Veveheaga 16
Puhala ke Maeke a Koe ke Fakatata Atu ke he Atua
1. Ko e heigoa e tau tataiaga kua fakamoli ke he loga he tau lotu?
KUA ofogia e tagata fano fenoga ne ahiahi atu ke he motu he Fahi Uta ke he tau fakaholoaga fakalotu ne kitia e ia ke he faituga faka-Puta. Pete ni ko e tau fakatai ta kua nakai ha Maria po ke ha Keriso, kua loga e tau fakaholoaga ne tatai mo e tau mena he lotu hana he motu ne nofo ai a ia. Ke tuga a nei, ne mailoga e ia e tau fakaaogaaga he tau kahoa mo e lologo he tau liogi. Kua pihia foki e fakatataiaga he falu. Ko e Fahi Lalo mo e Fahi Uta, ko e tau laliaga he tau tagata loto fakamoli ke fakatata atu ke he Atua po ke ke he ha lautolu a tau mena tapuaki kua fetataiaki.
2. Kua fakamaama e liogi ke he puhala fe, mo e ko e ha kua liogi ai e tokologa he tau tagata?
2 Tokologa kua lali ke fakatata atu ke he Atua he liogi ki a ia. Kua fa fakamaama mai ai ko e liogi ke eke “ko e matutakiaga he tagata mo e mena tapu—Atua, ko e tau atua, ko e matakavi ne mua ue atu e tokoluga, po ke tau malolo kua kehe.” (The New Encyclopædia Britannica) Ka e, he magaaho ne o atu ke he Atua he liogi, ko e falu kua manatu ni hagaao ke he mena ka moua e lautolu mai i ai. Ke fakatai ki ai, kua huhu ai e taha tagata tane he taha magaaho ke he taha he Tau Fakamoli a Iehova: “Kaeke ke liogi a koe ma haku, to uta kehe nakai e tau lekua ne moua e au i loto he haku a magafaoa, ke he gahuaaga, mo e ke he malolo tino haku?” Kua maaliali ai kua pihia e manatu he tagata tane, ka e tokologa kua liogi mo e moua kua ha ha agaia e tau lekua ha lautolu. Ti kua liga huhu a tautolu, ‘Ti ko e ha kua lata ai ia tautolu ke fakatata atu ke he Atua?’
KO E HA NE FAKATATA ATU KE HE ATUA
3. Kua lata e tau liogi ha tautolu ke fakahako atu ki a hai, mo e ko e ha?
3 Nakai ko e fakaholoaga nakai fai kakano e liogi, nakai foki ko e puhala noa ke moua ai falu mena. Ko e kakano ne mua atu he o atu ke he Atua ke moua e fakafetuiaga tata mo ia. Kua lata ai e tau liogi ha tautolu ke fakahako atu ke he Atua ko Iehova. “Kua tata mai a Iehova kia lautolu oti kana ne ui atu kia ia,” he talahau he salamo ko Tavita. (Salamo 145:18) Kua uiina e Iehova a tautolu ke o mai ke he fakafetuiaga mafola mo ia. (Isaia 1:18) Ko lautolu ne talia e uiina nei kua talia mo e salamo ne kua talahau: “Ka ko au, ko e mitaki ia au ke fakatata ke he Atua.” Ko e ha? Ha ko lautolu ne fakatata atu ke he Atua ko Iehova ka olioli e fiafia moli mo e mafola e manamanatuaga.—Salamo 73:28.
4, 5. (a) Ko e ha kua aoga ai ke liogi ke he Atua? (e) Ko e faga fakafetuiaga fefe ka ati hake e tautolu mo e Atua he puhala mai he liogi?
4 Ko e ha ne liogi ke he Atua ma e lagomatai ka ‘kua fioia e ia kua nonofogati ai a tautolu, ka e nakaila ole atu a mutolu kia ia’? (Mataio 6:8; Salamo 139:4) Kua fakakite mai he liogi kua tua a tautolu ke he Atua mo e onoono atu ki a ia ko e Punaaga he “tau mena mitaki oti kua foaki noa mai, katoa mo e tau mena fakaalofa oti kua katoatoa ai e mitaki.” (Iakopo 1:17; Heperu 11:6) Kua fiafia a Iehova ke he ha tautolu a tau liogi. (Tau Fakatai 15:8) Kua fiafia a ia ke logona ha tautolu a tau talahauaga mai he loto fakaaue mo e fakaheke, ke tuga foki e matua tane ne olioli he logona e hana tama tote ne vagahau e tau kupu oue tulou mo e moli. (Salamo 119:108) Ka ha ha i ai e fakafetuiaga mitaki he vahaloto he matua tane mo e tama, kua ha ha i ai e matutakiaga mafanatia. Ko e tama ne ofania kua manako ke tutala ke he hana a matua tane. Kua tatai e moli ke he ha tautolu a fakafetuiaga mo e Atua. Kaeke kua loto fakaaue moli a tautolu ke he tau mena ha tautolu ne fakaako ki a Iehova mo e ke he fakaalofa ne fakakite mai e ia ma tautolu, to ha ha ia tautolu e manako lahi ke talahau e tau mena ha tautolu ki a ia ke he liogi.—1 Ioane 4:16-18.
