Vala 8

Finagalo he Atua kua Fakatolomaki atu ke he Fakamoliaga

1, 2. Fefe e tau fakamonuinaaga kua taute he Atua ke fakamamao mai he matematekelea?

KO E pule he totokoaga he tagata mo e tau temoni kua toho hifo e tau magafaoa he tagata ki kelekele ke he loga e tau senetenari. Ka e, nakai fakatikai he Atua ha tautolu a tau matematekelea. Ka e he tau senetenari oti nei kua taute e ia e tau puhala fakamonuinaaga ke fakatoka mai e tau tagata mai he taofi mau he mahani kelea mo e matematekelea.

² He magaaho he totokoaga i Etena, ne kamata e Atua ke fakakite e hana a finagalo ke fakatu e fakatufono kua taute e lalolagi nei mo kaina parataiso ma e tau tagata. (Kenese 3:15) Nakai leva lahi, ko e takitaki gutu vagahau he Atua ko Iesu kua taute e fakatufono ne hau he Atua ko e mataulu he hana a fakaakoaga. Pehe a ia ko e amaamanakiaga naia ma e tau tagata oti.—Tanielu 2:44; Mataio 6:9, 10; 12:21.

3. Fakahigoa fefe e Iesu e fakatufono ka hau ma e lalolagi, mo e ko e ha?

³ Ne fakahigoa e Iesu e fakatufono ia he Atua ne hau ko e “kautu he lagi,” ha kua pule mai ai he lagi. (Mataio 4:17) Kua fakahigoa foki e ia ko e “kautu he Atua,” ti ko e Atua e hana a Tagata Tohi. (Luka 17:20) Ke he loga e tau senetenari kua omoomoi he Atua hana a tau tagata tohi matapene ke tohi hifo e tau perofetaaga hagaao ki a lautolu kaeke ke taute e fakatufono mo e heigoa ka fakakatoatoa.

Patuiki Fou he Lalolagi

4, 5. Fakakite fefe he Atua ko Iesu kua fifili e ia mo Patuiki?

⁴ Ko Iesu, kua teitei tuai ke ua e afe he tau tau he mole, ne fakamoli e ia e tau perofetaaga loga hagaao ki a ia ka eke mo Patuiki he Kautu he Atua. Kua fakamoli tuai kua fifili he Atua ma e Pule ke he fakatufono ia he lagi ke he tau tagata oti. Mo e he mole atu e hana a mate, kua liu e Atua fakaliu tu mai a Iesu ke he moui he lagi ko e moui fakaagaga, malolo, tino nakai mate. Kua ha ha i ai e loga e tau fakamoli ke he hana a liu tu mai.—Gahua 4:10; 9:1-9; Roma 1:1-4; 1 Korinito 15:3-8.

⁵ Ti “nofo . . . ai a ia ke he fahi matau he Atua.” (Heperu 10:12) Kua fakatalitali a ia ke he magaaho ke foaki age he Atua e malolo ki a ia ke fakagahua e pule Patuiki he Kautu he Atua he lagi. Kua fakamoli ai e perofetaaga nei he Salamo 110:1, he tala age e Atua ki a ia: “Kia nofo a koe ke he haku a lima matau, ato eke e au a lautolu kua fai fi kia koe mo fakatuaga hui hāu.”

6. Fakakite fefe e Iesu kua lata a ia mo Patuiki ke he Kautu he Atua?

⁶ Kua fakakite e Iesu e lata hana ke he tuaga ia he magaaho ne nofo he lalolagi. Pete ne tau favaleaga, kua fifili a ia ke tumau e tua mo e fakamoli ke he Atua. He taute pihia kua fakakite e ia kua pikopiko a Satani he magaaho ne talahau e ia kua nakai fai tagata kua fakamoli ke he Atua ke he tau kamatamata. Ko Iesu ko e tagata mitaki katoatoa, ko e ‘Atamu ke ua aki,’ kua fakakite ko e Atua kua nakai hepe he taute e tau tagata ke he mitaki katoatoa.—1 Korinito 15:22, 45; Mataio 4:1-11.

7, 8. Ko e heigoa e tau mena mitaki ne taute e Iesu he magaaho ne nofo a ia he lalolagi, mo e ko e heigoa ne fakamaama e ia?

⁷ Ko e pule fe ne fakakatoatoa e mitaki tuga a Iesu ke he gahoa he tau tau he hana a gahua ke he fonua? Fakamalolo he agaga tapu he Atua, kua fakamaulu e Iesu e tau tagata gagao, ko e tau kulikuli, ko e tau mata pouli, ko e tau teliga tuli, ko e tau kuhukuhu. Ti maeke foki a ia ke fakaliu tutu mai a lautolu ne mamate! Ne fakakite e ia ke he fua tautau tote e mena ne taute e ia ma e tau tagata oti he lalolagi katoa he magaaho ne hau a ia ke he malolo he Kautu.—Mataio 15:30, 31; Luka 7:11-16.

