. 10:17, 18.
Ne tali e Arona e hūhū ha Mose, ha kua maaliali ai ko e mena ne taute he tau ekepoa ne momoui agaia ne talia e ia. He iloa e kakano ne tamate e tau tama taane tokoua haana, ne liga manamanatu a Arona to fai nakai he tau ekepoa ne loto manamanatu mitaki ka kai e poa he hala he aho ia. Liga logona hifo e ia ka kai ai e lautolu to nakai fakafiafia a Iehova, pete kua nakai putoia fakahako a laua ke he hehē ne taute e Natapu mo Avihu.—Levi. 10:19.
Liga manamanatu pauaki a Arona ke he aho ne taute he tau tagata he magafaoa haana e poa fakamua he tau feua ekepoa ha lautolu, kua lata ia lautolu ke fakaeneene fakalahi ke fakafiafia e Atua ke hoko ke he tau mena ikiiki lalahi. Pete ia, kua ekefakakelea tuai e Natapu mo Avihu e higoa ha Iehova, ti kua ita lahi mahaki e Atua ki a laua. Kua liga manamanatu a Arona ko e tau tagata he magafaoa fakaekepoa ne taute e hala nei kua nakai lata ke kai e poa tapu.
Ne liga talia e Mose e tali he matakainaga haana, ha kua pehē e kupu fakahiku: “Kua logona ai e Mose, ti mitaki ni kia ia.” (Levi. 10:20) Maaliali ai, ne talia foki e Iehova e tali ha Arona.