Tau Leveki Takitaki—Ko e Tohi Kupu
1 Kua uho lahi e matagahua he tohi kupu he fakapotopotoaga he “eke e tau mena oti mo e fulufuluola mo e taute fakamitaki.” (1 Kori. 14:40) Ko e taha he Komiti Fekafekau he Fakapotopotoaga, ne leveki e ia e tau matutakiaga mo e tau fakamauaga uho he fakapotopotoaga. Pete ni kua nakai mailoga he tau tagata oti kana e tau matagahua hana ke tuga he falu motua, kua aoga mo e fakaaue lahi atu agaia ke he hana tau gahua.
2 Ka moua e matutakiaga mai he Sosaiete po ke he falu, to totou ai he tohi kupu mo e age e tali he mogo ka lata ai. Fakalago ki a ia ke moua e tau tohi pauaki mo e tufatufa ke he tau motua ti tuku he puha ma e fakamoliaga. Ne tivi e ia e tau laupepa ota mekasini mo e tau tohi mo e fakafano ai ke he Sosaiete. Ne leveki e ia a lautolu ne gahua ke he tau fakamauaga tupe mo e tau ota mekasini fakahu pihia foki mo e tau hagaaoaga ke he tau fono oti.
3 Ha kua lata he tohi kupu ke fakahu ke he Sosaiete he aho ke ono aki he mahina e hokotaki he fakapotopotoaga ma e fekafekauaga he fonua, kua lata ia tautolu oti ke hokotaki tuai ha tautolu a gahua he fonua he matahiku he tau mahina takitaha. Oti ti tohi hifo e ia he fakamauaga i loto he Hokotaki he Fakapotopotoaga he Tagata Fakailoa. Kua maeke he ha tagata fakailoa ke ole ke kitia hana ni a fakamauaga he gahua.
4 Ka hiki mai po ke fano kehe e tagata fakailoa he fakapotopotoaga, to ole mai he tohi kupu po ke fakafano ke he tau motua he taha fakapotopotoaga e tohi fakamaama katoa mo e fakamauaga he Hokotaki he Fakapotopotoaga he Tagata Fakailoa ma e tagata ia.—Our Ministry, lau 104-5.
5 Ne kitekite he tohi kupu e gahua he tau paionia, ti fakailoa ke he tau motua, mua atu ke he leveki fekafekau, ha lekua ka liga fehagai mo e tau paionia. Ne fakailoa e ia ke he tau leveki he Fakaakoaga Tohi he Fakapotopotoaga hagaao ke he tau tagata fakailoa ne nakai o tumau ke he gahua he fonua. Kua muamua tokoua e tohi kupu mo e leveki fekafekau ke lagomatai a lautolu ne nakai o he fonua.—Our Kingdom Ministry, Novema 1987, lau 1.
6 He kua iloa mitaki e tau matagahua he tohi kupu ati lagomatai e tautolu a ia ke mukamuka ke fakakatoatoa e fekafekauaga hana.—1 Kori. 4:2.