Vala 9
Iloa Fefe e Tautolu ko Tautolu ha he “Tau Aho Fakamui”
1, 2. Iloa fefe e tautolu ko tautolu ke he tau aho fakahikuhiku?
ILOA fefe e tautolu kua nonofo a tautolu ke he tau magaaho ka fakagahua he Kautu he Atua ke totoko atu ke he fakatokatokaaga he pule he tagata ke he magaaho nei? Iloa fefe e tautolu kua tata lahi mai e magaaho ke tamai he Atua e fakaotiaga ke he tau mahani kelea oti mo e matematekelea?
2 Ko e tau tutaki oti ha Iesu Keriso kua manako ke iloa e tau mena nei. Kua huhu a lautolu ki a ia ko e heigoa e “fakamailoga” ke he hana a hauaga ke he malolo he Kautu “mo e fakaotiaga he lalolagi.” (Mataio 24:3) Ne tali e Iesu aki e tala katoa ke he tau mena tutupu ne lulululu aki e lalolagi mo e tau tuaga kua maeke ke tuku auloa ke fakakite ko e tau tagata kua huhu atu “ke he vaha ke fakahiku ai,” “ko e tau aho fakamui” ke he fakatokatokaaga nei. (Tanielu 11:40; 2 Timoteo 3:1) Ko tautolu nakai he senetenari nei kua kitia e fakamailoga kua kehe? E, kua fita, e fua loga mai pihia!
Tau Tauaga he Lalolagi
3, 4. Hu fefe e tau tauaga he senetenari nei ke he perofetaaga ha Iesu?
3 Kua talahau mai e Iesu ko e “to laga e taha motu ke he taha motu, ko e taha kautu ke he taha kautu.” (Mataio 24:7) He tau 1914 kua putoia e lalolagi ke he tauaga ne kitia ke he tauteuteaga he tau motu mo e tau kautu ke he puhala kua kehe mai he ha tauaga fakamua. Ke he mailogaaga he moli ia, ko e tau tagata fakamau tala tuai he magaaho ia kua fakahigoa ko e Tauaga Lahi Mahaki. Ko e tauaga fakamua kua fai kehe he fakamauaga tala tuai, ko e tauaga fakamua he lalolagi. Ko e tau kautau mo e tau tagata noa 20,000,000 kua galo e tau momoui, mua atu mai he ha tauaga fakamua.
4 Kua fakamailoga e Tauaga I he Lalolagi ko e kamataaga he tau aho fakamui. Ne pehe a Iesu ko e mena nei mo e falu mena tutupu “ko e kamataaga ia he tau mena matematekelea.” (Mataio 24:8) Kua fakamoli e mena ia, ko e Tauaga II he Lalolagi kua mua atu ne mamate, falu kautau mo e tau tagata noa 50,000,000 kua galo ha lautolu a tau momoui. Ke he senetenari nei ke 20 aki, kua molea lahi e 100,000,000 he tau tagata kua mamate ke he tau tauaga, kua molea e fakalahi fa he loga, mai he 400 he tau tau ka lafi fakalataha! Ko e moumouaga lahi ha ia he pule he tagata!
Falu he Tau Fakamoliaga
5-7. Ko e heigoa falu fakamoliaga ko tautolu ha he tau aho fakamui?
5 Kua lafi e Iesu e falu mena ne fakalataha ke he tau aho fakamui: “To ha i ai e tau mafuike lalahi ke he taha mena mo e taha mena, ko e tau hoge foki, mo e tau tatalu [tau gagao lalahi].” (Luka 21:11) Kua hu mitaki e tau mena ia tali mai he tau 1914, ti kua ha ha i ai e tau tolomakiaga mahaki ke he tupetupe mai he tau matematekelea pihia.
6 Ko e tau mafuike lalahi kua kitia tumau, uta ai loga e tau momoui. Ko e gagao Sepania hokoia kua tamate ai kavi ke he 20,000,000 he tau tagata he mole atu e Tauaga I he Lalolagi—falu fuafua ai ko e 30,000,000 po ke molea. Ko e AIDS kua uta ai e teau he tau afe he tau momoui mo e to uta ai e loga he miliona he vaha mai i mua. He tau tau takitaha kua tokologa e tau tagata kua mamate ha ko e tau kafokia he ate, kenesa, mo e falu gagao foki. Molea e miliona kua mamate fakatekiteki ha ko e hoge. Kua nakai fai fakauaua “ko e tau tagata heke nua he Apakalifa” mo e ha lautolu a tau tauaga, kuku he tau mena kai mo e tau gagao loga kua maeke ai ke mumutu hifo e tau numela lalahi he magafaoa he tagata ne kamata mai he tau tau 1914.—Fakakiteaga 6:3-8.
7 Kua talahau foki e Iesu e tolomakiaga he tau favale kua kitia ai ke he tau motu oti. Kua pehe a ia: “Ha ko e tupu lahi he tau mahani kolokolovao ko e fakaalofa he tokologa kua momoko.”—Mataio 24:12, NW.
