Kia Fakaaoga Fakamitaki e Tau Tohi Tuai
1 Ne fata he tagata e tau tohi miliona he tau fata tohi he tau matapokopoko oti he lalolagi. Ka e, ko e heigoa e aoga tukulagi ne ha ha ia lautolu ke lata mo e lanu tagata? (Fakama. 12:12) He lahi e aoga he tau tohi ne kua hagaaki e onoonoaga ke he Kautu he Atua mo e ke he mena ka taute ai ma e tau tagata. Toka agaia he tau fakapotopotoaga e tau tohi kehekehe pihia ne kua lomi fakailoa ato hoko ke he 1985. Ia Ianuari to foaki e tautolu e tau tohi tuai nei ke he tau tagata.
2 Fai Aoga Moli a Lautolu: Ha ko e falu ha tautolu kua logona kua tuai e tau tohi nei he fakatatai mo e tau tohi fou lahi ha tautolu, kua lata ia tautolu ke manatu kua ha ha i loto e kupu moli faka-Tohiaga Tapu. Ko e fekau he Kautu kua fakamaama mai kua aoga lahi agaia he vaha nei, ti ka omaoma, kua eke ai mo fakahaoaga he moui. (Ioane 17:3) Ti kua lata ia tautolu ke tuku fakalahi e laliaga ke fakaaoga e tau tohi tuai nei.
3 He peehi e aoga ha lautolu kua kitia he fifine ne moua e tau tohi Watch Tower tuai mai he tupuna fifine hana. Ne huhu e Fakamoli ke he fifine kua fai maamaaga nakai a ia ke he aoga moli he tau tohi. Ne tali e fifine: “Nakai iloa e au e aoga ha lautolu, ka e iloa fefe e au?” Ne talia he fifine e fakaakoaga he Tohi Tapu, ti hau ke he kupu moli, ti ko e magaaho fakamui ne tokiofa e ia e fata tohi he tupuna fifine hana. Ko e veveheaga uho ha ia ma e tau tohi tuai ia!
4 Kia Tufatufa a Lautolu: Lafi ki ai ke he foaki he tau tohi tuai nei he taha fale ke he taha fale, kia manatu ke foaki ai ka liu ahi atu ke he tau tagata ne kua iloa e koe kua fiafia ke totou e tau tohi ha tautolu, pihia mo lautolu ne moua mau e The Watchtower mo e Awake! ne ha ha ai he fakaholoaga mekasini hau. Ma lautolu kua fakaako e Tohi Tapu mo koe, ko e tau tohi tuai kua fifili ke foaki e fakaveaga he iloilo ka fakalaulahi e maamaaga he kupu moli. Kia nakai nimo ke moua ha tohi tuai ne nakai fai a koe he fata tohi hau ni. He puhala nei, to moua e koe e fata tohi fakateokarasi kua uho, ne kua fakaaoga ke fagai e tau magaaho fakaako fakatagata hau.
5 He nakai fakaputu e tau tohi tuai ha tautolu, kia fakaaoga fakamitaki ai e tautolu ke omoi aki e tau tagata kua feleveia e tautolu ke “matakutaku a ke he Atua, mo e omaoma ke he hana tau fakatufono.”—Fakama. 12:13.