Veveheaga 102

Hu Atu mo e Kautu ha Keriso ki Ierusalema

KO E pogipogi hake, ko e Aho Tapu, Nisana 9, ne toka e Iesu mo e hana tau tutaki a Petania mo e hagaao atu ke he Mouga ko Olive ke fenoga atu ki Ierusalema. Ko e magaaho ku ia, ne tata atu a lautolu ki Petefake, he Mouga ko Olive. Ne tala age a Iesu ke he tokoua hana tau tutaki:

“Ati o atu a a mua ke he māga ha i mua ha mua; ti kitia ai agataha e mua e asini kua fakave, mo e punua asini fakalataha mo ia; ti vevete la e mua, mo e takitaki mai ai kia au. Kaeke foki ke vagahau mai e taha ha kupu kia mua, kia tala age a mua. Kua manako ai e Iki; to fakafano mai ai agataha e ia.”

Pete ni he nakai mailoga he tau tutaki he magaaho fakamua ia e tau fakatonuaga nei ko e fakamoliaga he tau perofetaaga he Tohi Tapu, ka e mailoga la ia e lautolu he magaaho fakamui. Ne talahau tuai he perofeta ko Sakaria ko e Patuiki he maveheaga he Atua to heke a ia he asini ki Ierusalema, e, he “asini, ko e punua asini.” Kua heke pihia foki e Patuiki ko Solomona ke he hana a fakaukuaga he punua asini.

Ko e magaaho ne hohoko e tau tutaki ki Petefake mo e uta e punua asini mo e matua fifine asini, ne pehe e falu ne tutu tata ai: “Ne vevete mo ha e mua e punua asini?” Ka ko e magaaho ne tala age ko e uta e tau manu ma e Iki, ne toka he tau tagata tane e tau tutaki ke uta a laua ki a Iesu. Ne tuku he tau tutaki ha lautolu a tau tapulu i luga he asini mo e pihia foki ke he punua, ka e heke e Iesu e punua asini.

Kua heke a Iesu he fina atu ki Ierusalema, ti une ki mua e tokologa he moto tagata. Ne tokologa e tau tagata ne fola ha lautolu a tau tapulu he puhala tu, ka e hahala he falu e tau la akau mai he tau akau mo e fola fano a lautolu. “Kia monuina a Ia kua haele mai ko e Patuiki ke he higoa a Iehova,” he talahau e lautolu. “Ko e mafola ke he lagi, ko e fakahekeaga foki ke he tau mena i luga muatua!”

Ne hukia e falu Farasaio he moto tagata ha ko e tau fakapuloaaga nei mo e gugu ki a Iesu: “Ko e Akoako na e, kia akonaki atu e koe hau a tau tutaki.” Ka e tali a Iesu: “Ke tala atu e au kia mutolu, ka fakamamate a lautolu nai, ti ui mai ni e tau maka.”

Kua tata atu a Iesu ki Ierusalema, ne kitia e ia e maga mo e kamata ke tagi atu ki ai, mo e pehe: “Ane mai iloa a koe, ko koe ni, ke he hau a aho nai, ko e tau mena ke mafola ai a koe! Ka ko e ainei kua galo kia koe.” Ha ko e hana a nakai omaoma pauaki, to totogi e Ierusalema e mena nei, tuga ni he talahau tuai e Iesu:

“Ha ko e mena hoko mai kia koe e na aho ia, ke keli takai ai kia koe e lautolu kua fai fi [ko e tau Roma i lalo hifo he Takitaki Kau ko Tito] kia koe e luo ke pototakai mai ni e lautolu a koe, ke pāpā a koe ke he tau fahi oti; to fakatatai foki e lautolu a koe mo e kelekele katoa mo e tau fanau hau i loto ia koe; nakai toka foki e lautolu e taha maka ki luga he taha maka ki loto ia koe.” Ko e moumouaga nei a Ierusalema ne talahau tuai e Iesu ne fakamoli ai he 37 e tau he magaaho fakamui, he tau 70 V.N.

Ko e falu fahi tapu gahoa fakamua, tokologa he moto tagata ne kitia a Iesu ne liu fakatu mai a Lasalo. Ko lautolu nei ne fa e tala age ke he falu e mana ia. Ti ko e magaaho ne hoko a Iesu ki Ierusalema, ne go e maga katoa. “Ko hai kia hanai?” he manako e tau tagata ke iloa. Ne talahau tumau he moto tagata: “Ko Iesu hanai, ko e perofeta mai Nasareta i Kalilaia!” Kua kitia e mena ne tupu, ne tagi e tau Farasaio ha kua nakai moua e lautolu ha mena, ha kua pehe a lautolu: “Kua mumui atu kia ia e lalolagi.”

Ha ko e hana mahani ke he tau aahi atu ki Ierusalema, ne fina atu a Iesu ke he faituga ke fakaako. Ne o mai ki a ia e tau matapouli mo e tau kulikuli mo e fakamaulu e ia a lautolu! Ko e magaaho ne kitia he tau ekepoa ne mua mo e tau tohikupu e tau mena mitaki ha Iesu ne taute mo e magaaho ne logona e lautolu e tau fanau tane he faituga ne tauhea, “Hosana ke he Tama a Tavita!” ne ita lahi a lautolu. “Kua logona nakai e koe e tau kupu ha lautolu?” he totoko e lautolu.

“E,” he tali e Iesu. “Nakai kia totou e mutolu, Ne taute e koe e fakahekeaga mai he tau gutu he tau tama mukemuke mo e tau tama kai huhu?”

Ne matutaki a Iesu ke fakaako, mo e onoono viko a ia ke he tau mena oti he faituga. Ne mafiti e tau magaaho. Ko e mena haia ne toka e ia, fakalataha mo e 12 mo e liliu ki tua tolu e kilomita mo e vala ki Petania. Ne nofo ai a ia he po Tapu, liga ke he fale he kapitiga hana ko Lasalo. Mataio 21:​1-11, 14-17; Mareko 11:​1-11; Luka 19:​29-44; Ioane 12:​12-19; Sakaria 9:9.

▪ Ko e magaaho fe mo e puhala fe ne fina atu a Iesu ki Ierusalema ko e Patuiki?

▪ Kua aoga he ha ke fakaheke e moto tagata ki a Iesu?

▪ Fefe e logonaaga ha Iesu he kitia e ia a Ierusalema, mo e ko e heigoa e perofetaaga ne talahau e ia?

▪ Ko e heigoa ne tupu he fano a Iesu ke he faituga?