Veveheaga 15

Ko e Mana Fakamua ha Iesu

KO E taha po ke ua la ia e aho ha Aneterea, Peteru, Ioane, Filipo, Natanielu, liga foki ko Iakopo ne eke a lautolu mo tau tutaki fakamua ha Iesu. Ko lautolu ha ne fa e liliu ki kaina he maga i Kalilaia, ne tutupu mai ai a lautolu. Ko e maga ha lautolu a Kana, ko e maga ne nofo ai a Natanielu, he atu matiketike nakai mamao mo Nasareta, ne tupu hake ai a Iesu. Ne uiina a lautolu ke he taonaga he fakamauaga i Kana.

Ne fina atu foki e matua fifine ha Iesu ke he fakamauaga. Ha ko e kapitiga he magafaoa ka hoko ai e fakamauaga, ne tuga ko e putoia a Maria ke he tau fekafekauaga ke lata mo e tau uiina tokologa. Ko e mena haia ne mailoga mafiti e ia e mena ne ku, ti hokotaki e ia ki a Iesu: “Kua nakai fai uaina a lautolu.”

Kua tuga ko e tala age a Maria ki a Iesu ke taute e taha mena ke he uaina ne ku, ka e uka ia Iesu he magaaho fakamua. “Ko e heigoa kia hāu kia au?” he huhu e ia. Ha ko e Patuiki kotofa he Atua, nakai kua lata a ia ke fakatonu he magafaoa po ke tau kapitiga ke he hana tau gahua. Ko e mena ia ne fakalotomatala a Maria ke toka e tau mena ia ke he lima he hana tama, mo e vagahau noa atu ki a lautolu ne fekafekau: “Ko e hana ka tala mai ai kia mutolu, kia eke e mutolu.”

Ne ha ha i ai ono e vai maka lalahi, takitaha mo e maeke ke fakapuke ke molea e 40 e lita. Ne poaki a Iesu ki a lautolu ne fekafekau: “Ati fakapuke a e tau vai ke he magavai.” Ati fakapuke e lautolu ne leveki ke hoko ke he tau laugutu. Ti pehe a Iesu: “Ati ahu age a, ke uta ke he tagata ne pule ke he taonaga.”

Ne fiafia e pule he taonaga ke he uaina mitaki, mo e nakai mailoga ko e mena moua mai fakamana. Ne ui atu ke he kitofaihoana mo e pehe: “Kua ta mai fakamua he tau tagata oti e uaina mitaki; ka konahia ai e tau tagata, ati ta mai ai e uaina kelea; ka kua toka e koe e uaina mitaki ato hoko ke he magala nai.”

Ko e mana fakamua a nei ha Iesu, ko e magaaho ne kitia e lautolu, ko e tua he tau tutaki fou hana kua fakamalolo. Ko e magaaho fakamui, fakalataha mo e hana matua fifine mo e tau lafu, ne fenoga a lautolu ki Kapanaumi ne tata ke he Tahi i Kalilaia. Ioane 2:​1-12.

▪ Ko e magaaho fe he feua fakamatala ha Iesu ne hoko ai e fakamauaga i Kana?

▪ Ko e ha ne totoko e Iesu e talahauaga he hana matua fifine?

▪ Ko e heigoa e mana ne taute e Iesu, mo e lauia fefe e falu?