5 He magaaho ka o atu ke he Atua Mua Ue Atu, kua lata ia tautolu ke fakalilifu, ti kua nakai lata ke fakatupetupe ke he tau kupu tonu ke fakaaoga. (Heperu 4:16) Kua fai puhala tumau a tautolu ki a Iehova. Mo e ko e monuina ha ia he maeke a tautolu ke ‘fakatokanoa e tautolu ha tautolu a tau loto’ ke he Atua he liogi! (Salamo 62:8) Ko e loto fakaaue ma Iehova ka takitaki atu ke he fakafetuiaga mitaki mo ia, tuga ne olioli he tagata tua fakamoli ko Aperahamo ko e kapitiga he Atua. (Iakopo 2:23) Ka e he magaaho ka liogi ke he Iki Pule Katoatoa he lagi mo e lalolagi katoatoa, kua lata ia tautolu ke fakatatai atu mo e tau poakiaga hana he o atu ki a ia.
TAU POAKIAGA KE FAKATATA ATU KE HE ATUA
6, 7. Pete ni he nakai poaki mai e Atua ke fai totogi ke logona ha tautolu a tau liogi, ko e heigoa kua poaki mai e ia ki a tautolu ke taute he magaaho ka liogi ai a tautolu?
6 Kua lata ka ke fai tupe ke o atu ke he Atua? Tokologa e tau tagata ne totogi e tau akoako ke liogi ma lautolu. Kua talitonu foki e falu to logona ai e tau liogi ha lautolu ka fuafua atu ke he mena fakaalofa ne foaki e lautolu. Ka e, nakai talahau mai he Kupu he Atua kua lata a tautolu ke foaki e tau tupe ke maeke ke o atu ki a Iehova he liogi. Ko e hana a tau foakiaga mo e tau fakamonuina he fakafetuiaga mo ia he liogi kua moua ai mo e nakai fai totogi.—Isaia 55:1, 2.
7 Ko e heigoa, mogoia, kua lata? Ko e aga hako mai he loto e taha mena kua mua atu. (2 Nofoaga he Tau Patuiki 6:29, 30; Tau Fakatai 15:11) He ha tautolu a loto kua lata ia tautolu ke fakagahuahua e tua ke he Atua ko Iehova ko e “fanogonogo liogi” mo “ko ia foki kua taui mai a lautolu kua kumi fakamakutu kia ia.” (Salamo 65:2; Heperu 11:6) Kua lata foki ia tautolu ke moua e loto mahani fakatokolalo. (2 Tau Patuiki 22:19; Salamo 51:17) I loto he taha fakataiaga hana, ne fakakite e Iesu Keriso ko e he magaaho ne o atu ke he Atua kua kitia e mua atu he tututonu he telona loto holoilalo ke he Farasaio fakaikaluga. (Luka 18:10-14) He o atu a tautolu ke he Atua he liogi, kia lata a tautolu ke manatu “kua vihiatia e Iehova a lautolu oti, takitaha ne loto fakatokoluga.”—Tau Fakatai 16:5.
8. Kaeke ke manako a tautolu ke tali he Atua ha tautolu a tau liogi, kua lata a tautolu ke fakamea a tautolu mai he heigoa?
8 Kaeke kua manako a tautolu ke tali he Atua ha tautolu a tau liogi, kua lata ia tautolu ke fakamea a tautolu mai he mahani agahala. He magaaho ne fakamafana he tutaki ko Iakopo e falu ke fakatata atu ke he Atua, ne lafi atu a ia: “Ko e tau tagata hala na e, kia holoholo a ha mutolu a tau lima, ko mutolu, ko e tau tagata lotolotoua kia fakamea ha mutolu a tau loto.” (Iakopo 4:8) Kua eke foki e tau tagata taute mena hepehepe ke o atu ki loto he fakafetuiaga mafola mo Iehova kaeke ke tokihala a lautolu mo e toka e tau puhala tuai he moui ha lautolu. (Tau Fakatai 28:13) Kua nakai maeke a tautolu ke moua e logonaaga mo Iehova ka fakatupua a tautolu kua fakamea tuai ha tautolu a tau puhala. “Ha kua hagao e na fofoga he Iki ke he tau tagata tututonu, kua fanogonogo mai foki hana tau teliga ke he tau liogi ha lautolu. Ka kua fofoga mai e Iki mo e ita ke he tau tagata mahani kelea,” he talahau he Kupu he Atua.—1 Peteru 3:12.
