Veveheaga 117

Mamahi Lahi he Kaina

KO E magaaho ne oti e liogi ha Iesu, ko ia mo e hana a tau aposetolo fakamoli toko 11 ne uhu e tau lologo fakaheke ki a Iehova. Ne o hifo mai a lautolu he poko tapa ki luga, o he po mokomoko mo e liliu ke he fahi atu he Pahua ko Ketarono ke o ki Petania. Ka ke he magahehala, ne okioki a lautolu he matakavi mahuiga, ko e kaina i Ketesemane. Ne toka e kaina nei he matakavi ia he Mouga ko Olive. Ne fa mahani a Iesu mo e hana tau aposetolo ke feleveia ke he matakavi nei he vahaloto he tau akau olive.

Ne toka e tau aposetolo tokovalu​—liga tata ke he matakavi ne hu atu ke he kaina​—ne tala age a ia ki a lautolu: “Kia nonofo a mutolu i hinai, ka e fano au ke liogi ke he mena ko.” Ne uta e ia e tokotolu—ko Peteru, ko Iakopo, mo Ioane​—mo e o atu taha ke he kaina. Ne lahi e fakatutuku mo e tupetupe a Iesu. “Kua momoko lahi haku a loto ke hoko ke he mate,” he tala age e ia ki a lautolu. “Kia nonofo a mutolu i hinai, mo e mataala a mutolu fakalataha mo au.”

Ne fina atu fakatote ki mua, ti fakaveli fakafohifo a Iesu ke he kelekele mo e kamata ke liogi fakamakamaka: “Hoku Matua na e, kaeke kua maeke, kia uta kehe e kapiniu nai ia au; ka e aua neke eke hoku loto, ka ko e hau a finagalo.” Ko e heigoa hana a kakano? Ko e ha ne “momoko lahi [hana] a loto ke hoko ke he mate”? Kua liu tua kia a ia mai he hana a fifiliaga ke mate mo lukutoto?

Nakai pihia! Ne nakai ole a Iesu ke hao mai he mate. Pihia mo e manatu ke kalo mai he mate mo poa, tuga ne talahau e Peteru he taha magaaho, ko e taha na mena mua atu a ia he kelea ki a ia. Ka ko e matematekelea a ia he matakutaku ke he puhala ka hoko mafiti mai e mate ki a ia​—kua tuga e tagata mua atu e mahani kelea​—to fakama e higoa he hana Matua. Ne logona e ia he magaaho nei ko e toe gahoa ni e tau magaaho ti fakatautau a ia ke he akau, ke tuga e tagata mua atu he kelea​—ko e eke fakakelea ke he Atua! Ko e mena hanei ne mamahi lahi ai a ia.

Ne mole e liogi loa, ti liu a Iesu mo e moua e tau aposetolo tokotolu hana ne momohe. Ne vagahau ki a Peteru, kua pehe a ia: “Kua pihia kia a mutolu, kua nakai fahia ke mataala fakalataha mo au ke he magapo taha? Kia mataala a mutolu mo e liogi, neke hoko mai e kamatamata kia mutolu.” Ka e taha e mena, ne mailoga e ia e tupetupe ha lautolu mo e kua tuloto foki e po, ti pehe a ia: “Kua makai ni e loto, ka ko e tino kua lolelole.”

Ne liu foki a Iesu fano ke lagaua aki mo e ole ke he Atua ke uta kehe mai ia ia e “kapiniu nai,” ko e pehe a ia, ko e kotofaaga, po ke finagalo, ha Iehova a ia ma hana. Ko e magaaho ne liu mai a ia, ne liu foki a ia moua e tokotolu ha ne momohe ka kua lata a lautolu ke liogi ke nakai hoko a lautolu ke he kamatamata. Ko e magaaho ne vagahau a Iesu ki a lautolu, ne nakai iloa e lautolu ha mena ke tali atu.

Ko e fakahikuaga, ko e magaaho ke lagatolu aki, ne fano kehe a Iesu, tuga e mamao he liti he patuo, mo e fakatokotui ke he tau matatuli, mo e tagi fakalahi mo e tau hihina mata, ti liogi: “Ma Matua na e, ka finagalo a koe, kia uta kehe e koe e kapiniu nai ia au.” Ne logona lahi e Iesu e matila he mamahi ha ko e eke fakakelea he hana mate tuga e tagata mahani kelea ke he higoa he hana Matua. Ke fakafili ko e tagata mahani kelea​—ko e taha ne kaialu atu ke he Atua​—kua lahi mahaki ni ke fua!

Ka e taha e mena, ne matutaki a Iesu ke liogi: “Ka e aua neke eke hoku loto, ka ko e hāu a finagalo.” Ne omaoma a Iesu mo e foaki hana a finagalo ke he Atua. Ko e mena nei, ne kitia e agelu mai he lagi mo e fakamalolo a ia aki e tau kupu fakamafana. Liga ni kua tala age he agelu ki a Iesu kua ha ha ia ia e mamali he taliaaga he hana Matua.

Ka e, kua lahi ha e mamafa he tau tukeua ha Iesu! Ko e hana a moui tukulagi fakalataha mo e tau tagata oti kana kua tautau ia ke he fua tautau. Kua lahi mahaki e tupetupe he loto. Ko e mena haia ne matutaki a Iesu ke liogi fakamakamaka, mo e hana kavakava kua tuga e tau fatufatuoka toto kua mokulu hifo ke he kelekele. “Pete ni he nakai fa mahani e mena nei,” ne mailoga he The Journal of the American Medical Association, “ko e kavakava toto . . . ne fa mahani ke moua ka hoko ke he tau tutuaga tupetupe lahi.”

He mole e mena nei, ne liu a Iesu ke lagatolu aki ke he hana a tau aposetolo, mo e liu foki moua a lautolu ha ne momohe. Ne mategugu a lautolu ha ko e maanu. “Ati momohe leva a, mo e okioki,” he talahau e ia. “Toka ai; kua hoko mai e magapo; kitiala, kua tuku atu ai e Tama he tagata ke he tau lima he tau tagata hala. Ati matike a, ke o a tautolu. Kitiala, kua tata mai tuai a ia ke afo au.”

Ha ne vagahau agaia a ia, ti hoko mai a Iuta Isakariota, fakalataha mo e moto tagata tokologa mo e tau hulu mo e tau lamepa mo e tau kanavaakau. Mataio 26:​30, 36-47; 16:​21-23; Mareko 14:​26, 32-43; Luka 22:​39-47; Ioane 18:​1-3; Heperu 5:7.

▪ Ko e takitaki e Iesu ki fe e tau aposetolo, he toka e lautolu e poko tapa ki luga, mo e ko e heigoa hana ne taute i ai?

▪ Hane fa e liogi a Iesu, ko e heigoa he tau aposetolo ne taute?

▪ Ko e ha ne matematekelea ai a Iesu, mo e ko e heigoa e olelalo ne taute e ia ke he Atua?

▪ Ko e heigoa ne fakakite mai he kavakava ha Iesu ne tuga e tau fatufatuoka toto?