“Kua Fakaako Au ke Fiafia Lahi ke he Gahua Foafoa he Tau Aho Takitaha”

HE 1886, totou teau e tau lagaki he Millennial Dawn, Volume I, ne toka he Bible House i Allegheny, Pennsylvania, U.S.A., tuku auloa ma Chicago, Illinois. Ne amanaki a Charles Taze Russell ke tufa e volume foou ke he tau fale toka tohi. Ko e taha he tau lā lahi mahaki he Tau Faahi Kaufakalataha ne tufa e tau tohi hagaao ke he lotu ne talia ke fakahū e tau Millennial Dawn. Ka e ua e faahi tapu he mole, ko e tau tohi ne fakahū he toga kua liuaki mai ke he Bible House.

Talahau ai he tagata fakamatala talahaua ne ita lahi he kitia e Millennial Dawn ne fakatātā mo e tau tohi haana. Ka toka loa e tau tohi he fatatohi, he vale a ia, to uta e ia mo e tau kapitiga evagelia talahaua haana e tau tohi mo e pisinisi ha lautolu ke he taha matakavi foki. Ne liuaki tehatehaua he tagata tufatufa e Dawns. Lafi ki ai, ne fakainaina ai ke he tau nusipepa. Ka ko e tau tagata totoko ne kitia ki ai kua taofi e tau konotuleke fakainaina. To maeke fēfē e tau tohi foou nei ke hokotia ke he tau tagata ne kumi e kupu mooli?

Ko e tau tagata foafoa, ne fakahigoa he magahala ia, ne eke ai mo matapatu.a He 1881, ko e Zion’s Watch Tower ne ole ke he 1,000 e tau tagata fakamatala gahua mau ke tufa e tau tohi faka-Tohi Tapu. Pete he tokoteau ni e tagata foafoa, ne gana e lautolu e tau tega he kupu mooli he tau tohi ke he tau kalakala oti. He 1897, teitei taha e miliona he Dawns ne tufa, laulahi ne tufatufa he tau tagata foafoa. Laulahi ia lautolu ne momoui ni he tupe tote ne moua mai he tau Watch Tower ne foaki tuai po ke tau tohi ne age e lautolu.

Ko hai e tau tagata foafoa loto malolō nei? Ne kamata e falu he fuata mui, falu he lalahi hake a lautolu. Tokologa ne nonofo tokotaha po ke fai tokoua ka e nakai fai tama, ka e nakai tokologa e tau magafaoa ne fakalataha ke he matagahua. Ko e tau tagata foafoa tumau ne gahua loa he tau aho, mo e tau tagata foafoa fakakū ne taha po ke ua e tulā he aho. Nakai tino malolō e tau tagata oti po ke haia he tau tuaga ke taute e gahua foafoa. Ka e he fonoaga he 1906, ko lautolu kua maeke ne tala age ki ai kua nakai lata a lautolu ke “iloilo lahi, po ke taleni lahi, po ke moua e alelo he agelu.”

Teitei ni he tau magamotu oti, ne taute he tau tagata noa e gahua mua ue atu nei. Taha e matakainaga taane ne fuafua ke he fitu e tau ne tufatufa e ia 15,000 tohi. Ka e pehē a ia, “Nakai hū au ke he gahua foafoa ke eke mo tagata sela pepa, ka e eke mo fakamooli ha Iehova mo e haana a kupu mooli.” Ko e mena ne ō e tau tagata foafoa ki ai, ne vakavaka e tau tega he kupu mooli mo e ko e tau matakau he Tagata Fakaako Tohi Tapu ne kamata ke tokologa.

Nakai fiafia e tau akoako ke he tau tagata foafoa, ti fakahigoa a lautolu ko e tau tagata sela pepa. Ko e Watch Tower 1892 ne talahau: “Tokogahoa ne iloa a [lautolu] ko e tau hukui mooli he Iki, po ke mailoga e lilifu ne kitia he Iki he mahani fakatokolalo mo e poa fakatagata ha lautolu.” Mooli, ko e moui he tau tagata foafoa ne nakai mukamuka e holoaga, he talahau ai he taha ia lautolu. Ko e tau tevae maō mo e tau pasikala taholi e tau matapatu puhala peleōafi. He nakai lahi e tupe, ne tautui he tau tagata foafoa e tau tohi aki e tau mena kai. He oti e aho he gahua he fonua, mategūgū ka ko e tau tagata fakamatala fiafia ne liliu ke he tau fale lā mo e tau poko totogi. Hau mogoia e Colporteur Wagon, ko e peleō ne taute mo fale ti nakai lahi e magaaho mo e tupe ne mole.b

He mataulu he 1893 ko e Fonoaga i Chicago, ne putoia he polokalama e tau fakaholoaga pauaki he tau tagata foafoa. Ne fakakite he tau mena nei e fetutalaaki ke he tau mena tutupu, tau puhala fakamatala mo e fakatonuaga aoga. Lagataha e tomatoma he Matakainaga ko Russell e tau tagata fakamatala gahua malolō ke moua e fua kai pogipogi mitaki, inu e kalase huhu he lotoga he pogipogi, mo e inu asekulimi he aho vela.

Ko e tau tagata foafoa ne kumi tagata gahua, po ke hoa fakamatala ne tau e lipine ago. Ko e tau tagata foafoa foou lahi ne hoa mo lautolu ne iloa mitaki. Ko e fakamahaniaga pihia kua lata lahi, ha kua taha he tagata foafoa foou ne talahau hopoate hagaao ke he tau tohi he pehē, “Ai fia loto a koe ke he tau mena nei, pihia nakai?” Fiafia ai, ne uta he tagata he kaina, ti eke a ia mo matakainaga fifine he magaaho fakamui.

Taha e matakainaga taane ne manatu, ‘Lata nakai au ke toka e tuaga monuina haaku mogonei ti foaki $1,000 (U.S.) he taha e tau ke he gahua, po ke lata ia au ke eke mo tagata foafoa?’ To loto fakaaue e Iki ke he na mena ua ia, he tala age ki a ia, ka e foaki fakahako e magaaho haana ke he Iki to tamai e tau monuina loga ki a ia. Ne kitia e Mary Hinds e gahua foafoa “ko e puhala homo ue atu he taute e mitaki ma e tokologa lahi mahaki he tau tagata.” Mo e ko Alberta Crosby ne mahani mā ne pehē, “Kua fakaako au ke fiafia lahi ke he gahua foafoa he tau aho takitaha.”

He vahā nei, tokologa e tau hologa fakatino mo e fakaagaaga he tau tagata foafoa makutu hane taofi mau agaia ke he tufaaga fakaagaaga ha lautolu. Ka nakaila ha ha ia koe e tagata foafoa po ke paionia he matohiaga he magafaoa haau, ko e ha he gahua ke kamata e aga ia he magafaoa ni haau? To ako foki e koe ke ofania e gahua fakamatala tumau he tau aho takitaha.

[Tau Matahui Tala]

[Blurb he lau 32]

Nakai lata a lautolu ke “iloilo lahi, po ke taleni lahi, po ke moua e alelo he agelu”

[Fakatino he lau 31]

Tagata Foafoa ko A. W. Osei i Ghana, kavi 1930

[Tau Fakatino he lau 32]

Luga: Tagata Foafoa Edith Keen mo Gertrude Morris i Igilani, kavi 1918; lalo: Stanley Cossaboom mo Henry Nonkes he Tau Faahi Kaufakalataha, mo e tau puha pepa gatigati ne oti e tau tohi he tufa