9. Ko hai ka puhala atu a tautolu ki a Iehova, mo e ko e ha?
9 Kua talahau he Tohi Tapu: “Nakai ni ha ha i ai ha tagata tututonu ke he lalolagi, kua eke e mahani mitaki, mo e nakai hala ia.” (Fakamatalaaga 7:20) Ti, liga to huhu a koe: ‘To maeke fefe, mogoia, a tautolu ke o atu ke he Atua ko Iehova?’ Kua tali mai e Tohi Tapu: “Kaeke foki kua hala taha, ha ia tautolu e Lagomatai ki mua he Matua, ko Iesu Keriso ko e tututonu a ia.” (1 Ioane 2:1) Pete ni ko tautolu ko e tau tagata agahala, kua maeke ia tautolu ke o atu ke he Atua mo e ata ke vagahau he puhala atu ia Iesu Keriso, ne mate mo lukutoto ma tautolu. (Mataio 20:28) Ko ia ni e puhala ka o atu a tautolu ke he Atua ko Iehova. (Ioane 14:6) Kua nakai lata a tautolu ke eke fakateaga e uho he poa lukutoto ha Iesu mo e taute pauaki e agahala. (Heperu 10:26) Ka e, kaeke kua taute e tautolu e mena kua maeke a tautolu ki ai ke kalo mai he tau mena kelea ka e hehe ai he falu magaaho, kua maeke ia tautolu ke tokihala mo e ole ke he Atua ma e fakamagaloaga. Kaeke ke o atu a tautolu mo e loto fakatokolalo, to logona e ia a tautolu.—Luka 11:4.
TAU MAGAAHO KE TUTALA KE HE ATUA
10. Ka hoko mai ke he liogi, maeke fefe a tautolu ke fifitaki ki a Iesu, mo e ko e heigoa e falu a magaaho ke liogi tokotaha ai?
10 Kua fakatokoluga e Iesu Keriso e fakafetuiaga hana mo Iehova. Ti ko e mena ia, ne fakatoka e Iesu e magaaho ke tutala ke he Atua he liogi tokotaha. (Mareko 1:35; Luka 22:40-46) Kua lata ia tautolu ke fifitaki ke he fakafifitakiaga ha Iesu mo e ke fakatumau ke liogi ke he Atua. (Roma 12:12) Kua mitaki lahi ke kamata e aho mo e tau kupu liogi, mo e to fano ke mohe, kua lata ia tautolu ke fakaaue ki a Iehova ma e tau gahua he aho. He magahala he aho, kia taute ai mo foliaga ke o atu ke he Atua mo e “nakai noa.” (Efeso 6:18) Kua maeke foki ia tautolu ke liogi fakatekiteki ke he loto, he iloa to logona e Iehova a tautolu. Ko e tutala tokotaha ke he Atua ka lagomatai a tautolu ke fakamao ha tautolu a fakafetuiaga mo ia, mo e liogi ki a Iehova ke he tau aho takitaha ka lagomatai a tautolu ke fakatata fakalahi atu ki a ia.
11. (a) Ko e ha kua lata ai e tau magafaoa ke liogi auloa? (e) Ko e heigoa e kakano ka pehe a koe “Amene” ka oti e liogi?
11 Kua fanogonogo foki a Iehova ke he tau liogi ne kua foaki ma e tau matakau he tau tagata. (1 Tau Patuiki 8:22-53) Kua maeke ia tautolu ke fakatata atu ke he Atua ko e magafaoa, fakalataha mo e takitakiaga he ulu he faoa he fale. Kua fakamalolo he mena nei e pipiaga fakamagafaoa, mo e eke ai a Iehova mo moli ki a lautolu ne ikiiki he logona e lautolu ha lautolu a tau mamatua ne liogi fakatokolalo ke he Atua. Ka e kua, kaeke ke takitaki he taha tagata e matakau ke he liogi, liga ke he feleveiaaga he Tau Fakamoli a Iehova? Kaeke kua ha ha a tautolu mo e tau tagata fanogonogo, kia lata ia tautolu ke fanogonogo fakaeneene ti ka oti ai e liogi, kua maeke ia tautolu ke talahau mo e loto katoa “Amene,” kua kakano “Kia pihia ni.”—1 Korinito 14:16.
TAU LIOGI NE LOGONA E IEHOVA
12. (a) Ko e ha ne nakai tali ai he Atua e falu liogi? (e) Ko e ha kua nakai lata ia tautolu ke manamanatu ni ke he tau manako fakatagata ka liogi?
