Ko e Akau kua Puho

KUA hoko atu a Mose ke he mouga ko Horepa ke kumi motie ma e tau mamoe haana. He mena nei ne kitia e ia e akau kua vela he afi, ka e nakai otioti ai!

‘Kehe ai pihia e mena nei,’ he manatu e Mose. ‘To aafe atu au ke kitekite fakamitaki ki ai.’ Magaaho ne aafe atu a ia, ne ui mai e leo i loto he akau, pehē: ‘Aua neke fakatata mai. Kia vevete haau a tau afialoalohui, ha kua tu a koe he kelekele tapu.’ Ko e Atua kua vagahau puhala mai he agelu, ti ufiufi ai e Mose e mata haana.

Ne pehē mogoia e Atua: ‘Kua kitekite ni au ke he matematekelea he haku motu ha ha i Aikupito. Ko e laveaki hane fai e au a lautolu, ti ko koe ka fakafano atu e au ke uta e koe haku motu mai i Aikupito.’ Ko e tamai hane fai e Iehova e motu haana ke he motu fulufuluola ko Kanana.

Ka kua pehē a Mose: ‘Nakai ko e tagata talahaua au. Maeke fēfē ia au ke taute e mena nei? Ka e, kaeke ke fano au. To hūhū mai e tau Isaraela ki a au, “Ko hai ne fakafano mai a koe?” Ti ko e heigoa haaku ka talahau?’

‘Hanei e mena haau ka talahau,’ he tali he Atua. ‘“Ko IEHOVA, ko e Atua a Aperahamo, ko e Atua a Isaako, mo e Atua a Iakopo, ko ia ni ne fakafano mai au kia mutolu.”’ Ti lafi e Iehova: ‘Ko e haku higoa tukulagi haia.’

‘Ka e kua ka nakai talia e lautolu au ka talahau e au ko e mena fakafano age e koe au,’ he tali e Mose.

‘Ko e heigoa e mena na he lima haau?’ he hūhū he Atua.

Ne tali a Mose: ‘Ko e tokotoko.’

‘Ati liti a ke he kelekele,’ he talahau he Atua. Ti ko e magaaho ne liti ai e Mose, ne faliu gata e tokotoko. Ne fakakite age foki e Iehova ki a Mose e taha mana. Pehē a ia: ‘Kia tuku haau a lima ke he haau a fatafata.’ Ne taute pihia e Mose, ti ko e magaaho ne liuaki mai e ia e lima haana ki fafo, kua hina tuga e kiona! Ne tuga kua lauia e lima he gagao kelea ne fakahigoa ko e lepela. Ne liu a Iehova age e malolō ki a Mose ke taute e mana ke toluaki. Fakahiku ai ne pehē a ia: ‘Ka taute e koe e tau mena nei to talia he tau Isaraela ko au ne fakafano atu a koe.’

Ne mole e mena ia, ti fano a Mose ki kaina ti tala age ki a Ieteru: ‘Kia fakatoka la au ke liu atu ke he haaku tau matakainaga i Aikupito ke fakakia kua fēfē a lautolu.’ Ti mavehe a Ieteru ki a Mose, ati kamata e fenoga ha Mose ke liu ki Aikupito.