8. Hu fefe e perofetaaga ia 2 Timoteo veveheaga 3 ke he vaha ha tautolu?
8 Fakalaulahi atu, kua talahau mai tuai he perofetaaga he Tohi Tapu ke he malipiaga mafiti he mahani fakamoli ke he lalolagi he vaha nei: “Ke he tau aho fakahikuhiku to ha ha i ai e uka ke gahua ki ai. Ko e tau tagata to fakaalofa ni a lautolu ki a lautolu, fakaalofa ke he tau tupe, manamanatu ni ki a ia, lotokai, tau favale, faliuliu ke he tau mamatua, nakai fai fakaaue, nakai fakamoli, to nakai fai manatu hohofi, nakai fai taliaaga, pikopiko, nakai taofi e ia a ia, vale, nakai fakaalofa ke he mitaki, kelipopo tagata, ulu kafilo, fakatokoluga teao, fakaalofa ni ke he tau mena fakafiafia ka e nakai fakaalofa ke he Atua, ke ha ha i ai e vahega he mahani atua fakamoli ka e fakakite ni e fakavai ke he hana malolo; . . . Ko e tau tagata mahani kelea mo e tokolalo kua tolomaki mai he kelea ke he kelea mahaki.” (2 Timoteo 3:1-13, NW) Ko e tau mena oti ia kua moli ke he ha tautolu a tau mata.
Ko e Taha Fakamoliaga
9. Ko e heigoa e mena ne tupu ke he lagi kua fetatai mo e kamataaga he tau aho fakamui he lalolagi?
9 Ko e taha fakamoliaga kua fakalago ki ai e tupu lahi he matematekelea he senetenari nei. Fakaoti aki e kamataaga he tau aho fakamui he tau 1914, fai mena ne tupu ke maeke he tau tagata ke ha ha i ai e matematekelea lahi mahaki. He magaaho ia he perofetaaga he tohi fakahiku he Tohi Tapu kua fakakite: “Kua tau foki a lautolu he lagi; ko Mekaeli [Keriso ke he malolo he lagi] mo e hana tau agelu kua tau ke he tarako [Satani], ko e tarako foki kua tau a ia mo e hana tau agelu [tau temoni]; Ka e nakai kautu a lautolu, ti nakai tuai moua foki ha mena ke he lagi ke nonofo ai a lautolu. Ti liti hifo ni e tarako lahi, ko e gata tuai haia, kua higoa ko e tiapolo, ko Satani foki ia, ko ia kua fakahehe e lalolagi oti; kua liti hifo a ia ke he lalolagi, kua liti hifo foki hana tau agelu fakalataha mo ia.”—Fakakiteaga 12:7-9.
10, 11. Lauia fefe e tau tagata he magaaho ne liti hifo a Satani mo e hana tau temoni ke he lalolagi?
10 Ti ko e heigoa e tau matapatu mena ma e magafaoa fakatagata? Kua matutaki atu e perofetaaga: “Oi fakaalofa kia mutolu kua nonofo ke he fonua mo e tahi, ha kua hifo kia mutolu e tiapolo kua ita lahi, ha kua iloa e ia kua tote hana vaha.” E, iloa e Satani ko e hana a fakatokatokaaga kua tata lahi ke he fakaotiaga, ti kua taute e ia e tau mena oti ke liliu kehe e tau tagata mai he Atua to uta kehe a ia mai he puhala. (Fakakiteaga 12:12; 20:1-3) Ko e tokolalo ha ia he tau mena momoui fakaagaga ia ha kua fakaaoga fakahehe e lautolu ha lautolu a finagalo tokanoa! Ko e kelea lahi ha ia he tau tuaga kua ha ha he lalolagi ki lalo hifo he ha lautolu a fakaohoohoaga, mua atu ke he tau 1914!
11 Ti ko e mena ia ne talahau tuai e Iesu e ha tautolu a vaha: “Ha he lalolagi foki e matematekelea he tau motu ke he fakahakuhaku; . . . To mamate foki e tau tagata he matakutaku mo e talifaki ke he tau mena ke hohoko mai ke he lalolagi.”—Luka 21:25, 26.
Kua Tata e Fakahikuaga ke he Pule he Tagata mo e Temoni
12. Ko e heigoa taha he tau perofetaaga fakahiku ne toe ke fakamoli to hoko e fakaotiaga he fakatokatokaaga nei?
12 Fiha e tau perofetaaga he Tohi Tapu ne toe ke fakamoli to moumou he Atua e fakatokatokaaga nei? Gahoa lahi! Ko e taha mai he fakaotiaga kua fakakite mai ia 1 Tesalonia 5:3: “Kaeke kua vagahau a lautolu ke he mafola mo e nakai haofia, to hoko mai fakalutukia e matematekelea ki a lautolu.” (The New English Bible) Kua fakakite he mena nei ko e fakahikuaga he fakatokatokaaga nei to kamata “kaeke kua vagahau a lautolu.” Ha kua nakai kitia he lalolagi, to hoko mai e fakahikuaga ka e nakai amaamanaki ki ai, he magaaho ka manamanatu e tau tagata ke he ha lautolu a amaamanakiaga ma e mafola mo e nakai haofia.
