Ko e Tagata Taane mo e Fifine Fakamua

KO E heigoa kua kehe he fakatino nei? E, ko e tau tagata ne ha ha i ai. Ko laua ko e tagata taane mo e fifine fakamua. Ko hai ne tufuga a laua? Ko e Atua. Iloa nakai e koe haana higoa? Ko Iehova. Ti maeke ke fakahigoa ai e tagata taane mo e fifine ko Atamu mo Eva.

Hanei e puhala ne tufuga he Atua a Atamu. Kua tamai e ia e efuefu he kelekele ti tufuga aki e tino mitaki katoatoa, ko e tino he tagata taane. Ti fafagu a ia ke he tau pokoihu he tagata taane, ti moui ai a Atamu.

Fai gahua a Iehova ko e Atua ma Atamu. Kua tala age a ia ki a Atamu ke fakahigoa e tau vahega manu kehekehe oti. Liga kua leva e onoono a Atamu ke he tau manu ke maeke ia ia ke fifili e tau higoa mitaki ma lautolu oti. He magaaho ne fakahigoa e Atamu e tau manu kua fai mena a ia ne kamata ke kitia. Iloa nakai e koe ko e heigoa e mena ia?

Kua fai hoa e tau manu oti. Ha ha i ai e tau elefane taane mo e tau elefane fifine, mo e tau leona taane mo e tau leona fifine. Ka e ai fai a Atamu ke eke mo hoa haana. Ti fakapulumohea ai e Iehova a Atamu, mo e uta e ia e hui kahokaho mai he faahi haana. He fakaaoga e hui kahokaho nei, ne tufuga e Iehova e fifine ma Atamu ti eke a ia mo hoana haana.

Ko e fiafia lahi ha ia ha Atamu he magaaho nei! Ti manamanatu la ke he fiafia ha Eva ha kua tuku a ia ke he katene fulufuluola pihia ke nofo ai! Kua maeke a laua he magaaho nei ke fanafanau mo e fiafia he nonofo auloa.

Manako a Iehova ke moui tukulagi a Atamu mo Eva. Manako a ia ke taute e laua e lalolagi katoa ke fuluola tuga e katene i Etena. Ko e fiafia ha ia ha Atamu mo Eva he manatu a laua ke taute e mena nei! Manako nakai a koe ke fai vala ke taute e lalolagi mo katene fuluola? Ka ko e fiafia ha Atamu mo Eva kua nakai tumau tukulagi. O mai la ke kumikumi ko e ha.