Veveheaga 54

“Areto Moli Mai he Lagi”

KO E aho fakamua ne loga moli e tau mena tutupu. Ne fagai fakamana e Iesu e tau afe tagata mo e hola kehe he lali e tau tagata ke tapaki a ia ke eke mo patuiki. Ko e po ia ne fano hui a ia he tahi afa he Tahi i Kalilaia, ti fakahao a Peteru, ne kamata ke tomo he fano hui a ia he tahi loka ha ko e afa; mo e fakamilino e tau peau ke fakamomoui hana tau tutaki mai he pe e foulua.

Ko e magaaho nei ko e tau tagata ne fagai fakamana e Iesu he fahi tokelau ki uta he Tahi i Kalilaia ne moua a ia tata atu ki Kapanaumi, mo e huhu: “Ne haele mai ne fe a koe ki hinai?” Ne akonaki ki a lautolu, ne pehe a Iesu ko e o mai a lautolu ke kumi ia ia ke moua taha kai moua noa. Ne fakamalolo e ia a lautolu ke gahua, nakai ma e tau kai popo vave, ka ko e tau mena kai ne nakai popo ke moua e moui tukulagi. Ti ko e mena ia ne huhu e tau tagata: “To eke ha e mautolu kia gahua a mautolu ke he tau gahua he Atua?”

Ne talahau e Iesu taha ni e gahua ne mua atu e aoga. “Ko e hanei e gahua he Atua,” he fakamaama e ia, “kia tua a mutolu kia Ia ne fakafano mai e ia.”

Ka e taha e mena, ko e tau tagata, ne nakai tua ki a Iesu, pete ne tau mana ne taute e ia. Ne nakai talitonu, pete ni he loga e tau mena ofoofogia ne taute e ia, ne huhu a lautolu: “Ko heigoa taha fakamailoga ke eke e koe ke kitekite atu a mautolu ki ai, mo e tua ai kia koe? Ko heigoa e mena ke eke e koe? Mena kai he tau matua ha mautolu e manai ke he tutakale, tuga ne kupu kua tohi, Kua foaki atu e ia kia lautolu e areto mai he lagi, ke kai ai.”

Ko e tali ke he ole ha lautolu ma e taha fakamailoga, ne fakamaama fakamahino e Iesu e Tupumaiaga he tau mena oti ne foaki fakamana he pehe a ia: “Nakai ko Mose ne foaki atu kia mutolu e areto ia mai he lagi; ka ko e haku a Matua kua foaki kia mutolu e areto moli mai he lagi. Ha ko e areto he Atua ko e mena ne hifo mai he lagi, mo e foaki e moui ke he lalolagi.”

“Ko e iki na e,” he talahau he tau tagata, “ta mai a kia mautolu e areto ia, aua neke noa.”

“Ko au nai ko e areto he moui,” he fakamaama e Iesu. “Ko ia ne hau kia au, nakai hoge ni a ia; ko ia foki ne tua kia au, nakai tuai fia inu ni a ia. Ka e tala atu e au kia mutolu, kua kitia tuai e mutolu au, ka e nakai tua ni a mutolu. Ko lautolu oti kana ne foaki mai he Matua kia au, to o mai a lautolu kia au; ko ia foki ke hau kia au, nakai vega ni e au ki fafo. Ha ko e mena nakai hifo mai au he lagi ke eke ni hoku loto, ka ko e finagalo hana ne fakafano mai au. Ko e hanai foki e finagalo he Matua ne fakafano mai ai au, kia nakai malaia ni taha kua foaki mai e ia kia au, ka kia fakatu ai e au, ke he aho fakamuiaki. Ko e hanai foki hana finagalo ne fakafano mai au, kia takitokotaha a lautolu ne kitekite ke he Tama, mo e tua kia ia, ke moua e ia e moui tukulagi.”

Ne kamata e tau Iutaia ke loma ki a Iesu ha kua pehe a ia, “Ko au ko e areto ne hifo mai he lagi.” Ne nakai kitia e lautolu ha mena ki a ia, ka ko e tama he tau matua, ko e tau tagata, mo e ko e puhala taha ia ni ne totoko he tau Nasareta, ne totoko foki a lautolu he pehe: “Nakai kia ko Iesu hanai, ko e tama a Iosefa, kua kitia e tautolu hana matua tane mo e hana matua fifine? Ko e hanai foki, po ke fefe he pehe mai a ia, Ne hifo mai au he lagi?”

“Aua neke loma a mutolu,” he tali e Iesu. “Nakai maeke ia taha ke hau kia au, ka nakai futia mai he Matua ne fakafano mai au; to fakatu foki e au a ia ke he aho fakamuiaki. Kua tohi he tau Perofeta, To fakaako e Iehova a lautolu oti kana. Hanai, ko lautolu oti ne fanogonogo ke he Matua, mo e ako ai, to o mai a lautolu kia au. Ka e nakai kitia e taha e Matua; ko ia hokoia mai he Atua, ne kitia e ia e Matua. Ko e moli, ko e moli, ke tala atu e au kia mutolu, ko ia ne tua mai kia au, kua moua e ia e moui tukulagi.”

He matutaki, ne liu a Iesu fatiaki: “Ko au ko e areto he moui. Ne kai he tau matua ha mutolu e manai ke he tutakale, ka kua mamate a lautolu. Ko e areto hanai kua hifo mai he lagi, ka kai ai e taha, ti nakai mate a ia. Ko au ko e areto he moui ne hifo mai he lagi; ka kai e taha e areto nai ati moui ai a ia tukulagi.” E, ka tua ki a Iesu, ko ia ne fakafano mai he Atua, to moua he tau tagata e moui tukulagi. Nakai fai manai, po ke ha areto, ke foaki e mena ia!

Ko e fakatutalaaga hagaao ke he areto mai he lagi ne kamata he magaaho ne moua he tau tagata a Iesu tata atu ki Kapanaumi. Ka e matutaki atu, ti hoko la ke he tapunu he magaaho fakamui he hane fakaako a Iesu he sunako i Kapanaumi. Ioane 6:​25-51, 59; Salamo 78:24; Isaia 54:13; Mataio 13:​55-57.

▪ Ko e heigoa e tau mena ne tutupu fakamua ke he fakatutalaaga hagaao ia ke he areto mai he lagi?

▪ Ko e onoonoaga ke he tau mena ne kua fita he oti he taute e Iesu, ko e ha e ole ke he taha fakamailoga ne kua nakai lata?

▪ Ko e ha ne loma e tau Iutaia ke he talahauaga ha Iesu ko ia ko e areto moli mai he lagi?

▪ Ne taute i fe e fakatutalaaga ke he areto mai he lagi?