12 Liga logona hifo he falu kua nakai tali he Atua e tau liogi ha lautolu pete ni he liogi a lautolu ki a ia he puhala atu ia Keriso. Ka e, kua pehe e aposetolo ko Ioane: “Kaeke ke ole atu ai e tautolu ha mena ke lata mo e hana [Atua] finagalo, ti fanogonogo mai ai a ia kia tautolu.” (1 Ioane 5:14) Ti, kua lata mogoia a tautolu ke ole hagaao ke he finagalo he Atua. Ha kua fiafia mai a ia ke he ha tautolu a levekiaga fakaagaga, ko e ha mena ke lauia ai ha tautolu a fahi fakaagaga ko e mena kua lata a ia ma e liogi. Kua lata ia tautolu ke totoko atu ke he kamatamata ke manamanatu katoa ke he tau manako fakatino. Ke tuga anei, kua tonu ai ke liogi ma e iloilo mo e malolo ke fehagai mo e tau gagao, ka e nakai lata e tau fakatupetupeaga ke he malolo tino ke poka ki tua e fiafia fakaagaga. (Salamo 41:1-3) Ha kua mataala ke he to lahi e manamanatu ke he hana a malolo tino, taha e fifine Kerisiano ne ole ki a Iehova ma e lagomatai ke moua e onoonoaga tonu ke he hana a gagao. Ko e fua, ko e tau lekua hana ke he malolo tino kua eke ai mo mena tote, mo e logona hifo e ia kua foaki age ki a ia ‘e malolo lahi ue atu.’ (2 Korinito 4:7) Ko e hana a manako ke lagomatai fakaagaga falu kua tupu ki mua, ati eke ai a ia mo tagata fakapuloa mau he Kautu.
13. Tuga kua fakakite mai ia Mataio 6:9-13, ko e heigoa e falu mena kua lata ke lafi ke he ha tautolu a tau liogi?
13 Ko e heigoa kua lata ia tautolu ke lafi ke he ha tautolu a tau liogi ke fiafia ai a Iehova ka fakanogonogo ki ai? Ne fakaako e Iesu Keriso e tau tutaki hana ke liogi. I loto he liogi fakatai ne fakamau ia Mataio 6:9-13, ne fakatoka e ia e puhala he tau mena kua lata ia tautolu ke liogi ki ai. Ko e heigoa e mena kua mua ke he ha tautolu a tau liogi? Ko e higoa he Atua ko Iehova mo e Kautu kua lata ke tuku fakamua. Ole atu ke he tau koloa ke lata ki ai ko e mena mitaki. Kua aoga foki ke ole ma e fakamagaloaga he ha tautolu a tau hala mo e ke laveaki mai he tau kamatamata mo e mo ia ne mahani kelea, ko Satani ko e Tiapolo. Nakai manako a Iesu ke lologo e tautolu e liogi nei po ke ke liu mo e liu foki ke talahau, mo e nakai manamanatu ke he hana a kakano. (Mataio 6:7) Ko e fakafetuiaga ha ia kaeke ke fakaaoga he tama e tau kupu agaia he tau magaaho oti ka vagahau a ia ke he hana matua tane?
14. Kehe mai he tau ole, ko e heigoa e tau liogi kua lata ia tautolu ke foaki?
14 Kehe mai he tau ole mo e tau fakamakamaka, kua lata ia tautolu ke foaki e tau liogi fakaheke mo e fakaaueaga. (Salamo 34:1; 92:1; 1 Tesalonia 5:18) Kua lata foki ia tautolu ke liogi ma e falu. Ko e tau liogi hagaao ke he ha tautolu a tau matakainaga tane mo e fifine ne matematekelea po ke favale ki ai kua fakakite e fiafia ha tautolu ki a lautolu, mo e kua fiafia a Iehova ke logona ha tautolu a talahauaga ke he tau mena pihia. (Luka 22:32; Ioane 17:20; 1 Tesalonia 5:25) Kua moli, ne tohi mai he aposetolo ko Paulo: “Aua neke fakaatukehe a mutolu ke he taha mena taha; ka kia fakailoa atu ke he Atua e tau manako ha mutolu ke he tau mena oti kana ke he liogi, mo e ole, katoa mo e fakaaue. Ko e monuina foki mai he Atua kua mua ue atu ke he tau mena oti kua manamanatu ki ai, to leveki ai e tau loto ha mutolu, katoa mo e tau manatu ha mutolu kia Keriso Iesu.”—Filipi 4:6, 7.
FAKAUKA KE HE LIOGI
15. Ko e heigoa kua lata ia tautolu ke manatu kaeke kua tuga e nakai tali ha tautolu a tau liogi?
15 Pete he moua e koe e iloilo hagaao ke he Atua, liga to logona hifo e koe he falu a magaaho kua nakai fai tali e liogi hau. