Puhala ne Fakaako e Iesu

TAHA aho ne tala age a Iesu ke he tagata taane kua lata a ia ke fakaalofa ke he katofia haana. Ne hūhū e tagata ia ki a Iesu: ‘Ko hai e katofia haaku?’ Iloa e Iesu e mena kua manamanatu e tagata nei ki ai. Manatu e tagata ia ko lautolu ni hokoia ne katofia mo ia ko e tau tagata he lanu haana mo e lotu haana. O mai la ke kitia e mena ne tala age e Iesu ki a ia.

Falu magaaho ne fakaako a Iesu he talahau e tala. Ti hanei e mena ne taute e ia mogonei. Ne talahau e ia e tala hagaao ke he tagata Iutaia mo e Samaria. Kua fitā e iloa e tautolu na tokologa e tau Iutaia kua nakai fiafia ke he tau Samaria. Ti hanei e tala ha Iesu:

He taha aho ne hifo mai e tagata Iutaia he puhalatū he mouga ki Ieriko. Ka e ne ekefakakelea he tau tagata kaihā a ia. Ne uta e lautolu e tupe haana mo e keli a ia ti teitei ke mate.

Fakamui, ne hau e ekepoa Iutaia he puhalatū. Ne kitia e ia e tagata ne keli he faoa. Ko e heigoa e mena haana ne taute he manatu e koe? Ne fina atu ni a ia ke he taha faahi he puhalatū ti matutaki e fenoga. Ti hau foki e taha tagata ne makutu lahi ke he lotu. Ko ia ko e Levi. Tū nakai a ia? Nakai, ne ai tū foki a ia ke lagomatai e tagata ne keli he faoa. Kitia e koe e ekepoa mo e Levi haia i kunā hane o hifo he puhalatū.

Ka e onoono la ko hai hinei mo e tagata ne keli he faoa. Ko ia ko e tagata Samaria. Ti kua lagomatai e ia e tagata Iutaia. Kua tuku e ia e vai ke tului aki e tau pakia haana. Ka mole ia, ne ta atu e ia e tagata Iutaia ke he fale ke okioki a ia mo e liu malolō.

He oti e tala haana, ne tala age a Iesu ke he tagata ne hūhū ki a ia: ‘Ko hai ia lautolu tokotolu na he manatu e koe ne tuga e katofia ke he tagata ne keli he faoa? Ko e ekepoa kia, ko e Levi po ke Samaria?’

Ne tali e tagata: ‘Ko e tagata Samaria. Kua totonu a ia ke he tagata ne keli he faoa.’

Pehē a Iesu: ‘Kua hako a koe. Ti fano a mo e taute pihia ke he falu tuga ne taute he tagata na.’

Fiafia nakai a koe ke he puhala fakaako ha Iesu? Maeke ia tautolu ke iloa e loga lahi he tau mena aoga ka fanogonogo a tautolu ke he tau mena ne talahau e Iesu i loto he Tohi Tapu, pihia nakai?