Fakamooliaga Malolō Mai he Matatohi Heperu ne Mua e Tote

Mauokafua mooli nakai a tautolu to fakamooli e tau maveheaga oti he Atua? Ne talitonu a Iesu ki ai, ti atihake e tua he tau tagata fanogonogo haana ha ko e tau fakaakoaga haana. Manamanatu ke he fakatai ne talahau e ia he Lauga he Mouga ne fakamau he Mataio 5:18: “Ha ko e moli ke tala atu e au kia mutolu, ke mole atu e lagi mo e lalolagi, ka e nakai mole taha iota po ke taha maga matatohi he fakatufono, ato fakamoli e tau mena oti.”

Ko e matatohi ne mua e tote he alafapete Heperu e י (yod), matatohi fakamua a ia he Tetragrammaton he higoa tapu he Atua ko Iehova.a Lafi ke he tau kupu mo e tau matatohi he Fakatufono he Atua, ne onoono e tau tohikupu mo e tau Farasaio kua aoga lahi e “maga matatohi” takitaha.

Pehē a Iesu to liga mole atu e lagi mo e lalolagi ka ko e tau vala tala ne mua atu e ikiiki he Fakatufono to fakamooli ai. Ka kua talahau he Tohi Tapu ki a tautolu to fakavē tukulagi e lagi mo e lalolagi. (Salamo 78:69) Ti ko e talahauaga ofoofogia nei kua fakakite to fakamooli foki e tau vala tala ne mua e ikiiki he Fakatufono.

Mailoga nakai e Iehova ko e Atua e tau vala tala ikiiki? Ē. Manamanatu ke he mena nei: Ne tala age ke he tau Isaraela i tuai ke aua neke fati e tau huimotua he punua mamoe he Paseka. (Esoto 12:46) Liga ko e vala tala tote. Maama nakai e lautolu e kakano kua nakai lata ke fati e lautolu e tau huimotua? Liga nakai maama. Ka e iloa e Iehova ko e Atua, ko e perofetaaga e vala tala nei ti nakai fai huimotua e Mesia ka papaki he tamate ti fakatautau ke he akau.​—Salamo 34:20; Ioane 19:31-33, 36.

Ko e heigoa ne fakaako mai he tau kupu ha Iesu ki a tautolu? Kua maeke foki a tautolu ke mauokafua katoatoa to fakamooli e Iehova ko e Atua e tau maveheaga oti haana ke hoko ke he tau vala tala ikiiki takitaha. Ko e fakamooliaga malolō mai he matatohi Heperu ne mua e tote!