Kamata e Atua ke Tufuga e Tau Mena

KO E tau mena mitaki oti ha tautolu mai he Atua ia. Ne tufuga e ia e laā ke foaki mai ki a tautolu e maama he aho, mo e mahina mo e tau fetu ke moua e tautolu e maama he po. Ti tufuga he Atua e lalolagi ke nonofo ai a tautolu.

Ka ko e laā, ko e mahina, ko e tau fetu mo e lalolagi nakai ko e tau mena fakamua ne tufuga he Atua. Iloa nakai e koe ko e heigoa e mena fakamua? Ne tufuga fakamua e ia e tau mena momoui fakaagaaga tuga ni a ia. Nakai kitia e tautolu e tau mena fakaagaaga nei tuga ne nakai kitia e tautolu e Atua. I loto he Tohi Tapu ko e tau mena fakaagaaga nei kua fakahigoa ko e tau agelu. Ne tufuga he Atua e tau agelu ke nonofo fakalataha mo ia he lagi.

Ko e agelu fakamua he Atua ne tufuga, kua uho lahi mahaki. Ko ia ko e Tama uluaki he Atua, ti gahua a ia mo e haana Matua. Ne lagomatai e ia e Atua ke tufuga e tau mena oti kana. Ne lagomatai e ia e Atua ke tufuga e laā, mahina, tau fetu mo e lalolagi ha tautolu.

Kua fēfē la e lalolagi he magaaho ia? Mai he kamataaga nakai maeke ha tagata ke nofo he lalolagi. Kua nakai fai mena ka ko e vai puke lahi ni he fuga kelekele. Ka ko e manako he Atua ke nonofo e tau tagata he lalolagi. Ti kamata agataha a ia ke tauteute e tau mena ke lata mo tautolu. Ko e heigoa ne taute e ia?

E, fakamua kua lata ke fai maama e lalolagi. Ti taute he Atua e maama mai he laā ke kikila hifo ke he lalolagi. Kua tufuga e ia ke maeke ke moua e pouli he pō mo e maama he aho. He magaaho fakamui kua maeke he Atua ke omoi e kelekele ke hake mai ki luga he vai lahi.

He kamataaga nakai fai mena he fuga kelekele. Kua tuga ni e fakatino nei ne kitia e koe. Nakai ha ha i ai ha fiti lakau po ke tau akau po ke tau manu. Ti nakai fai ika foki he moana. Kua lahi mahaki e gahua he Atua ke taute ke he lalolagi ke nonofo ai e tau manu mo e tau tagata.