13, 14. Ko e magaaho matematekelea fe ne talahau tuai e Iesu, mo e to fakahiku fefe?
13 Ko e magaaho kua ku lahi ma e lalolagi nei ki lalo hifo he fakaohoohoaga ha Satani. Kua tata lahi mai ti hoko e fakahikuaga ke he magaaho vihi ne talahau e Iesu: “Ha ko e vaha ia ke lahi ai e matematekelea, nakai pihia taha mena tali mai he kamataaga he lalolagi, kua hoko ni ke he vaha nai; ti nakai tuai pihia foki.”—Mataio 24:21.
14 Ko e kitiaga he ‘matematekelea lahi’ ko e tauaga he Atua i Amaketo. Ko e magaaho haia ne vagahau ai e perofeta ko Tanielu he magaaho ka “tuki malipilipi mo e fakaotioti” he Atua “e tau kautu oti ia.” Ko e kakano hanei to fakaoti ke he tau takitaki pule tu tokotaha he tagata mai he Atua. Ko e hana Kautu ne pule mai he lagi to hukui katoatoa ke takitaki e tau mena he tagata. To nakai liu foki talahau e Tanielu ko e fakatufono ke toka “atu ai ke he taha motu.”—Tanielu 2:44; Fakakiteaga 16:14-16.
15. Ko e heigoa e mena ka tupu ke he fakaohoohoaga ha Satani mo e hana a tau temoni?
15 Ke he magaaho ia ko e tau fakaohoohoaga fakasatani mo e temoni to moumou foki. Ko e tau mena momoui fakaagaga kua uta kehe ai he puhala ke nakai liu a lautolu ke “fakahehe . . . e tau motu.” (Fakakiteaga 12:9; 20:1-3) Kua fakahoko ki a lautolu e mate mo e fakatali ai ke he fakatulakiaga. Ko e totoka ha ia ma e tau tagata ke tokanoa mai he ha lautolu a fakaohoohoaga kelea ia!
Ko Hai ka Hao? Ko Hai ka Nakai?
16-18. Ko hai ka hao mai he fakaotiaga he fakatokatokaaga, mo e ko hai ka nakai?
16 He fakafiliaga he Atua ka fakahoko ke he lalolagi nei, ko hai ka hao? Ko hai ka nakai? Kua fakakite mai he Tohi Tapu ko lautolu ne manako ke he pule he Atua ka puipui mo e hao mai. Ko lautolu ne nakai manako ke he pule he Atua ka nakai puipui ka e to fakahiku fakalataha mo e lalolagi ha Satani.
17 Kua talahau mai ia Fakatai 2:21, 22: “Ha ko lautolu ne mahani hakohako [lautolu ne muitua ke he pule he Atua] to nonofo a lautolu ke he motu; mo lautolu ne katoatoa e mitaki ha lautolu a mahani to toe ai a lautolu; Ka to vevehe kehe mai he motu a lautolu ne mahani kelea [lautolu ne nakai muitua ke he pule he Atua], to taaki ai foki a lautolu ne mahani fakavai.”
18 Talahau mai foki he Salamo 37:10, 11: “Toe tote, ti nakai ha i ai e tagata mahani kelea; . . . Ka ko e tau tagata mahani molu, to eke ma lautolu e motu; ti fakafiafia foki e lautolu a lautolu ha ko e monuina kua lahi.”Salamo 37 Kupu 29 kua lafi ki ai: “To eke ni e motu ma e tau tagata tututonu, to nonofo muatua ai a lautolu.”
19. Ko e poakiaga fe ka uta e tautolu ke he loto?
19 Ki a uta e tautolu ke he tau loto e poakiaga ia Salamo 37:34, ne fakakite mai: “Kia talifaki a koe kia Iehova, mo e tumau ke he hana puhala; ti fakamatalahi e ia a koe ke eke māu e motu; to kitia e koe e tau tagata mahani kelea kua mahakava.” Kua pehe mai e Salamo 37 kupu 37 mo e 38: “Kia manamanatu kia ia kua mahani hakohako, mo e kitekite kia ia kua mahani tonu; ha ko e fakahikuaga he tagata ia ko e monuina haia. Ka e mahaikava fakalataha e tau holifono; ko e fakahikuaga foki he tau tagata mahani kelea ko e malaia haia.”
20. Ko e ha ne pehe a tautolu ko e tau magaaho fiafia a nei ne nonofo a tautolu?
20 E, kua mafanatia ha ia, kua omoomoi he mena ia ke iloa kua leveki moli e Atua mo e tata lahi mai to tuku e ia e fakaotiaga ke he mahani kelea oti mo e matematekelea! Ko e ofoofogia ha ia ke mailoga ko e fakamoliaga he tau perofetaaga mitaki ia kua mua ue atu kua tata lahi e magaaho!
[Fakatino he lau 20]
Kua talahau tuai he Tohi Tapu e tau mena ka tutupu ke taute “e fakamailoga” he tau aho fakamui
[Fakatino he lau 22]
Tata mai ia Amaketo ko lautolu ne nakai muitua ke he pule he Atua ka mumutu kehe. Ko lautolu ne muitua ka hao ke he lalolagi tututonu fou