Perofetaaga 2. Hoge Lahi
“To ha i ai foki e tau hoge.”—MAREKO 13:8.
● Ko e tagata taane ne kumi huaga ke he maaga ko Quaratadji, i Niger. Ko e tau kasini, lafu tehina, mo e tau mahakitaga he tagata taane ne o mai foki he falu matakavi he motu he lali ke fehola mai he hoge. Ka e takoto tokotaha e tagata taane he potu he kelekele. Ko e ha ne tokotaha a ia? “Ne nakai maeke a ia ke fagai e [magafaoa haana] ti nakai maeke a ia ke ono aki e tau mata a lautolu,” he fakamaama e Sidi, ko e takitaki he maaga.
KO E HEIGOA NE FAKAKITE HE TAU MENA TUTUPU? He lalolagi katoa, ne teitei 1 mai he 7 e tagata ne nakai lahi e mena kai ke kai he tau aho takitaha. Ko e tau numera kua kelea lahi mahaki ke he taha faahi a Sahara i Aferika ne 1 mai he 3 kua matehoge. Ke maama e numera ia he taha puhala foki, manamanatu la ke he magafaoa ko e matua taane, matua fifine, mo e tama mukemuke. Ane mai lata ni e mena kai ma e tokoua, ko hai ka hoge? Ko e matua taane? ko e matua fifine? ko e tama mukemuke? Ko e fifiliaga anei kua taute he tau magafaoa pihia he tau aho takitaha.
KO E HEIGOA E TOTOKOAGA FA MAHANI? Kua lahi e mena kai ne tupu mai he lalolagi ma e tau tagata oti. Ko e tau koloa he lalolagi kua lata ni ke leveki fakamitaki.
AOGA NAKAI E TOTOKOAGA IA? Mooli, maeke he tau tagata gahua fonua ke tō mo e uta fano e tau mena kai loga nakaila pihia ia tali mai. Latatonu ai, kua lata e tau fakatufono he tau tagata ke leveki fakalahi e tau mena kai he lalolagi ke fakatotoka aki e tau lekua he hoge. Pete ia, he mole e tau tau loga he lali ai, kua nakai maeke a lautolu ke taute pihia.
KO E HEIGOA E MANATU HAAU? Kua fakamooli kia e Mareko 13:8? Pete ne holo ki mua e tau matini foou, kua lauia kia e tau tagata he lalolagi katoa he kū e tau mena kai?
Ko e tau mafuike mo e tau tatalu ko e tau lekua fakamua ne fa tutupu mai he taha vala he fakamailoga he tau aho fakamui.
[Blurb he lau 5]
“Molea e taha mai he tolu e tama ne mamate he nimonia, hihī mo e falu gagao kua liga momoui ane mai nakai matehoge.”—ANN M. VENEMAN, FORMER EXECUTIVE DIRECTOR OF THE UN CHILDREN’S FUND.
[Fakatino Credit Line he lau 5]
© Paul Lowe/Panos Pictures