I Luga he Mouga ko Olive

KO IESU anei i luga he Mouga ko Olive. Ko e tau tagata taane tokofā mo ia ko e tau aposetolo haana. Ko lautolu ko e lafu ko Aneterea mo Peteru, mo e lafu foki ko Iakopo mo Ioane. Ha i kunā e faituga he Atua i Ierusalema kua maeke a koe ke kitia.

Kua ua tuai e aho he mole tali mai he magaaho ne heke a Iesu he punua asini ke fina atu ki Ierusalema. Ko e Aho Ua anei. He kamataaga he aho ko Iesu haia he faituga. I ai ne lali e tau ekepoa ke tapaki a Iesu ke tamate a ia. Ka kua matakutaku a lautolu ke taute e mena nei ha kua fiafia e tau tagata ki a Iesu.

‘Ko mutolu ko e tau gata mo e fanau he tau gata!’ he ui aki e Iesu e tau takitaki lotu ia. Ti pehē a Iesu to fakahala he Atua a lautolu ha ko e tau mena kelea oti ne taute e lautolu. He mole e mena ia, ne fina atu a Iesu ke he Mouga ko Olive, ti kamata e tau aposetolo tokofā nei ke hūhū ki a ia. Iloa nakai e koe ko e heigoa ha lautolu kua hūhū ki a Iesu?

Kua hūhū e tau aposetolo hagaao ke he tau mena he vahā i mua. Iloa e lautolu to fakaotioti e Iesu e tau mena kelea oti kana he lalolagi. Ka kua fia iloa a lautolu he magaaho ka tutupu e tau mena nei. Liu mai he magaaho fe a Iesu ke pule ko e Patuiki?

Iloa e Iesu to nakai maeke e tau tutaki haana he lalolagi ke kitia a ia ka liu mai. Kakano to ha ha a ia he lagi, ti to nakai maeke a lautolu ke kitia a ia i ai. Ti tala age a Iesu ke he tau aposetolo haana e falu mena ka tutupu ke he lalolagi ka pule a ia ko e Patuiki i luga he lagi. Ko e heigoa e falu he tau mena nei?

Pehē a Iesu to ha ha e tau felakutaki lalahi, to tokologa e tagata ka gagao mo e hoge, to kelea lahi e mahani matahavala, mo e to ha ha i ai e tau mafuike lalahi. Pehē foki a Iesu ko e tala mitaki to fakamatala ke he tau faahi oti he lalolagi. Kua kitia nakai e tautolu e tau mena nei kua tutupu he vahā ha tautolu? E! Ti maeke ia tautolu ke iloa moolioli kua fitā a Iesu he pule mogonei i luga he lagi. Nakai leva to fakaoti e ia e tau mena kelea oti kana he lalolagi.