Ko Hai Moli kua Pule ke he Lalolagi?

To tokologa e tau tagata ka tali kupu taha e huhu i luga—Atua. Ka e mua ue atu e mena ke mailoga, kua nakai fai mena i loto he Tohi Tapu kua pehe ko Iesu Keriso po ke hana Matua e tau pule moli he lalolagi nei. Kua kehe lahi, he pehe a Iesu: “To vega ainei e iki he lalolagi nai.” Mo e lafi atu a ia: “Ha ko e hau ne fai e iki he lalolagi nei, ka e nakai moua e ia taha mena kia au.”—Ioane 12:31; 14:30; 16:11.

Ti kua totoko e pule he lalolagi nei ki a Iesu. Ko hai a nei?

Fakakite Maiaga he Tau Tutuaga he Lalolagi

Pete ai ni he lali e tau tagata loto mitaki, ne matematekelea lahi mahaki e lalolagi talimai i tuai. Ne fakatutupu he mena nei e tau tagata manamanatu ke manamanatu hifo, tuga ne taute he tagata tohia tohi kua mole atu ko David Lawrence: ‘“Mafola ke he lalolagi’—kua teitei e tau tagata oti ke manako ki ai. ‘Fioia mitaki ke he tau tagata’—kua teitei oti e tau tagata he lalolagi ke logona hifo e mena ia ke he taha mo e taha. Ti ko e heigoa mogoia e lekua? Ti ko e ha ne fakaneinei mai ai e tau, pete ni kua pihia e tau manako he tau tagata?”

Kua tuga ko e fekeheaki, nakai kia? He magaaho kua manako pauaki e tau tagata ke momoui mafola, ne fa mahani lahi ke vihiatia mo e keli e taha e taha—mo e kua mahani vale lahi. Kia manamanatu ke he tau mahani vale kua molegia e kelea lahi kua taute mo e nakai fai manamanatuaga. Ne fakaaoga he tau tagata e tau poko kese, tau kemu pagota, tau fana puhoafi, tau pomo napama, mo e falu puhala kelea ue atu ke fakakikiveka mo e tamate aki he taha e taha mo e nakai fai fakaalofa hofihofi.

Kua tali tonu nakai a koe kua maeke e tau tagata ne manako lahi ke he mafola mo e fiafia lahi, ke taute e tau mahani kelea mahaki ue atu pihia ke he falu tagata? Ko e heigoa e tau momoui malolo ne omoomoi aki e tau tagata ke taute e tau mahani vihiatia lahi ia po ke utauta a lautolu ki loto he tau tutuaga kua fakaohooho a lautolu ke logona hifo kua lata lahi ke taute e tau mena kelea lahi mahaki? Ne kua manamanatu nakai a koe po kua ha ha i ai e tau mena momoui kelea, ko e malolo nakai kitia ne fakalagalaga e tau tagata ke taute e tau gahua mahani vale pihia?

Ne Fakakite Mai e Tau Pule he Lalolagi

Kua nakai lata ke tali pouli e mena, ha kua fakakite fakamaaliali mai he Tohi Tapu e mena moui iloilo, ko e peresona nakai maeke ke kitia hane fa e takitaki e tau tagata mo e tau motu. Kua pehe mai: “Ka ko e lalolagi oti ha he pule hana kua mahani kelea.” Mo e kua fakakite mai he Tohi Tapu a ia, he pehe mai: “Kua higoa ko e tiapolo, ko Satani . . . kua fakahehe e lalolagi oti.”—1 Ioane 5:19; Fakakiteaga 12:9.

He magaaho ne “kamatamata ai he tiapolo” a Iesu ne nakai fakauaua a Iesu ke he matagahua ha Satani ko e pule he lalolagi nei. Ne fakamaama mai he Tohi Tapu e mena ne tupu: “Ti liu foki uta a ia he tiapolo ke he taha mouga ne tokoluga ue atu, kua fakakite atu foki kia ia e tau kautu oti he lalolagi, mo e lilifu ha lautolu; Ti tala age ai a ia kia ia, To ta atu e au e tau mena oti nai kia koe, kaeke ke fakaveli mo e hufeilo mai a koe kia au. Ti tala age ai a Iesu kia ia, Ati fano kehe a a koe ma Satani.”—Mataio 4:1, 8-10.

