Puha Huhu
◼ Fefe e puhala kua lata ia tautolu ke leveki aki e tau matagahua he fakapotopotoaga?
Ko e gahuahuaaga maopoopo he fakapotopotoaga he tau tagata ha Iehova ko e fua he laliaga kaufakalataha. (1 Kori. 14:33, 40) Manamanatu ke he mena kua putoia ki ai he taha ni e feleveiaaga fakapotopotoaga. Ke lafi ke he fakaholoaga hokoia, ne loga e tau mena kua fakafita ki ai ato kamata mo e ka hili e feleveiaaga he taute he tau matakainaga e tau matagahua kehekehe. Ko e tau matagahua ne taute nakai kitia he tau tagata kua aoga foki. Maeke fefe ia tautolu takitokotaha ke lagomatai ke he fakaholoaga nei?
Fakaata e koe a koe. To logona e lautolu ne ha ha e agaga fakamakai kua loga lahi e tau mena ke taute. (Sala. 110:3) Fakakite e manamanatu ki a lautolu ne gagao mo e momotua. Lagomatai e fakameaaga he Fale he Kautu. Maeke ia tautolu ke loga e tau gahua mitaki ka taute ka e nakai uiina pauaki. Kua lata ia tautolu ke manako ke lagomatai.
Fekafekau fakalatalata. Kua fiafia e tau tagata mahani fakalatalata ke fekafekau ke he falu. (Luka 9:48) Ko e mahani fakalatalata ka puipui mai a tautolu he talia ke loga e matagahua ke he mena kua fahia moli a tautolu ke taute. Fakalahi atu, ko e mahani fakalatalata ka fakakaupa e fakaaogaaga he pule ha tautolu.—Fakatai 11:2.
Kia fakamoli. Ne fakamalolo ki a Mose ke fifili e tau “tagata fakamoli” ke taute e tau kotofaaga he tau matagahua i Isaraela i tuai. (Esoto 18:21) Kua lata foki e aga pihia he vaha nei. Kia fakamakutu he taute e matagahua hau kua moua. (Luka 16:10) Ka nakai maeke ia koe ke taute e matagahua hau, kia mataala ke taute e tau fakatokatokaaga kua lata ke taute he taha tagata ka nakai fina atu a koe.
Foaki katoatoa e koe. Ne tomatoma ke he tau Kerisiano ke gahua solu katoatoa pihia foki ke he tau gahua fakatupe ha lautolu. (Kolo. 3:22-24) Kua lahi atu e kakano he gahua ke fakatolomaki e tapuakiaga moli. Pete he tuga kua fakateaga po ke tote, ko e fakamonuinaaga ke he fakapotopotoaga ka taute fakamitaki ai.
Kua igatia e tau matagahua mo e foaki ki a tautolu e magaaho ke fakakite e fakaalofa ha tautolu ma Iehova mo e tau matakainaga. (Mata. 22:37-39) Kia taute tua fakamoli e tautolu e ha gahua kua tuku mai ki a tautolu.