Veveheaga 124

Kua Tuku Age mo e Takitaki Kehe

HA KUA amotia a Pilato he lilifu ha Iesu ne fakakikiveka, ne liu lali ke vevete a ia, kua au atu e ita he tau ekepoa ne mua. Ne fakamakamaka a lautolu ke nakai fai fakalavelave ke he ha lautolu a gahua kelea. Ti liliu foki a lautolu tauhea: “Kia fakatautau a ia! Kia fakatautau a ia!”

“Kia uta ni e mutolu a ia mo e fakatautau a ia,” he tali e Pilato. (Ne kehe mai he tau talahauaga fakamua ha lautolu, liga kua ha ha he tau Iutaia e pule ke fakahala e tau tagata matahavala he tau agahala fakalotu lalahi.) Ko e lagalima aki a nei he fakailoa e Pilato e nakai agahala ha Iesu, he pehe: “Nakai moua e au ha mena ke fakahala ai a ia.”

Ko e tau Iutaia, kua kitia ha lautolu a tau hokotaki fakapolitika kua kaumahala ke moua e fakahala ti liliu ke he hokotaki fakalotu he kupu kelea ne fakaaoga he magaaho fakamua he fakafiliaga ha Iesu ki mua he Saneheturini. “Ha ha ia mautolu e fakatufono,” he talahau e lautolu, “kua lata foki mo e fakatufono ha mautolu ke mate a ia, ha kua eke e ia a ia mo tama he Atua.”

Kua fou e hokotaki nei ki a Pilato, ti tupu ki a ia e matakutaku lahi. Kua mailoga e ia ke he magaaho nei nakai ko e tagata noa a Iesu, tuga foki he miti he hana hoana mo e malolo mua ue atu ha Iesu ne fakamoli he aga fakatagata. Ka ko e “tama he Atua”? Ne iloa e Pilato ko Iesu mai i Kalilaia. Ka e, kua liga moui nakai a ia fakamua? Ne liuaki foki a ia ke he fale he patuiki, ti huhu a Pilato: “Ko e tagata mai fe kia a koe?”

Ne fakanono a Iesu. Fakamua ne tala age a ia ki a Pilato ko ia ko e patuiki ka ko e hana a Kautu nakai fai vala he lalolagi nei. Kua nakai aoga ha fakamaamaaga foki he magaaho nei. Ka e taha e mena, kua hukia e fakatokoluga ha Pilato ha kua nakai tali mai a ia, ti vale a ia ki a Iesu ke he tau kupu: “Nakai kia lea mai a koe kia au? Nakai kia iloa e koe, ha ha ia au e pule ke fakatautau ai a koe ha ia au foki e pule ke vevete a koe?”

“Nakai pule a koe kia au, kane nakai tuku mai kia koe mai luga,” he tali fakalilifu e Iesu. Ko e tala a ia ke he fakaataaga he pule ne foaki he Atua ke he tau tagata pule ke leveki e tau mena he lalolagi. Ne lafi atu e Iesu: “Ko e mena ia, ke au atu ai e kelea hana ne tuku mai au kia koe.” Ko e moli, ko e ekepoa ne mua ko Kaiafa, fakalataha mo lautolu ko e hana tau lagomatai mo Iuta Isakariota, kua mua atu e mamafa he hala ki a Pilato he taute fakakelea a Iesu.

Ne au atu e nava ki a Iesu mo e matakutaku neke liga ha ha ia Iesu e tupu maiaga faka-Atua, ne fakafou e Pilato hana lali fakamakamaka ke vevete a ia. Ka e taha e mena, ne totoko he tau Iutaia a Pilato. Ne liu fatiaki e lautolu e hokotaki fakapolitika ha lautolu, he lagatau fakamatakutaku: “Kaeke ke vevete atu e koe e tagata na, ti nakai fakaalofa a koe kia Kaisara; ka fia patuiki e taha, kua eke fakakelea a ia kia Kaisara.”

