Fakatata e Agaga Paionia
1. Fakamaama fefe e koe e agaga paionia?
1 Pete kua paionia po ke nakai paionia he mogonei, kua maeke oti e tau tagata fakamatala he Kautu ke fakatata e agaga paionia. Kua manamanatu lahi a lautolu ke he poaki ke fakamatala mo e taute tutaki. (Mata. 28:19, 20; Gahua 18:5) Kua manamanatu a lautolu ke he tau tagata ti taute e tau hikihikiaga ke fakakatoatoa ha lautolu a fekafekauaga. (Mata. 9:36; Gahua 20:24) Kua makai e tau fekafekau ha Iehova ke taute ha mena kua lata ke lagomatai e falu ke ako e kupu moli. (1 Kori. 9:19-23) Kia manamanatu la a tautolu ke he fakafifitakiaga he taha ne fakakite e agaga pihia, ko Filipo ko e evagelia.
2. Fakafifitaki fefe he tau motua mo e tau fekafekau lagomatai e makutu ha Filipo ma e fekafekauaga?
2 Fakamatala mo e Fakaako: Ne lalahi e tau gahua ha Filipo he leveki he fakapotopotoaga he senetenari fakamua. (Gahua 6:1-6) Ka e, ko e tagata kua mua e makutu hana he fakamatala e tala mitaki. (Gahua 8:40) Ti he vaha nei, he leveki ke he tau kotofaaga ha lautolu, ko e tau motua mo e tau fekafekau lagomatai kua maeke ke fakakite e agaga paionia he hakahakau he takitaki e fekafekauaga. Kua fakamalolo ha he mena nei e agaga he fakapotopotoaga!—Roma 12:11.
3. Maeke fefe ia tautolu ke fakakite e agaga paionia ka fehagai mo e tau kamatamata?
3 He mole e mate ha Setefano, ne matematekelea lahi e tau momoui he tau tutaki ha ko e favale. Ka e, ne matutaki a Filipo ke fakamatala, ti fakamatapatu e ia e hafagiaga he gahua ke he tau Samaria. (Gahua 8:1, 4-6, 12, 14-17) Maeke ia tautolu ke mumuitua ke he hana fakafifitakiaga he matutaki ke fakailoa e tala mitaki ka fehagai mo e tau kamatamata mo e fakamatala nakai fili tagata ki a lautolu oti ne feleveia mo tautolu.—Ioane 4:9.
4. Ko e heigoa e fakafifitakiaga ne fakatoka e Filipo ko e faiaoga?
4 Ko e makaka ha Filipo ko e faiaoga he Kupu he Atua kua maeke ke kitia he tala hagaao ke he liliuina he eunuka Aitiope. (Gahua 8:26-38) Ko e feaki e lotomatala ke fakaaoga e Tohi Tapu mo e ke ‘fakakakano mai he tau Tohiaga Tapu’ e taha puhala kua fakatata e tautolu e aga paionia. (Gahua 17:2, 3) Tuga a Filipo, kua kumi a tautolu ke fakamatala e tala mitaki ke he ha matakavi ka ha ha ai e tau tagata mo e he tau magaaho oti ka lata ai.
5. Ko e heigoa ka lagomatai e tau matua Kerisiano ke fakamalolo e agaga paionia ke he tau fanau ha lautolu?
5 Magafaoa mo e Fakapotopotoaga: Kua nakai fakauaua ko e mahani mo e fakafifitakiaga ha Filipo kua lauia mitaki ke he tau fanau fifine hana. (Gahua 21:9) Tatai ai, ko e tau mamatua Kerisiano ne fakave e tau momoui ha lautolu ke he tau mena he Kautu kua fakamalolo e tau fanau ha lautolu ke taute pihia. Pete kua mategugu he lavelave he vaha tapu, ko e matua ne fakamatala fakamakutu ke he falu kua maeke ke manatu tukulagi he tama.—Fakatai 22:6.
6. Fakakite fefe e tautolu e loto fakaaue ke he tau paionia he fakapotopotoaga ha tautolu?
6 Ne fakamokoi a Filipo ki a Paulo mo Luka, ko e tau Kerisiano makutu he gahua malolo he fekafekauaga ha Iehova. (Gahua 21:8, 10) Maeke fefe a tautolu ke fakakite e loto fakaaue mo e lagomatai a lautolu ne makutu he vaha nei? Liga ole a tautolu ke gahua mo e tau paionia he magaaho pogipogi po ke magaaho afiafi he aho ka gahoa ka o atu he fekafekauaga. (Filipi 2:4) Maeke foki ia tautolu ke uiina a lautolu ke he tau kaina ha tautolu ma e lafiaga atihake. Ko e heigoa ni ha tautolu a tau tutuaga, kia lali a tautolu oti ke fakatata e agaga paionia.