Fifitaki ke he Tau Perofeta—Nahuma
1. Ko e heigoa ha tautolu ne fakaako mai he tohi ha Nahuma?
1 Kua fakakite he tau mena ne malona i Nineva i tuai e fakamooliaga he perofetaaga ha Nahuma, ne ita lahi a Iehova ke he tau fī Haana ti nakai maeke foki e tau fī ne mua atu e favale ke tutū atu ki a Ia. (Nahu. 1:2, 6) Ko e onoono fakatata ke he perofetaaga ha Nahuma ka foaki mai e tau fakaakoaga ma tautolu ma e fekafekauaga ha tautolu.
2. Taute fēfē e tautolu e fekau ha tautolu ke tumau e atihake?
2 Foaki e Mafanatia mo e Amaamanakiaga: He onoono fakamua ki ai, ko e tohi ha Nahuma kua tuga ni ko e fakailoaaga he matematekelea ki a Nineva, ko e maaga lahi mo e fakatokoluga ha Asuria i tuai. (Nahu. 1:1; 3:7) Ka ko e fakailoaaga nei ko e tala mitaki ke he tau tagata ha Iehova. Ko Nahuma, ko e higoa haana ne kakano “Fakamafana,” ne tala age ke he tau matakainaga Iutaia ko e fī ha lautolu to nakai leva ti moumou! Ne fakamooli foki e Nahuma ko Iehova “ko e taue a ia ke he aho matematekelea.” (Nahu. 1:7) He fakamatala a tautolu, kua tala age foki e tautolu e tala mitaki mo e fakamafana e falu ke eke a Iehova mo taue ha lautolu.—Nahu. 1:15.
3. Mumuitua fēfē a tautolu ki a Nahuma he fakaaoga e tau fakafifitakiaga po ke tau fakataiaga?
3 Fakaaoga e Tau Fakafifitakiaga mo e Tau Fakataiaga: Ne omoomoi e Iehova a Nahuma ke fakatatai e fakaotiaga ha Nineva mo e maaga Aikupito ko Thebes (No-Amoni), ne moumou ni e Asuria he mogo fakamua. (Nahu. 3:8-10) He tutala a tautolu ke he tau tagata hagaao ke he fakaotiaga he fakatokaaga kelea nei, maeke ia tautolu ke fakamaama e tau perofetaaga he Tohi Tapu ne fakakite na fakamooli katoatoa e Iehova e kupu haana. Ma e fakatai, he mogo ne totoko he tau Papelonia mo e tau Metai e maaga ko Nineva he 632 F.V.N., ne tō lahi mahaki e uha ti lofia e Vailele ko Hitekelu, ti malolo e taha vala he tau kaupā he maaga ne maunivaniva. Ti mukamuka ke fofō a Nineva, tuga ni ne talahau tuai e Iehova.—Nahu. 1:8; 2:6.
4. Maeke fēfē ia tautolu ke fakamaaliali mo e maama he gahua he fonua?
4 Kia Fakamaaliali mo e Maama: Ko e puhala tohitohi ha Nahuma kua fakamaama mo e ko e tala. Ne maaliali e tau manatu haana. (Nahu. 1:14; 3:1) Pihia foki, manako a tautolu ke fakaaoga e puhala vagahau ne mukamuka ke maama. (1 Kori. 14:9) He aahi atu fakamua, fakamaama fakamaaliali e kakano he aahi atu haau. He fakaako Tohi Tapu a koe mo e tau tagata, lagomatai a lautolu ke feaki e tua ki a Iehova mo e haana Kupu ti loto fakaaue ke he puhala kua aoga e vala tala ki a lautolu fakatagata.—Roma 10:14.
5. Ko e heigoa e fakamafanaaga ne moua e tautolu he perofetaaga ha Nahuma?
5 Ko e tua ha Nahuma ke he fakamooliaga katoatoa he kupu ha Iehova kua kitia maaliali he tohi he Tohi Tapu ne tū ai e higoa haana. He tata mai e fakaotiaga he fakatokaaga ha Satani, kua mafanatia a tautolu ke he poakiaga he Atua: “Nakai tupu mai lagaua e matematekelea.”—Nahu. 1:9.