Kitia e Mose mo Arona a Farao

MAGAAHO ne liu atu a Mose ki Aikupito, ne tala age e ia e tau mena oti ke he matakainaga haana ko Arona hagaao ke he tau mana. He magaaho ne fakakite e Mose mo Arona e tau mana nei ke he tau Isaraela, ne talitonu e tau tagata oti kua fakalataha a Iehova mo lautolu.

Ti ō a Mose mo Arona ke kitia a Farao. Ne tala age a laua ki a ia: ‘Pehe mai e vagahau a Iehova ko e Atua a Isaraela, “Kia toka e koe haku motu ke ō ke tolu e aho, ke tapuaki a lautolu ki a au he tutakale.”’ Ka e tali atu a Farao: ‘Nakai talitonu au ki a Iehova. Ti nakai toka e au a Isaraela ke ō.’

Ne ita lahi a Farao, ha kua manako e tau tagata ke okioki mai he tau gahua ke tapuaki ki a Iehova. Ti fakaohooho e ia a lautolu ke gahua fakalahi. Ne tukupau he tau Isaraela a Mose ha kua nakai leveki fakamitaki atu ki a lautolu, ti momoko a Mose. Ka e tala age a Iehova ki a ia ke ua tupetupe. ‘To taute e au a Farao ke fakatoka haaku motu ke ō,’ he talahau e Iehova.

Kua liliu atu a Mose mo Arona ke kitia a Farao. Magaaho nei kua taute e laua e mana. Ne liti hifo e Arona haana tokotoko, ti faliu ai mo gata lahi. Ka ko e tau tagata iloilo ha Farao kua tolo hifo foki ha lautolu a tau tokotoko, ti kua faliu gata. Ka e kitiala! Ne folofua he gata ha Arona e tau gata he tau tagata iloilo. Ka e nakai ni mafai a Farao ke fakatoka e tau Isaraela ke ō.

Kua hoko mai e magaaho ke fakaako age e Iehova taha fakaakoaga ki a Farao. Iloa nakai e koe ko e taute fēfē e ia? He fakahoko ai 10 e malaia, po ke tau matematekelea lalahi, ki Aikupito.

He mole e oti he tau malaia loga, ne ui atu a Farao ke hau a Mose, mo e pehe: ‘Kia fakaoti e malaia, ti fakatoka e au e fanau Isaraela ke ō.’ Ka ko e magaaho ne oti ai e malaia, ne hiki e manatu ha Farao. Ne nakai fakatoka e ia e tau tagata ke ō.. Ka e fakahiku ai, he oti e malaia ke 10 aki, ne fakatoka e Farao e fanau Isaraela ke o kehe.

Iloa nakai e koe e tau malaia 10 ia? Fufuke e lau tohi ti o mai ke fakaako hagaao ki ai.