⁸ Ne taute e Iesu loga e tau mena mitaki he magaaho he nofo a ia he lalolagi ti pehe hana a tutaki ko Ioane: “Ko e falu a mena loga foki ne eke e Iesu; kaeke ke tohi kia oti kana, kua manatu au nakai maeke he toka ai ke he lalolagi e tau tohi ia ka tohi.”—Ioane 21:25.a

9. Ko e ha e tau tagata loto fakamoli kua tafe ai ki a Iesu?

⁹ Kua totonu a Iesu mo e fakaalofa hofihofi noa, kua ha ha i ai e fakaalofa mua ue atu ke he tau tagata. Kua lagomatai e ia e tau tagata mativa mo e nakai fai malolo ka e nakai tiaki e ia e tau tagata monuina po ke fai tuaga. Ko e tau tagata mahani tokolalo kua fanogonogo ke he uiina fakaalofa ha Iesu he magaaho ne pehe a ia: “O mai kia au, ko mutolu oti kua pehia hifo, mo e to fakahauhau e au a mutolu. Kia uta haku a lakau hahamo ki luga ia mutolu mo e fakaako mai ia au, ha kua loto molu mo e loto tokolalo au, mo e to moua e mutolu e fakahauhauaga ma e tau solu ha mutolu. Ha ko e mena totonu haku a lakau hahamo mo e haku a kavega kua mama ia.” (Mataio 11:28-30, NW) Ko e tau tagata ne matakutaku ke he Atua kua tafe mai ki a ia mo e onoono atu ke he hana a pule.—Ioane 12:19.

Feoakiaga mo e Tau Takitaki

10, 11. Ko hai ka felagomatai aki mo Iesu ke pule ke he lalolagi?

¹⁰ Ke tuga e tau fakatufono he tau tagata kua feoaki mo e tau tagata gahua, ti tuga foki e Kautu he Atua he lagi. Ko e falu he taha fahi a Iesu ka felagomatai ke pule ke he lalolagi, kua mavehe e Iesu ke he hana a feoaki fakalataha ka pule mo ia tuga e tau patuiki ke he tau tagata oti.—Ioane 14:2, 3; Fakakiteaga 5:10; 20:6.

¹¹ Ha kua fakalataha a Iesu mo e numela he tau tagata kua fifili ke maeke ke liu tutu mai ke he moui mai he lagi. Kua taute e lautolu e Kautu he Atua ke tamai e tau fakamonuinaaga tukumuitea ke he tau tagata oti. (2 Korinito 4:14; Fakakiteaga 14:1-3) Ti mai he tau tau, kua fakatoka e Iehova e gahua ke he kelekele ke he nofoaga pule ka tamai e tau monuina tukulagi ke he magafaoa fakatagata.

Fakaotiaga he Pule Tu Tokotaha

12, 13. Ko e heigoa he Kautu he Atua kua mau ke taute?

¹² Ke he senetenari nei kua uta he Atua e takitakiaga malolo ke he tau mena fakalalolagi. Ke he vala ke 9 aki he tohi tote fakailoa nei ka fakatutala ko e perofetaaga he Tohi Tapu kua fakakite ko e Kautu he Atua ki lalo hifo ha Keriso kua fakatu he tau 1914 mo e he magaaho nei kua mau ke uulu e fakatokatokaaga katoa ha Satani. Ko e Kautu ia kua neinei ke “pule a [Keriso] ki mua ha lautolu kua fai fi kia koe.”—Salamo 110:2.

¹³ Ke he hagaaoaga nei, ko e perofetaaga kua talahau mai ia Tanielu 2:44: “He tau aho he tau patuiki [kua momoui he mogonei] ko e Atua he lagi to fakatu e kautu [he lagi] to nakai liu moumou foki, mo e pihia foki ke he pule tonu ke nakai toka ke he taha tagata [ko e pule he tagata to nakai fakaata foki]. Ko e [Kautu he Atua] to mumutu valavala ai e ia e tau kautu oti mo e tamai ki a lautolu e fakaotiaga, mo e to tumau a ia tukumalagi.”—Revised Standard Version.

14. Ko e heigoa falu fua aoga ka fua mai ha ko e fakaotiaga he pule he tagata?

¹⁴ Ke he tau pule tu tokotaha mai he Atua to uta kehe ai he puhala, ko e Kautu he Atua to pule katoa ai ke he lalolagi. Ha ko e Kautu to pule mai he lagi, to nakai fakakelea ai he tau tagata. Ko e Fakatufono malolo to tuga ni e mena ne ha ha i ai fakamua, ke he lagi, mo e Atua. Ha ko e pule he Atua to taofi mai ke he lalolagi katoa, to nakai fai tagata ke fakahehe he tau lotu fakavai po ke tau pulotu nakai mitaki he tau tagata mo e tau fakaakoaga fakapolitika. To nakai fakaata e tau mena ia ke ha ha i ai.—Mataio 7:15-23; Fakakiteaga, tau veveheaga 17 ke he 19.

[Matahui Tala]

[Fakatino he lau 18]

He nofo a Iesu he lalolagi kua fakamaulu e ia e tau gagao mo e fakaliu tu mai e tau mamate ke fakakite e mena ke taute e ia he lalolagi fou

[Fakatino he lau 19]

Ko e Kautu he Atua he lagi ka uulu kehe e moui he tau fakatufono kehekehe kua tu tokotaha e pule ki a ia