Ko e Fakamooliaga he Tua!
1. Ko e heigoa e tau mena hagahaga kelea ka tutupu ne talahau tuai e Iesu?
1 Ne fanogonogo fakamatafeiga e tau aposetolo he tutala a Iesu ke he haana ha ha hinei mo e fakaotiaga he fakatokaaga he tau mena he lalolagi nei. To lauia e tau tagata ke he tau mena tutupu matematekelea—tau latau, tau hoge, tau mafuike, tau tatalu. Ne holo atu a Iesu ke pehē to vihiatia foki, to tuku atu ke he matematekelea, mo e kelipopo e tau tutaki haana. To tutū mai e tau perofeta pikopiko mo e fakahehē e tokologa. To momoko foki e fakaalofa he tokologa.
2. Ko e ha ne ofoofogia ai he fakamatala e tala mitaki ke he lalolagi katoa?
2 He hagaao ke he tau mena ia, ne liga ofomate e tau tutaki he magaaho ne pehē ko e tala mitaki he Kautu he Atua to fakamatala atu ke he lalolagi oti. (Mata. 24:3-14) He vahā nei kua kitia e tautolu e fakamooliaga ofoofogia he perofetaaga ia. Pete kua nonofo a tautolu he tau magaaho hagahagakelea lahi, kua fakamakutu e Tau Fakamoli a Iehova ke fakapuloa e tala mitaki. He momoko fakahaga e fakaalofa he lalolagi, ko e fakaalofa ha tautolu kua holo ki mua e maama. Pete he vihiatia he “tau motu oti,” kua teitei ni a tautolu ke fakamatala he tau motu oti.
3. Ko e heigoa e tau numera mafanatia kua kitia e koe mai he hokotaki he lalolagi katoa?
3 Ko e mafanatia ha ia ke kitekite ke he gahua he Tau Fakamoli a Iehova he tau he fekafekauaga kua mole ne fakakite mai he lau 3 ke he 6! Ko e tau ke 16 aki anei ne kua molea e taha e piliona tulā ne fakaaoga ke he gahua fakamatala mo e taute tutaki. Ko e fakamooliaga ha ia he tua! Ne ha ha ai e tau malikiti ke he 5.8 e pasene he numera he tau paionia, 3.1 e pasene he tau tagata fakailoa, mo e 4.4 e pasene he tau fakaakoaga Tohi Tapu. Ne hokotia e numera ne papatiso ke he 20.1 e pasene he tau he fekafekauaga kua mole. Kua olioli ha ia he kitia kua teitei fitu e miliona he tau tagata hane fekafekau tua fakamooli ki a Iehova—mua atu e tokologa mogonei ka fakatatai ke he ha magahala he fakamauaga tuai he tagata! He kumikumi a koe ke he fakafonua, ko e heigoa haau ne kitia ne mua atu e atihake ki a koe?
4. Ko e heigoa e tau lekua ne kautū e taha tagata ki ai he gahua a ia ke hokotia ke he papatisoaga?
4 Pete kua loga mooli e numera, kua lata ia tautolu ke nakai nimo ko e tau numera ia kua hukui e tau tagata ne kua fakamooli ke he tua ha lautolu. Manamanatu ke he fakafifitakiaga. Ko Guillermo ne tupu hake i Polivia. Fanau he 1935, ne gahua he ulu koko tali mai he hiva e tau tau he moui. Tali mai he vahā tama haana ne gau e ia e tau lau koko ke fakatotoka aki e mamahi he tino he taute he tau gahua mamafa. Ne fakaaoga fakahehē e ia kava mo e ula tapaka he magaaho fakamui. He kamata a ia ke ako hagaao ke he manako ha Iehova ke lata mo ia, ne oti e ula ha Guillermo ka mole ia ti oti foki e fakaaoga fakahehē he kava. Ko e paleko lahi mahaki ke tiaki ko e matafeua haana ne kua leva ko e gau he tau lau koko. Ne liogi nakai noa a ia ti kautū ke tiaki e aga nei. He tuku e tau lekua haana ki tua, ne papatiso a ia. “Mogonei,” he talahau e ia, “kua logona e au e meā mo e fiafia lahi.”
5. Ko e heigoa e manako haau?
5 Ne fiafia mooli a Iehova ke he tau tagata. Ko e manako haana ke hohoko oti kana ke he tokihala. (2 Pete. 3:9) Pihia foki e manako ha tautolu. Kia omoi he tau loto ha tautolu a tautolu ke taute e tau mena oti kua fahia ia tautolu ke fakatumau ke lagomatai a lautolu kua loto mooli ke iloa mo e fakaalofa ki a Iehova tuga kua taute e tautolu.