Ko e Tau Kaupā ha Ierusalema

ONOONO la ke he tau gahua kua taute he mogonei. Kua lavelave e tau Isaraela he atihake he tau kaupā i Ierusalema. He mogo ne moumou he Patuiki ko Nepukanesa a Ierusalema he 152 e tau fakamua atu, ne moumou e ia e tau kaupā mo e tugi e tau gutuhala he maaga. Ne nakai atihake he tau Isaraela e tau kaupā he magaaho fakamua ne hohoko a lautolu ki kaina he o mai i Papelonia.

Fēfē e logonaaga he tau tagata ne nonofo i ai he manatu e koe he tau tau oti ia ne nakai fai kaupā ne pātakai aki e maaga ha lautolu? Ne nakai logona e lautolu e haohao mitaki. Na mukamuka lahi e tau fī ha lautolu ke o mai mo e keli a lautolu. Pete ni he leva, ko e tagata nā ko Nehemia kua lagomatai e tau tagata he mogonei ke liu atihake e tau kaupā. Iloa nakai e koe ko hai a Nehemia?

Ko Nehemia ko e tagata Isaraela ne hau he maaga ko Susana, ko e maaga ne nonofo ai a Moretikai mo Eseta. Ne gahua a Nehemia he fale he patuiki, ti liga ko e kapitiga mitaki a ia mo Moretikai mo e Patuiki Fifine ko Eseta. Ka kua nakai talahau he Tohi Tapu na gahua a Nehemia ma e taane ha Eseta ko e Patuiki ko Ahasueru. Ne gahua a ia ma e patuiki ne tatao hake, ko e Patuiki ko Aretaseta.

Manatu ko Aretaseta ko e patuiki mitaki ne age e tau tupe ki a Esera ke liuaki ki Ierusalema mo fakafoou e faituga ha Iehova. Ka e nakai ta e Esera e tau kaupā ne malona he maaga. O mai la ke kitia kua hau fēfē a Nehemia ke taute e gahua nei.

Kua 13 tuai e tau tali mai he age e Aretaseta ki a Esera e tau tupe ke fakafoou e faituga. Ko Nehemia ko e fekafekau ne mua he taute uaina he Patuiki ko Aretaseta. Kakano e mena nei ko ia ka ta atu e uaina ke he patuiki, mo e mataala kua nakai fai tagata ka lali ke fakakona e patuiki. Ko e gahua aoga lahi.

He taha aho ne hau e matakainaga ha Nehemia ko Hanani mo e falu tagata mai he motu ko Isaraela ke ahiahi ki a Nehemia. Ne tala age e lautolu ki a ia e tau lekua ne lauia e tau Isaraela, mo e kua malona agaia e tau kaupā ha Ierusalema. Ne momoko lahi a Nehemia ha ko e mena nei, ti liogi a ia ki a Iehova hagaao ki ai.

He taha aho ne mailoga he patuiki kua mata momoko a Nehemia ti hūhū a ia: ‘Ko e ha kua mata momoko ai a koe?’ Ne tala age e Nehemia ki a ia e kakano ha kua kelea lahi e tuaga ha Ierusalema ti kua malona e tau kaupā. ‘Ko e heigoa kia e mena kua manako a koe ki ai?’ he hūhū he patuiki.

‘Kia toka au ke fano ki Ierusalema,’ he ui e Nehemia, ‘ke maeke ia au ke liu atihake e tau kaupā.’ Ne totonu lahi e Patuiki ko Aretaseta. Ti pehē a ia kua maeke a Nehemia ke fano, ti lagomatai e ia ke moua e tau akau ke lata mo e falu gahua tālaga. He nakai leva e hoko a Nehemia ki Ierusalema, ne tala age e ia ke he tau tagata e tau manatu haana. Ne fiafia a lautolu ke he manatu, ti pehē: ‘O mai ke kamata tālaga.’

Magaaho ne kitia he tau fī he tau Isaraela e kaupā hane hake, ne pehē a lautolu: ‘To o hake a tautolu ke tamate a lautolu, mo e taofi e gahua tālaga.’ Ka kua logona e Nehemia e mena nei, ti age e ia ke he tau tagata gahua e tau pelu mo e tau tao. Ti pehē a ia: ‘Ua matakutaku ke he tau fī ha tautolu. Tau atu ma e ha mutolu a tau matakainaga, ha mutolu a tau fanau, ha mutolu a tau hoana, mo e ha mutolu a tau kaina.’

Ne loto malolō lahi e tau tagata. Kua mautali e tau kanavaakau ha lautolu he aho mo e pō, mo e matutaki a lautolu ke he gahua tālaga. Ne 52 ni e aho ti mau e tau kaupā. Kua maeke e tau tagata mogonei ke logona hifo e haohao mitaki i loto he maaga. Ne fakaako e Nehemia mo Esera e tau tagata ke he fakatufono he Atua, ti fiafia e tau tagata.

Ka e nakaila tatai ia e tau mena ke tuga he magaaho fakamua to uta fakapagotā e tau Isaraela ki Papelonia. Ne pule e patuiki Peresia ke he tau tagata ti kua lata ia lautolu ke fekafekau ki a ia. Ka kua mavehe a Iehova to tamai e ia e patuiki foou, ti ko e patuiki ia ka tamai e mafola ke he tau tagata. Ko hai e patuiki nei? Maeke fēfē a ia ke tamai e mafola ke he lalolagi? Kavi ke he 450 e tau tau he mole to liu fakaako foki ke he mena nei. Ti ha ha i ai e fanauaga ne mua atu e aoga he tama mukemuke. Ka ko e taha tala foki a ia.