‘Taute he Mena Ia Au ke Matakehe Fakatote’

He hoko mai e tagata fakamatala tumau ko Charlotte White ki Louisville, Kentucky, U.S.A., toho e katoleta fai hui, ne lahi e fakalagalaga mena haana.

KO E tau 1908, ko e Matakainaga Fifine ko White ne moua mooli e onoonoaga he tau tagata he taone ha ko e mouaaga foou maka he Dawn-Mobile. “Ne fai manatu ne tupu mai ai,” he ui e ia, “ti taute he mena ia au ke matakehe fakatote.”

Ko e Tau Tagata Fakaako Tohi Tapu, ne higoa ai ko e Tau Fakamoli a Iehova he mogoia, ne kitia e lata ke fakailoa e tau kupu mooli uho ne iloa e lautolu mai he kumikumi fakamakutu he tau Tohiaga Tapu. Tokologa ne moua e iloilo he Tohi Tapu he puhala he tau fufuta tohi ne mataulu Millennial Dawn (ne iloa fakamui foki ko e Studies in the Scriptures). Ko e tau Kerisiano ia ne makai mo e maeke ke fenoga mamao ke he tau taone, tau maaga, mo e tau maaga tua ne foaki e tau tohi nei ne fakamaama ko e “Helping Hands for Bible Students” ke he falu tagata totou ne makai.

He 1908, ko e Matakainaga Fifine ko White mo e falu tagata fakailoa makutu he Kautu ne foaki e ono e volume kua fakatua aki e kalaie ne $1.65 (U.S.). He nakai age ni mogoia e Dawn, to fakamau e lautolu e tau ota ti liliu he mogo fakamui​—fa mahani he aho totogi​—ke ta atu ki a lautolu mo e moua e totogi tote ma e lomiaga. Taha e tagata totoko ne hohoha hagaao ke he tote he tupe ne tuku he tau tagata ka moua e tau tohi!

Ne manatu e Malinda Keefer e tau ota ne ua e teau ke he tolu e teau he tau tohi he taha e faahi tapu. Ka ko e fiafia lahi ne fakakite ke he Dawn ne paleko lahi ai. Ko e volume ke ono aki ne 740 e lau he katoa! “Ko e mamafa he limagofulu e tohi ne fagofulu e pauna” (18 e kilokuleme) ne talahau he The Watch Tower, ti ka taatu ai kua “mamafa lahi mahaki,” mua atu ma e tau matakainaga fifine.

Ke fakatotoka e paleko ia he taatu he Dawn, ko e Matakainaga Taane ko James Cole ne talaga e koloa ne ua e hui mo e maeke ke pelupelu ka tuku e katoleta ki ai ti tamau aki e tau fao. Nakai liu foki ke hahamo e tau puha mamafa ne puke he tau tohi, ne pehē e tagata ne talaga: “Nakai mapaki e tau tukeua haaku.” Ne fakakite e ia e koloa foou ke he toloaga fiafia he fonoaga he Tau Tagata Fakaako Tohi Tapu he 1908 i Cincinnati, Ohio. He tau tamau he tau matapotu takitaha he lapatoa ne fakalago aki ne tohi e higoa Dawn-Mobile, ha ko e tau koloa pauaki i loto ko e tau volume he Millennial Dawn. He nakai lahi e fakamahani, ko e uta e katoleta ne puke he tau tohi ne mukamuka ke toho lima taha. Maeke e tokoluga ke hiki ti maeke e tau hui ke toho he tau hala peleō. He mole e aho he gahua he fonua, ko e tau hui ne taute aki e lopa ka pepelu ke he taha faahi he katoleta he fina atu hui po ke he motokā ki kaina.

Ko e tau matakainaga fifine he gahua mau na moua noa e Dawn-Mobile. Ka nakai pihia, to totogi ai $2.50 (U.S.). Ko e Matakainaga Fifine ko Keefer, he fakatino nei, ne iloa mitaki ke fakaaoga e Dawn-Mobile ti maeke a ia ke toho e katoleta ne puke he taha e lima mo e uta foki falu kato kalaie he tau tohi he taha lima. He moua e tokologa ne fanogonogo he taha he taone keli kolu i Pennsylvania, U.S.A., ne fa taute e ia tolu po ke fā e fenoga ke he taha faahi he hala laupapa he aho ka tufa ai.

He matahiku he atu tau 1980, ko e tagata fakaholo vakalele ne talaga e katoleta fai hui ne kua kitia lahi mogonei ke he tau malē vakalele mo e tau puhala tū lavelave. Ka e he taha e teau tau kua mole, ne liga fiafia e tau Tagata Fakaako Tohi Tapu ke he tau tagata fia iloa he toho e lautolu e tau Dawn-Mobile ha lautolu he tufatufa e tau tega uho lahi he kupu mooli he Tohi Tapu.

[Blurb he lau 32]

Ko e Matakainaga Fifine ko Keefer ne tolu po ke fā e fenoga ke he taha faahi he hala laupapa he aho ka tufa ai

[Blurb he lau 32]

Ne fakatotoka e paleko ia he taatu he Dawn