Kia manamanatu la ke he mena nei. Ne kamatamata e Satani a Iesu he foaki atu ki a ia e “tau kautu oti he lalolagi.” Ka e, kua eke moli kia e foakiaga mena a Satani mo kamatamata moli kaeke kua nakai ko e pule moli a Satani ke he tau kautu ia? Nakai, kua nakai eke ke pihia. Mo e mailoga la, ne nakai fakatikai e Iesu ko e tau fakatufono fakalalolagi oti nei ko e tau mena a Satani, ko e mena to talahau ai ni e ia kaeke kua nakai fai malolo a Satani ki luga ia lautolu. Ha kua pihia mogoia, kua moli ai ni ko Satani ko e Tiapolo e pule nakai kitia he lalolagi! Kua moli ni ne ui he Tohi Tapu a ia ko e “atua he lalolagi nai.” (2 Korinito 4:4) Ka e, moua fefe he peresona mahani kelea pihia e tuaga malolo lahi nei?

Ko ia ne eke ko Satani ko e taha agelu ne tufugatia he Atua, ka e mahekeheke a ia he fia loto ke he tuaga he Atua. Ne paleko atu a ia ke he tonuhia he pule he Atua. Ha ko e mena ia ne fakaaoga e ia e gata mo gutu hana ke fakavai aki e fifine fakamua ko Eva, mo e kua maeke ai ke taute a ia mo e tane hana, ko Atamu, ke taute e poakiaga hana mo e nakai omaoma ke he Atua. (Kenese 3:1-6; 2 Korinito 11:3) Ne pehe foki a ia ko e maeke a ia ke liliu kehe oti mai he Atua e tau fanau kua nakai la fanau mai ha Atamu mo Eva. Ti kua fakaata he Atua e magaaho ke lali a Satani ke fakamoli hana talahauaga, ka e nakai kautu a Satani.—Iopu 1:6-12; 2:1-10.

Ka e mua ue atu ke mailoga, nakai ko ia ni ko Satani hokoia i loto he hana pule ke he lalolagi. Ne kautu lahi a ia he fakaohooho e falu he tau agelu ke totoko fakalataha mo ia ke he Atua. Kua eke a lautolu nei mo tau temoni, ko e hana tau kaufakalataha fakaagaga. Ne vagahau e Tohi Tapu ki a lautolu he magaaho ne ole fakamakamaka atu ke he tau Kerisiano: “Kia maeke ia mutolu ke totoko atu ke he tau lagatau he tiapolo. Ha ko e mena nakai tau a tautolu ke he tau tagata, ka ko e tau iki lalahi, mo e tau pule, mo e tau iki he pouli ha he lalolagi nai, katoa mo e tau agaga kelea ke he tau mena ha he lagi.”—Efeso 6:11, 12.

Totoko ke he Tau Agaga Kelea

Nakai kitia a lautolu nei, ko e tau pule mahani kelea he lalolagi kua mauokafua e tau loto ke fakahehe e tau tagata oti kana, ke liliu kehe a lautolu mai he tapuaki he Atua. Taha mai e puhala ne taute he tau agaga kelea e mena nei he fakalagalaga e manatu ko e hao mai ka mole atu e mate, pete ni kua fakakite fakamaaliali mai he Kupu he Atua ko e nakai iloa mena a lautolu ne mamate. (Kenese 2:17; 3:19; Esekielu 18:4; Salamo 146:3, 4; Fakamatalaaga 9:5, 10) Ti kua fifitaki he agaga kelea e leo hana ne mate, ti liga tutala atu ke he taha he tau faoa ne moui agaia po ke ke he tau kapitiga, kua puhala mai he taulatua po ke puhala mai he “leo” he mena nakai kitia. Ne fakatupua e “leo” ke eke ko ia ne mole atu, ka ko e temoni moli ni!

