Tā e Mose e Maka

LOGA e tau tau he mole​—10 e tau, 20 e tau, 30 e tau, 39 e tau! Ti haia agaia e tau Isaraela he tutakale. Ke he tau tau oti ia ne leveki e Iehova e tau tagata haana. Fagai e ia a lautolu aki e manai. Takitaki e ia a lautolu he aho ke he aolagi fakatupou, mo e afi fakatupou ke he pō. He tau tau oti nei ne nakai popo ha lautolu a tau tapulu mo e nakai mamahi e tau aloalohui ha lautolu.

Ko e mahina fakamua anei he tau ke 40 aki tali he o mai i Aikupito. Ne liu foki e tau Isaraela heapi i Katesa. Ko e matakavi a nei ne fakafano atu toko 12 e tagata toko ke kitekite ke he motu ko Kanana he teitei 40 e tau fakamua atu. Na mate e mahakitaga ha Mose i Katesa. Ti tuga ni he magaaho fakamua, kua fai lekua i ai.

Ne nakai moua he tau tagata ha vai. Ti gugū a lautolu ki a Mose: ‘Na mitaki ane mai mamate a mautolu. Ko e ha ne tamai e koe a mautolu i Aikupito ke he matakavi kelea muitui nei ne nakai momoui ai ha mena? Nakai fai fua saito, nakai fai fua vine, nakai fai rimoni. Ti nakai fai vai foki ke inu.’

Magaaho ne o atu a Mose mo Arona ke he faituga ke liogi, ne tala age a Iehova: ‘Fakapotopoto mai e tau tagata. Ti vagahau ke he maka i kunā ki mua ha lautolu oti. To lahi e vai ka tafe mai i ai ke lata mo e tau tagata mo e tau manu oti ha lautolu.’

Ti fakapotopoto mai e Mose e tau tagata, ti pehē: ‘Fanogonogo mai a, ko mutolu ne nakai falanaki ke he Atua! Lata kia a Arona mo au ke fakatafe mai e vai he maka nei ma mutolu?’ Ti tā lagaua e Mose e maka aki e tokotoko, ti tafe lahi mai ai e vai he maka. Kua lahi e vai ke inu e tau tagata oti mo e tau manu oti.

Ka kua ita a Iehova ki a Mose mo Arona. Iloa nakai e koe ko e ha? Kakano ha kua pehē a Mose mo Arona ko laua ka tamai e vai mai he maka. Ka e ko Iehova ne tamai ai. Ha kua nakai talahau e Mose mo Arona e tala mooli hagaao ke he mena nei, ne pehē a Iehova to fakahala e ia a laua. ‘To nakai takitaki e mua e tau tagata haaku ki Kanana,’ he talahau e ia.

Nakai leva ti o kehe e tau Isaraela mai i Katesa. Magaaho ku ni ti hohoko atu a lautolu ke he Mouga ko Horo. I luga he mouga nei, ne mate ai a Arona. Ne 123 e tau tau moui haana he magaaho ne mate a ia. Kua momoko lahi e tau Isaraela, ti 30 e aho ne tagi ai e tau tagata oti ha ko Arona. Ne eke e tama taane haana ko Eleasaro mo ekepoa ne mua ke he motu ko Isaraela.