Veveheaga 107

Fakataiaga he Taonaga he Fakamauaga

KUA puhala mai he ua e fakataiaga, ne fakakite fakatapakupaku e Iesu e tau tohikupu mo e tau ekepoa ne mua, mo e manako a lautolu ke kelipopo a ia. Ka e nakai la oti a Iesu mo lautolu. Ne matutaki a Iesu ke talahau ki a lautolu e taha fakataiaga, he pehe:

“Kua fakatai e kautu he lagi ke he taha patuiki ne eke e taonaga he fakamauaga mo e hana tama tane. Kua fakafano atu e ia hana tau fekafekau ke tala age kia lautolu ne ogo ki ai ke o mai ke he taonaga he fakamauaga. Ka e nakai fia loto a lautolu ke o mai.”

Ko Iehova ko e Atua e Patuiki ne taute e taonaga he fakamauaga ma e hana Tama, ko Iesu Keriso. Ko e fakahikuaga, ko e kitofaitane he tau tutaki fakauku ne 144,000 to fakalataha mo Iesu ke he lagi. Ko lautolu ka pule e Patuiki ki ai ko e tau tagata i Isaraela, ko lautolu ne ta mai ke he maveheaga he Fakatufono he 1513 F.V.N., ne moua e magaaho ke eke mo “kautu he tau ekepoa.” Ti, ko e magaaho ia, ko lautolu fakamua haia ne foaki ki ai e uiina ke he taonaga he fakamauaga.

Ka e taha e mena, ko e ui fakamua ki a lautolu ne uiina ne nakai fakafano ato hoko ke he vaha mateafu he 29 V.N., he magaaho ne kamata e Iesu mo e hana tau tutaki (tau fekafekau he patuiki) e ha lautolu a gahua fakamatala he Kautu. Ka ko e tau Isaraela he tino ne moua e uiina nei ne foaki he tau fekafekau mai he 29 V.N. ke he 33 V.N. ne nakai fia loto ke o mai. Ti ko e mena haia ne age he Atua ke he motu ne uiina ai a lautolu e taha magaaho foki, tuga ne talahau e Iesu:

“Ati liu foki fakafano atu ai e ia e falu a fekafekau, kua pehe atu, Kia tala age e mutolu kia lautolu ne ogo ki ai, Kitiala, kua taute tuai e au haku a tau mena kai, kua tamate tuai haku a tau povi mo e tau mena gako, kua taute foki e tau mena oti; ati o mai a ke he taonaga he fakamauaga.” Ko e ui ke uaaki mo e fakahiku a nei ki a lautolu ne uiina ne kamata he Penetekoso 33 V.N., he magaaho ne liligi hifo e agaga tapu ke he tau tutaki ha Iesu. Ne matutaki e uiaga nei ke he 36 V.N.

Ka e taha e mena, ko e tokologa he tau Isaraela, ne nakai talia foki e uiaga nei. “Ka kua fakateaga ki ai a lautolu, kua takitaha mo e fano kehe,” he talahau e Iesu, “ko e taha ke he hana kaina, mo e taha ke he hana fakafua koloa. Ka ko e falu, kua tapatapaki e lautolu hana tau fekafekau, kua fakakelea mo e kelipopo a lautolu.” “Kua fanogonogo e patuiki,” he matutaki e Iesu, “ati vale lahi ai a ia, kua fakafano atu e ia hana tau kau, kua tamate e tau tagata keli tagata ia, mo e hunuhunu ha lautolu a māga.” Ne hoko e mena nei he 70 V.N., he magaaho ne moumou a Isaraela ki kelekele he tau Roma, mo e kelipopo a lautolu ia ne kelipopo tagata.

Ne fakamaama mogoia e Iesu e mena ne tupu he magaaho ia: “Ati tala age ai a ia [ko e patuiki] ke he hana tau fekafekau, Kua taute tuai e taonaga he fakamauaga, ka e nakai aoga a lautolu ne ogo ki ai. Hanai, kia o atu a mutolu ke he tau halatu, ko lautolu oti ka kitia e mutolu, kia ogo age ki ai e mutolu e taonaga he fakamauaga.” Ne taute he tau fekafekau e mena nei, “ati puke ai e mena ne eke ai e taonaga kia lautolu ne tatakoto ke kai mena ai.”

Ko e gahua nei ke fakapotopoto mai a lautolu ne uiina mai he tau halatu i fafo he maga ne kamata ai he 36 V.N. Ko Konelio ko e takitaki kautau Roma mo e hana magafaoa a lautolu fakamua e tau tagata nakai ko e tau Isaraela ne nakai peritome ne fakapotopoto mai. Ko e fakapotopotoaga he tau tagata nakai ko e tau Iutaia nei, ko lautolu ia ne hukui aki a lautolu ne nakai talia e uiaga he magaaho fakamua, kua matutaki hifo mai ke he senetenari ke 20 aki.

Ko e vaha he senetenari ke 20 aki ne puke e poko ne taute ma e taonaga. Ne talahau e Iesu e mena ka hoko, he pehe: “Ati hu atu ai e patuiki ke kitekite kia lautolu ne tatakoto ke kai mena ai; ti kitia ai e ia e taha tagata nakai tapulu ke he tapulu he fakamauaga. Ati tala age ai a ia kia ia, Teme na e, po ke hu mai fefe a koe ke he mena nai kua nakai tapulu a koe ke he tapulu he fakamauaga? Ti nakai lea ai a ia. Ati tala age ai e patuiki ke he tau fekafekau, Kia lili e mutolu hana tau hui, mo e hana tau lima, mo e liti a ia ke he pouli i fafo, ha ha i ai e tagi aue mo e konoi he tau nifo.”

Ko e tagata ne nakai fai tapulu he fakamauaga ne fakatino mai e tau Kerisiano pikopiko ha Kerisitenitome. Ne nakai talia he Atua a lautolu nei ko e tau Isaraela fakaagaga. Ne nakai fakauku he Atua a lautolu aki e agaga tapu ko e tau hakega he Kautu. Ti ko e mena haia ne tolo ai ki fafo he pouli ke matematekelea ke he moumouaga.

Ne fakahiku e Iesu hana a fakataiaga he pehe: “Ha ko e mena tokologa a lautolu kua ui ki ai, ka e tokogahoa a lautolu kua fifili.” E, ne tokologa a lautolu ne uiina mai he motu ha Isaraela ke eke mo tau kitofaitane ha Keriso, ka e tokogahoa ni ne fifili mai he tau Isaraela he tino. Ko e tokologa ha lautolu he 144,000 ne moua e taui he lagi ko e tau tagata nakai ko e tau Isaraela. Mataio 22:1-14; Esoto 19:1-6; Fakakiteaga 14:​1-3.

▪ Ko hai a lautolu ne uiina fakamua ke he taonaga he fakamauaga, mo e ko e magaaho fe ne fakalaulahi ai e uiina ha lautolu?

▪ Ko e magaaho fe ne uta fakamua ai e uiina ki a lautolu ne uiina, mo e ko hai a lautolu e tau fekafekau ne fakaaoga ke tufa ai?

▪ Ko e magaaho fe ne uta e ui ke uaaki, mo e ko hai he magaaho fakamui ne uiina?

▪ Ko hai ne fakatino he tagata ne nakai fai tapulu he fakamauaga?

▪ Ko hai a lautolu ne tokologa ne uiina, mo lautolu e tokogahoa ne fifili?