Veveheaga 81

Tau Laliaga Foki ke Kelipopo a Iesu

HA KO E vaha makalili, ne fano a Iesu he mena malu ne fakahigoa ai ko e fakamaluaga ha Solomona. Ko e haia ni he tapa he faituga. Ne agaagai he tau Iutaia a ia mo e kamata ke pehe: “Ke fakataumaleku mai a koe kia mautolu ato a fe? Kaeke ko e Keriso a koe, ati talahau fakatonu mai a kia mautolu.”

“Kua oti he tala atu e au kia mutolu,” he tali e Iesu, “ka e nakai talia mai ni e mutolu.” Ne nakai talahau fakahako e Iesu e tau kupu ia ki a lautolu ko ia ko e Keriso, tuga he tala age e ia ke he fifine Samaria he tapa vai keli. Ka e taha e mena, kua fita a ia, he fakakite e ia a ia he magaaho ne fakamaama e ia ki a lautolu ko ia mai i luga mo e moui a ia fakamua ia Aperahamo.

Ka e taha e mena ko Iesu, ne manako a ia ke hokotia e maama he tau tagata hoko lautolu ni ko ia ko e Keriso he fakatatai hana tau gahua mo e talahauaga he Tohi Tapu ke he tau gahua ka fakakatoatoa he Keriso. Ko e kakano haia he magaaho fakamua ne tala age a ia ke he hana tau tutaki ke aua neke tala age ke he taha ko ia ko e Keriso. Ko e mena haia ne talahau e ia he mogoia ke he tau Iutaia vale nei. “Ko e tau gahua ne eke e au ke he higoa he haku a Matua, kua talahau ia kia au. Ka e nakai talia ni e mutolu.”

Ko e ha ne nakai talia a lautolu? Ko e nakai kia fai fakamoliaga ko e Keriso a Iesu? Nakai, ne fakakite e Iesu e kakano he tala age a ia ki a lautolu: “Ko e mena nakai ko e tau mamoe haku a mutolu, . . . Ko e haku a tau mamoe kua fanogonogo mai ke he haku a leo, kua iloa foki e au a lautolu; kua mumui mai foki a lautolu kia au; to ta atu foki e au e moui tukulagi kia lautolu. Nakai mamate ni a lautolu tukulagi; ti nakai maeke ni ia taha ke fofo a lautolu mai hoku lima. Ko e haku a Matua ne foaki mai a lautolu kia au, kua homo a ia ke he tau mena oti kana; ti nakai maeke ia taha ke fofo a lautolu mai he lima he haku a Matua.”

Ne fakamaama e Iesu mogoia e matutakiaga tata hana mo e hana Matua, he pehe: “Ko au nai mo e Matua, kua taha ni a maua.” Ha ko Iesu ha he lalolagi mo e hana Matua ha he lagi, ne fakamahino hana talahauaga ko ia mo e hana Matua nakai ko e taha he tino. Ka ko e kakano hana ko e taha he gahua, ati fakalataha ai a laua.

Ne ita lahi ha ko e tau kupu ha Iesu, ti eke hake he tau Iutaia e tau maka ke kelipopo aki a ia, tuga ni he taute pihia e lautolu fakamua ke he Galue he Faituga po ke Tau Fale Api. Ne fakafeleveia mo e malolo e ia hana tau tagata ne taute ke kelipopo a ia, ne pehe a Iesu: “Loga e tau gahua mitaki ne fakakite atu e au kia mutolu mai hoku Matua; ko e mena fe kia he tau gahua ia kua tauliti mai ai e mutolu au?”

“Nakai ko e gahua mitaki ke tauliti ai e mautolu a koe,” he tali e lautolu, “ka ko e vagahau kelea; ha ko koe ko e tagata, kua eke e koe a koe mo atua.” Ne nakai talahau e Iesu he tali mai ko e atua a ia, ko e ha ne talahau he tau Iutaia e mena nei?

Ko e moli ni, ha kua ha ha ia Iesu e tau malolo ne talitonu a lautolu ko e Atua ni hokoia kua ha ha i ai. Tuga a ia, ne talahau e ia hagaao ke he “tau mamoe,” “to ta atu foki e au e moui tukulagi kia lautolu,” ko e taha mena ne nakai maeke he ha tagata taha ke taute. Ka ko e tau Iutaia, kua nakai manatu ko e mena fakailoa e Iesu e pule ne foaki mai he hana Matua.

Ne talahau e Iesu e tokolalo hifo hana he Atua, he fakakite foki e ia ke he huhu: “Nakai kia tohi ke he Fakatufono ha mutolu [he Salamo 82:6], ne talahau e au a mutolu ko e tau atua? Kaeke ke talahaua a lautolu e ia ko e tau atua, ko lautolu ha i ai e kupu he Atua. . . . Kua pehe kia a mutolu kia ia ne fakatapu mo e fakafano mai he Matua ke he lalolagi, Kua vagahau kelea a koe, he pehe atu au, Ko au nai ko e Tama he Atua?”

Ha ko e tau Tohiaga Tapu ne ui e tau tagata fakafili nakai tonu ko e “tau atua,” ko e heigoa e hepe ne moua he tau Iutaia ki a Iesu he pehe, “Ko au nai ko e Tama he Atua”? Ne lafi atu e Iesu: “Kaeke kua nakai eke e au e tau gahua he haku a Matua, aua neke talia e mutolu au. Kaeke kua eke ni e au, pete ni he nakai talia e mutolu au, kia talia e mutolu e tau gahua; kia iloa ai e mutolu, mo e talia fakatonu, ha i loto ia au e Matua, ko au foki ha i loto ia ia.”

Ko e magaaho ne vagahau e Iesu e mena nei, ne lali e tau Iutaia ke tapaki a ia. Ka e hola a ia, tuga ni fakamua he taute e ia he Galue he Tau Fale Api. Ne toka e ia a Ierusalema mo e fenoga ke he taha fahi he Vailele i Ioritana ke he mena ne kamata papatiso e Ioane he teitei fa e tau tau fakamua. Ko e matakavi nei ne nakai mamao mo e mataafaga he fahi toga he Tahi i Kalilaia, ko e fenoga ke he ua e aho po ke molea mai i Ierusalema.

Ne tokologa e tau tagata ne o mai ki a Iesu he matakavi nei mo e kamata ke pehe: “Nakai fakai taha fakamailoga ne eke e Ioane, ka ko e tau mena oti ne tala mai ai e Ioane kia ia nai, kua moli ia.” Ko e mena haia ne tokologa ne tua ki a Iesu he mena ia. Ioane 10:​22-42; 4:26; 8:​23, 58; Mataio 16:20.

▪ Ko e heigoa e puhala ne manako a Iesu ke iloa he tau tagata a ia ko e Keriso?

▪ Taha fefe a Iesu mo e hana Matua?

▪ Ko e ha, ne pehe e tau Iutaia ko e taute e Iesu a ia mo atua?

▪ Fakakite fefe he talahauaga ne fatiaki mai e Iesu he Salamo kua nakai talahau a ia ko e tatai a ia mo e Atua?