Veveheaga 90

Ko e Amaamanakiaga he Liu Tu Mai

NE HOKO atu a Iesu ke he kaukau i Petania, ko e maaga ne liga tolu e kilomita mai i Ierusalema. Ko e gahoa la ia e tau aho tali mai he mate mo e tanu a Lasalo. Ko e hana a tau lafu mahakitaga ko Maria mo Mareta ne maanu agaia, mo e tokologa ne o mai ke he kaina ke fakamafana ki a laua.

Hane fa e maanu agaia, ne fai tagata ne tala age ki a Mareta ko Iesu hane hau he hala. Ti ko e mena ia ne fakamafiti atu a ia ke feleveia mo ia, ka e nakai tala age ke he hana tehina. Ne hoko atu ki a Iesu, ti liu a Mareta fatiaki e tau mena ne liga talahau lagaloga e ia mo e hana tehina ke he tau aho fa ia kua mole: “Ane nofo a koe i hinai, po kua nakai mate haku tugane.”

Ka e taha e mena, fai amaamanakiaga a Mareta ne fakakite, he talahau fakahalahu e ia ko e liga to taute e Iesu taha mena ma e hana tugaane. “Kua iloa e au ko e tau mena oti ke ole e koe ke he Atua to foaki mai he Atua kia koe,” he talahau e ia.

“To tu mai ni hau a tugane,” he mavehe e Iesu.

Ne maama e Mareta a Iesu ko e tala ke he liu tu mai ke he lalolagi anoiha, ne amaamanaki a Aperahamo mo e falu foki he tau fekafekau he Atua. Ti ko e mena ia ne tali e ia: “Kua iloa e au, to tu mai ni a ia ke he tutuaga he aho fakamuiaki.”

Ka e taha e mena, ne foaki e Iesu e amaamanakiaga ke moua mafiti e mafanatia, he tali: “Ko au nai ko e liu tu mai, mo e moui.” Ne fakamanatu e ia ki a Mareta kua foaki he Atua ki a ia e malolo ke he mate he pehe: “Ko ia ke tua mai kia au, pete ni he mate a ia, ka to moui ni a ia. Ko e tau tagata momoui oti, ke tua mai kia au, nakai mamate tukulagi ni.”

Ne nakai pehe a Iesu ki a Mareta to nakai mamate a lautolu ne tua he magahala ia. Nakai, ka ko e manatu hana ne fakakite ko e fakagahua e tua ki a ia ke takitaki atu ke he moui tukulagi. Ko e moui ia ka fiafia ki ai e laulahi he tau tagata ha ko e ha lautolu a liliu tutu mai ke he aho fakamuiaki. Ka ko e falu foki ne tua fakamoli to hao mai he fakaotiaga he fakatokaaga kelea nei he lalolagi, ti ko lautolu nei to fakamoli ai e tau kupu a Iesu. To nakai mamate a lautolu! Ne mole atu e talahauaga lahi nei, ne huhu a Iesu ki a Mareta, “Kua talia nakai e koe e mena ia?”

“E, ko e Iki na e,” he tali e ia. “Kua talia ni e au, ko koe ko e Keriso ko e Tama he Atua, ko Ia ke haele mai ke he lalolagi.”

Ne fakamafiti a Mareta ke fekau hana tehina, he tala age ni ki a ia hokoia: “Kua hau tuai e Akoako, kua ui mai kia koe.” Ko e magaaho ia ni ne toka e Maria e fale. Ka ko e magaaho ne kitia he falu a ia he fano, ne mumui a lautolu, tua ni ko e fano ke he tukuaga.

He hoko ki a Iesu, ne fakaveli a Maria ke he tau hui ha Iesu mo e tagi. “Ko e Iki na e ane nofo a koe i hinai, po kua nakai mate haku tugane,” he talahau e ia. Ne fakaatukehe lahi a Iesu he kitia e ia a Maria mo e moto tagata ne mumui ia ia ne tagi. “Ko e fe ne tuku ai e mutolu a ia?” he huhu e ia.

Ko e Iki na e, haele mai a koe ke kitia,” he tali e lautolu.

Ne tagi foki a Iesu, ati pehe e tau Iutaia: “Kitiala, e lahi he hana fakaalofa kia ia!”

Ne manatu he falu a Iesu, he magaaho he Galue he Tau Fale Api he falu mahina gahoa fakamua, ne fakamalolo e fuata tane ne fanau mai matapouli, mo e huhu a lautolu: “Nakai kia maeke ke he tagata na ne fakaala e tau mata hana ne matapouli, ke fekau atu foki ke ua mate e tagata nai?” Ioane 5:21; 6:40; 9:​1-7; 11:​17-37.

▪ Ko e magaaho fe ne hoko a Iesu tata atu ki Petania, mo e ko e heigoa e tuaga i ai?

▪ Ko e heigoa e fakaveaga he talitonu ha Mareta he liu tu mai?

▪ Lauia fefe a Iesu he mate ha Lasalo?