Ko e Fekafekau ke he Atua ko e Vailakau Haana!
Magaaho ne uiina tokoua e paionia ki loto he taha fale i Kenya, ne ofo lahi a laua ke kitia e tagata taane ne tote lahi e tino ne takoto he mohega. Ne tote lahi e tino haana ti kūkū e tau lima. He mogo ne tutala a laua ki a ia ke he maveheaga he Atua to “hopohopo ai e tagata kulikuli tuga ne aila,” ne mamali lahi mahaki e tagata ia.—Isaia 35:6.
Ne iloa he tau paionia ko Onesmus kua 30 tumā e tau he moui mogonei, ne fanau mo e gagao osteogenesis imperfecta, po ke gagao mapakipaki vave e tau polohui motua. Kua molūlū lahi mahaki e tau polohui motua haana—molūlū lahi ti ka peehi fakatote to mapaki ai. Ha kua nakai fai puhala ke fakamalolō po ke ha tuluiaga ma e gagao, ne amanaki a Onesmus ke mamahi mo e fakaaoga ni he nofoa fakataveli he moui katoa haana.
Ne talia e Onesmus e fakaako Tohi Tapu fakatagata. Ka kua nakai fiafia e matua fifine haana ke fano a ia he tau feleveiaaga Kerisiano, he manatu neke pakia a ia ti lafi ki luga e mamahi. Ne tapaki mogoia he tau matakainaga e tau feleveiaaga, ti fanogonogo a Onesmus ki ai i kaina. He mole e lima e mahina he fakaako ai, ne fifili a Onesmus kua fia fano a ia ke he tau feleveiaaga pete he tau hagahaga kelea.
Fai mamahi lafi ki luga nakai a Onesmus he fina atu he tau feleveiaaga Kerisiano? Nakai, ai pihia. “Tuga kua tote hifo e mamahi tumau haaku he tau magaaho he feleveiaaga,” he talahau e Onesmus. Manatu a ia ko e tua foou haana ati mitaki he logona e ia. Ne mailoga he matua fifine ha Onesmus kua hiki e tuaga he tama taane haana ti fiafia lahi a ia mo e talia foki ke fakaako e Tohi Tapu. “Ko e fekafekau ke he Atua ko e vailakau he tama taane haaku,” he ui e ia.
Nakai leva ti eke a Onesmus mo tagata fakailoa nakaila papatiso. Fai magaaho he mole, ne papatiso a ia ti kua eke mogonei mo fekafekau lagomatai. Pete kua nakai maeke a ia ke fakaaoga e tau hui haana mo e taha lima, ne manako a Onesmus ke eketaha he fekafekauaga ha Iehova. Ne manako a ia ke paionia fakakū ka e fakauaua ke tuku e tohi ole. Ko e ha? He iloa e ia kua lata na ia ke falanaki katoatoa ke he taha tagata ke poka e nofoa fakataveli haana. Mogo ne tala age e ia e manatu nei haana ke he tau matakainaga Kerisiano, ne mavehe a lautolu ke lalago a ia. Ti lalago mooli e lautolu he lagomatai a Onesmus ke paionia fakakū.
Ne pihia foki e logonaaga ha Onesmus he mogo ne manako ke paionia tumau. Ka e hoko ke he taha mogo, ne moua e ia e fakamalolōaga kua latatonu mai he lauga he aho. Ko e lauga he aho ko e Salamo 34:8: “Kia kamata e mutolu mo e kitekite, kua mitaki a Iehova.” He mole e manamanatu fakahokulo ke he kupu tohi ia, ne fifili a Onesmus ke eke mo paionia tumau. He mogonei kua fakamatala a ia ke he fā e aho he faahi tapu ti loga e tagata fakaako Tohi Tapu haana kua holo ki mua fakaagaaga. He 2010, ne fina atu a ia he Aoga Fekafekau Paionia. Ko e fiafia ha ia ha Onesmus ha ko e taha he tau faiaoga haana ko e taha he tau matakainaga taane ne ahiahi age fakamua ki a ia!
Pete kua mamate e tau mamatua ha Onesmus mogonei, kua leveki he tau matakainaga he fakapotopotoaga a ia he tau aho oti. Ne loto fakaaue lahi a ia ke he tau monuina oti kua moua e ia mogonei, ti amaamanaki lahi a ia ke he aho ka “nakai pehe mai foki taha kua nofo ai, Kua gagao au.”—Isaia 33:24.