Tau Fakailoaaga

◼ Tau tohi foaki ma Mati: Iloilo Ne Takitaki Atu ke he Moui Tukulagi. Lali fakalahi ke kamata e tau fakaakoaga Tohi Tapu. Aperila mo Me: Tau mekasini Ko e Kolo Toko mo e Awake! Kua lata e tau tagata fakailoa ke talahau ke he tau tagata he tau kaina na maeke a lautolu ke foaki mena fakaalofa ma e gahua he lalolagi katoa ka manako a lautolu ke foaki atu. Ka kitia e fiafia ti fakakite age e porosua Manako, taute e laliaga pauaki ke kamata e tau fakaakoaga Tohi Tapu. Iuni: Ko e Heigoa e Manako he Atua ma Tautolu? po ke Iloilo Ne Takitaki Atu ke he Moui Tukulagi. Ka fita e moua he tau tagata he tau kaina e tau tohi nei, foaki e porosua kua latatonu ne fai he fakapotopotoaga.

◼ Ko e tau tagata fakailoa kua manako ke eke mo tau paionia fakaku ia Aperila kua lata ke taute e tau fakatokaaga mogonei mo e tuku tuai e tau tohi ole ha lautolu. To lagomatai he mena nei e tau motua ke taute e tau fakatokatokaaga kua lata ma e gahua ke he fonua mo e fakaloga e tau mekasini mo e falu tohi. Ko e tau higoa ha lautolu ne talia ke paionia fakaku kua lata ke fakailoa ke he fakapotopotoaga he tau mahina takitaha.

◼ To fakahoko e Fakamanatuaga he Aho Tuloto, ia Mati 28, 2002. Ka mahani e fakapotopotoaga ha mutolu ke feleveia he Aho Tuloto, kia hiki ai ke he taha aho kehe he fahitapu kaeke ke ata e Fale he Kautu. Ka nakai maeke e mena nei ti lauia e Feleveiaaga Fekafekau ha mutolu, ko e tau vala ne felauaki tonu ma e fakapotopotoaga ha mutolu ka liga lata ke fakahu ke he taha Feleveiaaga Fekafekau.

◼ Nakai leveki he la matapatu ofisa e manako he tau tagata fakailoa takitaha ma e tau ole tohi. Kua lata e leveki he fakapotopotoaga ke taute e fakailoaaga ke he tau mahina takitaha ato fakafano atu e ole tohi he mahina he fakapotopotoaga ke he la matapatu, ke maeke he tau tagata ne fiafia ke moua e tau tohi ma e tagata ni ke fakailoa atu ke he matakainaga ne leveki e tau tohi. Fakamolemole tokaloto e tau tohi ole pauaki.

◼ Kua aoga ke he tau matakau toko 20 po ke molea e tagata ka pulega ke aahi atu e la matapatu ke tohi atu fakamua ke he la matapatu ofisa, P O Box 75-142 Manurewa. Fakamua to ahi atu a mutolu, fakamolemole kia liu fakamanatu e Ha Tautolu a Fekafekauaga he Kautu ia Me 1998 he Puha Huhu hagaao ke he lilifu he tau tapulu mo e tau tauteuteaga ka ahi atu ke he kaina Peteli.

◼ Kua ha ha i ai e afi tohi he tau matafakatufono ke lagomatai e tau tagata fakamatala ne kua o ke he hopoaga ha ko e levekiaga he tama mo e ha kua totoko mai ke he lotu ha tautolu. Ko e kau he tau motua ni hokoia kua lata ke ole ke he afi tohi nei kaeke kua putoia moli e taofiaga fakalotu he tagata fakailoa. Kia lautolu ne fehagai mo e tau mena fakalalolagi ke he levekiaga he tama po kua totoko e ahiahiaga, haia e tau vala tala lagomatai i loto he Awake! ia Tesemo 8, 1997, lau 3-12; he Awake! ia Oketopa 22, 1988, lau 2-14; mo e he puha ne moua he Awake! ia Aperila 22, 1991, lau 9.

◼ Mai ia Tesemo 1, 2001 ne hiki he Kau Fakatufono e takitakiaga ha Samoa ke he la matapatu ha Ausetalia. Ko e fonua ha Tonga, (putoia ai fa e fakapotopotoaga, ko e ofisa fakaliliu mo e kaina misionare) ne ha ha i lalo he takitakiaga he la ha Samoa, kua hiki ke he la matapatu i Niu Silani. Pete ni he utakehe e matahigoa he la ofisa i Samoa ia Tesemo 1, 2001, to fakatumau ni e tau ofisa fakaliliu ke gahuahua i Samoa mo Tonga.

◼ Ia Fepuari 3, 2002 ne fakatu ai e fakapotopotoaga ke uaaki i Blenheim. Ko e fakapotopotoaga fakamua ne higoa Blenheim nukua liu fakahigoa Fakapotopotoaga Redwood mo e fakapotopotoaga fou ka ui ko e Fakapotopotoaga Springlands. Kua hokotia ainei e numera he tau fakapotopotoaga i Niu Silani ke 168, katoatoa ai 176 i lalo he la-matakavi ha tautolu.