Ha ko e mena ia, kaeke kua logona e koe e taha “leo” pihia, kia nakai fakahehe a koe. Kia tiaki e tau mena ne talahau, mo e fakataogo e tau kupu a Iesu: “Ati fano kehe a a koe ma Satani”! (Mataio 4:10; Iakopo 4:7) Kia nakai fakaata e mahalohalo ke he tau mena nakai kitia he tau agaga ke omoi a koe ke putoia fakalataha mo e tau agaga kelea. Ne fakahigoa e putoiaaga ia ko e gahua fakaagaga kelea, mo e kua hataki mai e Atua ki a lautolu ne tapuaki ki a ia ke totoko ke he hana tau vahega mena oti. Ne fakahala he Tohi Tapu a “taha kua kumi ke he tau fakamailoga, . . . taha kua kumi ke he tau atua, po ke taha ne ha i ai e tau agaga talahau tuai, po ke taha kua kumi atu kia lautolu ne mamate.”—Teutaronome 18:10-12; Kalatia 5:19-21; Fakakiteaga 21:8.

Ha kua fakahufia he gahua fakaagaga kelea e tagata ki lalo he malolo he tau temoni, kia totoko atu ke he tau tauteaga mena hana, pete ni kua tuga ko e fulufuluola lahi e fakafiafiaaga po ke mena fiafia. Kua fakalataha ke he tau tauteaga nei e onoono fua lupo veliveli, fakaaoga e tau lapalapa Ouita, loto iloa mena tuai (ESP), onoono ke he vate he alolima (totou alolima), mo e onoono aolagi. Ne fakakali foki he tau temoni mo e fakatupu e falu mana fakaofo i loto he tau fale kua taute e lautolu mo tau nonofoaga ha lautolu.

Ke lafi ki ai, ne fakaaoga he tau agaga kelea e loto pilo agahala he tau tagata he omoi e tau tohi, tau kifaga, mo e tau fakaholoaga televisoni kua fakakite e tau ata mahani kelea mo e tau feuaki kua nakai lata. Kua iloa he tau temoni kaeke kua nakai poka kehe mai he loto manamanatu e tau manatu hehe to hu tumau ai e tau mena ia mo e to takitaki e tau tagata ke mahani kelea—tuga a lautolu ni ko e tau temoni.—Kenese 6:1, 2; 1 Tesalonia 4:3-8; Iuta 6.

Moli, kua tokologa e tau tagata ne fakafiu ke he manatu ko e pule e tau agaga kelea ke he lalolagi nei. Ka kua nakai fakaofo mai ha lautolu nakai tali tonu, ha kua pehe e Tohi Tapu: “Ha ko Satani ni kua faliu e ia a ia mo agelu he maama.” (2 Korinito 11:14) Ko e hana fakavaia iloilo lahi ue atu he fakamatapouli e tau tagata tokologa ke he mena moli ko e moui moli a ia mo e tau temoni hana. Ka e kia nakai fakavaia! Ko e mena moui moli e Tiapolo mo e hana tau temoni, mo e kua lata a koe ke totoko tumau ki a lautolu.—1 Peteru 5:8, 9.

Kua fiafia lahi ni, ha kua tata mai e magaaho ka nakai ha ha i hinai a Satani mo e hana tau kaukelea! “Ha ne mole atu foki e lalolagi katoa [fakalataha mo e hana tau pule ko e tau temoni],” ne fakamafana mai e Tohi Tapu, “ka ko e tagata kua eke e finagalo he Atua to tumau a ia tukulagi.” (1 Ioane 2:17) Ko e fakahauhauaga ha, ka uta kehe e malolo kelea ia! Kia eke ai a tautolu ha kua pihia, ke ha ha ia lautolu ne taute e finagalo he Atua mo e olioli e moui tukulagi ke he lalolagi tututonu fou he Atua.—Salamo 37:9-11, 29; 2 Peteru 3:13; Fakakiteaga 21:3, 4.

Ane mai kua kehe e mena ne fakakite, ne moua mai e tau fatiaga kupu Tohi Tapu oti kana he Tohi Tapu Niue. Ko e NW ne fakakite, ne muitua ke he fatiaga kupu, kua taute mai e liliuaga he New World Translation of the Holy Scriptures, vagahau Peritania.

[Fakatino he lau 4]

Kua maeke kia a Satani ke foaki atu ki a Iesu e tau fakatufono oti nei he lalolagi kaeke ke nakai ko e tau mena hana?