Veveheaga 100

Ko e Tala Fakatai ke he Tau Mina

LIGA ko Iesu agaia ni he fale ha Sakaio, ha ko e mena fano a ia ki ai he fenoga hana ki Ierusalema. Kua talitonu hana tau tutaki, ka hohoko a lautolu ki Ierusalema, to fakapuloa e ia a ia ko e Mesia mo e fakatu hana Kautu. Ke fakatonu e manatu nei mo e fakakite ko e mamao agaia e Kautu ki mua, ati foaki e Iesu e tala fakatai.

“Ne fano e taha iki,” he talahau e ia, “ke he motu mamao ke moua māna ke fakatu a ia mo Iki, to liu mai ai.” Ko Iesu e “iki,” mo e ko e lagi e “motu mamao.” Ko e magaaho ka hoko a Iesu ki ai, to foaki he hana Matua ki a ia e malolo fakapatuiki.

Ka to fano a ia, kua ui he iki e tokohogofulu he tau fekafekau mo e foaki ki a lautolu takitokotaha e tau mina ario mo e pehe: “Kia fakafua aki e mutolu, ato liu mai au.” Ko e tau fekafekau tokohogofulu ke he fakamoliaga fakamua ne hagaao ia ke he tau tutaki fakamua ha Iesu. Ka ko e fakamoli fakalaulahi, ne fakatino e lautolu a lautolu oti ne amaamanaki mo hakeaga fakalataha mo ia ke he Kautu he lagi.

Ko e tau mina ario ko e tau tupe aoga lahi, takitaha mo e liga ko e totogi he tolu e mahina a ia he tau tagata gahua fonua. Ka ko e heigoa e kakano he tau mina? Mo e ko e vahega fakafua fe ka gahua ki ai e tau fekafekau?

Ko e hagaao e tau mina ke he tau koloa uho ka fakaaoga he tau tutaki fakauku he agaga ke moua aki e falu hakeaga he Kautu he lagi, ato hau a Iesu ko e Patuiki he Kautu he maveheaga. He mole hana a liu tu mai mo e fakakite ke he hana tau tutaki, ne foaki age e ia e tau mina fakatai ke moua tokologa mai falu tutaki mo e lafi ke he vahega he Kautu he lagi.

“Ka e,” he matutaki e Iesu, ne “fakavihia [e iki] he motu hana, kua fakafano atu e lautolu e fekau ke mui atu kia ia, kua pehe atu, Nakai loto a mautolu ke he tagata na ke eke mo iki ha mautolu.” Ko e motu ko e tau Isaraela, po ke tau Iutaia, ka e nakai putoia ai hana tau tutaki. Mole atu e hake ha Iesu ke he lagi, ko e tau Iutaia nei, ha ko e ha lautolu a eke fakakelea ke he hana tau tutaki ne fakailoa e nakai manako ha lautolu ke eke a ia mo patuiki ha lautolu. Ko e puhala nei ne gahua a lautolu tuga e motu ne vega e matakau he tau fekafekau hukui.

Ka e fakaaoga fefe he tau fekafekau tokohogofulu ha lautolu a tau mina? Ne fakamaama e Iesu: “Ti kua liu mai a ia kua moua tuai e pule ke iki ai, ti tala age ke ui atu ke he tau fekafekau ia ne uta e ia ki ai e ario, ke o mai kia ia, kia iloa e ia takitaha ha lautolu a tau fakafua po ke fefe. Ati hau ai taha, kua pehe mai, Ko e iki na e, ko e hau a mina kua moua ai e [falu] mina ne hogofulu. Ti tala age a ia kia ia, Mitaki, ko e fekafekau mitaki na e, kua fakamoli a koe ke he mena kiliku, ko e mena ia kia pule ai a koe ke he hogofulu e māga. Ati hau ai foki mo e taha, kua pehe mai, Ko e Iki na e, ko e hau a mina kua moua ai e [falu] mina ne lima. Ti tala age foki a ia kia ia, Ati pule foki a a koe ke he lima e māga.”

Ko e hagaao e fekafekau ne hogofulu e mina ke he vahega, po ke matakau, he tau tutaki mai he Penetekoso 33 V.N. ti hoko mai ke he vaha nei putoia ai e tau aposetolo. Ko e fekafekau ne moua lima e tau mina ne hagaao foki ia ke he matakau he magahala taha ia, ke lata mo e tau magaaho mo e tau malolo, ne fakatolomaki e tau koloa uho he patuiki ha lautolu he lalolagi. Ne fakamatala fakamakutu tokoua he tau matakau nei e tala mitaki, ti ko e fua, tokologa a lautolu ne loto mitaki ne eke ai mo tau Kerisiano. Tokohiva mai he tau fekafekau ne kautu e gahua fakafua mo e tupu ha lautolu a tau mena ne moua.

“Ti,” he matutaki e Iesu, “hau foki taha, kua pehe mai, Ko e Iki na e, kitiala, ko e hau a mina hanai, ne toka ai e au kua afī he holoholo; ha ko e mena matakutaku ni au kia koe; ha ko koe ko e tagata mahani uka; kua ta hake e koe e mena nakai tuku hifo e koe ki lalo; kua helehele foki e koe e tau saito nakai gana e koe. Ti tala age a ia kia ia, ko e fekafekau kelea na e, ko e hau a kupu ni, ke fakahala ai e au a koe; kua iloa e koe, ko au ko e tagata mahani uka, ne ta hake e au e mena nakai tuku e au ki lalo, mo e helehele e au e tau saito nakai gana e au. Ti ko e heigoa e mena nakai uta ai e koe haku a ario ke he fale fakafua tupe, kia moua ai e au ka hau, katoa mo e hana taui? Kua tala age a ia kia lautolu ne tutu mai, Kia fofo a e mutolu e mina ia ia, ti age kia ia ne toka ai hogofulu e mina.”

Ko ia e fekafekau kelea, ko e kakano he utakehe e mina ko e mena fakatai, ko e utakehe e tuaga he Kautu he lagi. E, ne utakehe ia ia e monuina ke pule ke he tau maga hogofulu po ke he tau maga lima. Mailoga foki, nakai ko e kelea e fekafekau ha ko e taha mena kelea hana ne taute, ka ko e kaumahala ke gahua ke fakatupu e tau koloa uho he hana a iki he kautu.

Ko e magaaho ne foaki age e mina he fekafekau kelea ke he fekafekau fakamua, ne ha ha i ai e totoko: “Ko e Iki na e, ha ha ia ia hogofulu e mina.” Ka e taha e mena, ne tali a Iesu: “Ko e tagata ha i ai e tau mena, to age kia ia; ka ko ia kua nakai fai mena, to fofo e tau mena ha ia ia. Ka ko lautolu kua eke au mo fi ha lautolu, ko lautolu kua nakai fia loto ke eke au mo iki ha lautolu, kia takitaki mai e mutolu ki hinai, mo e keli a lautolu ki mua haku.” Luka 19:​11-27; Mataio 28:​19, 20.

▪ Ko e heigoa ne fakalaga aki e tala fakatai ha Iesu ke he tau mina?

▪ Ko hai e iki, mo e ko e heigoa e motu ne fano a ia ki ai?

▪ Ko hai e tau fekafekau, mo e ko e heigoa e kakano he tau mina?

▪ Ko hai e motu, mo e fakakite fefe e lautolu e vihiatia ha lautolu?

▪ Ko e ha e taha fekafekau ne ui ko e kelea, mo e ko e heigoa e kakano he utakehe hana a mina?