Pete ni e fai kakano hagahaga kelea lahi, kua liu a Pilato liuaki mai foki a Iesu ki fafo. “Kitiala, e patuiki ha mutolu!” he liu foki a ia ole.

“Kia uta kehe a ia! Kia uta kehe a ia! Kia fakatautau a ia!”

“Fakatautau kia e au ha mutolu a patuiki?” he huhu e Pilato mo e tupetupe.

Ne matematekelea e tau Iutaia i lalo he pule he tau tagata Roma. Ko e moli, e vihiatia ha lautolu ke he pule faka-Roma! Ka e, he fakatupua, ne pehe e tau ekepoa ne mua: “Nakai fai patuiki a mautolu, ka ko Kaisara hokoia.”

Ha ko e matakutaku ke he hana tuaga fakapolitika mo e higoa, ti ko e fakahikuaga ha Pilato ke talia e tau ole fakamakamaka he tau Iutaia. Ne tuku age e ia a Iesu. Ne aki he tau kau e tapulu kula uhi ha Iesu mo e fakatui a ia ke he hana tau tapulu fafo. Ha ne takitaki atu a Iesu ke fakatautau, ne fekau ni a ia ke fua hana akau fakakikiveka.

Kua lotoga mogonei e pogipogi he Aho Faraile, ia Nisana 14; liga tata atu ke he magaaho pale laa. Ne ala agaia a Iesu tali mai he pogipogi he Aho Tuloto, mo e loga e tau matematekelea tupu fetui hana. Kua maama, nakai leva ne lolelole a ia ha ko e mamafa he akau. Ti ko ia ne fano he hala, ko Simona ko e Kurene i Aferika kua fekau ke fua e akau ma hana. Ha ne o atu ai a lautolu, kua tokologa e tau tagata, putoia ai e tau fifine ne mumui, kua tagi tatuki mo e tagi aue ki a Iesu.

Kua haga ke he tau fifine, ti pehe a Iesu: “Ko e tau tama fifine a Ierusalema na e, ua tagi kia au; ka kia tagi a mutolu kia mutolu, katoa mo e tau fanau ha mutolu. Kitiala, to hoko mai e tau aho ke tala mai ai e tau tagata, Uhoaki a lautolu ne tufua, mo e tau fifine nakai fanau, mo e tau huhu nakai fakahuhu ai. . . . Kaeke foki kua eke e tau mena nai ke he akau mata, ko e heigoa e mena ke eke ke he akau mago?”

Ko e tala a Iesu ke he akau he motu Iutaia, ne ha ha i ai agaia e pahahu ke moui aki kakano ha ko e ha ha agaia ni a Iesu i ai mo lautolu ne toe ne talitonu ki a ia. Ka ko e magaaho ka utakehe mai a lautolu nei he motu, ko e akau kua mate fakaagaga ni ka toe, e, ko e fakapotopotoaga he motu kua mago. Oi, ko e mena ke tagi aue, ke he magaaho ka o mai e tau kautau Roma, ko e tau fekafekau ka fakaaoga he Atua ke fakahala mo e moumou e motu he tau Iutaia! Ioane 19:​6-17; 18:31; Luka 23:​24-31; Mataio 27:​31, 32; Mareko 15:​20, 21.

▪ Ko e heigoa e hokotaki he tau takitaki lotu ki a Iesu he magaaho ne kaumahala e tau hokotaki fakapolitika ha lautolu ke moua mai e tau fua?

▪ Ko e ha ne au atu e matakutaku ha Pilato?

▪ Ko hai ne fua e hala lahi ke he mena ne tupu ki a Iesu?

▪ Ke he fakahikuaga, taute fefe he tau ekepoa a Pilato ke tuku age a Iesu ke kelipopo?

▪ Ko e heigoa ne tala age e Iesu ke he tau fifine ne tagi ki a ia, mo e ko e heigoa e kakano he tala hana ke he akau “mata” ati “mago” he magaaho fakamui?