Kamatamata he Atua e Tua ha Aperahamo

KITIA nakai e koe ko e heigoa ha Aperahamo ne fa e taute he na ē? Taha e titipi haana, ti tuga ko e tamate fai e ia e tama taane haana. Ko e ha la ne taute e ia e mena ia? Fakamua, o mai la ke kitekite ko e moua fēfē e Aperahamo mo Sara e tama ha laua.

Manatu, na mavehe e Atua ki a laua to fai tama a laua. Ka e tuga kua nakai maeke e mena ia, ha kua fuakau lahi a Aperahamo mo Sara. Ka kua talitonu a Aperahamo to maeke he Atua ke taute e mena ne tuga kua nakai maeke. Ti ko e heigoa ne tupu?

Kua taha tuai e tau he mole tali mai he taute he Atua e maveheaga haana. Ti magaaho ne 100 e tau ha Aperahamo mo e 90 e tau ha Sara, ne taha e tama mukemuke taane ha laua ne higoa ko Isaako. Kua fakamooli he Atua e maveheaga haana!

Ka e he magaaho ne lahi hake a Isaako ne kamatamata he Atua e tua ha Aperahamo. Ne ui a ia: ‘Aperahamo!’ Ne tali a Aperahamo: ‘Ko au hanai!’ Ti pehē e Atua: ‘Kia ta atu e koe e haau a tama, haau a tama fuataha, ko Isaako, ti o atu ke he mouga ka fakakite atu e au ki a koe. He matakavi ia, kia tamate e koe haau a tama ti foaki a ia mo poa.’

Ko e momoko ha ia ha Aperahamo ha ko e tau kupu ia, ha ko e mena fakaalofa hofihofi a Aperahamo ke he tama haana. Manatu, na mavehe e Atua ke nonofo e tau fanau ha Aperahamo he motu ko Kanana. Ka to maeke fēfē e mena ia kaeke kua mate a Isaako? Ne nakai maama e Aperahamo, ka e omaoma ni a ia ke he Atua.

Magaaho ne hoko a ia ke he mouga, ne līlī e Aperahamo a Isaako ti tuku a ia i luga he fatapoa ne ati e ia. Ti totō mai e ia e titipi ke tamate aki e tama haana. Ka e he magaaho ia ni ne ui mai e agelu he Atua: ‘Aperahamo, Aperahamo na e!’ Ti tali atu a Aperahamo: ‘Ko au hanai!’

‘Aua ia neke keli e koe e tama po ke taute ha mena ki a ia,’ he tala age he Atua. ‘Kua iloa tuai e au he mogonei kua tua a koe ki a au, ha kua nakai lamakai e koe haau a tama fuataha, mai ia au.’

Ko e lahi ha ia he tua ha Aperahamo ke he Atua! Ne talitonu a ia to maeke e tau mena oti ki a Iehova, ti maeke foki a Iehova ke fakaliu tu mai a Isaako he mate. Ka e nakai ko e finagalo mooli he Atua ke tamate e Aperahamo a Isaako. Ti fakatupu he Atua e mamoe ke vihi he ulu vao ne tata mai, ti tala age a ia ki a Aperahamo ke taute ai mo poa ka e toka e tama haana.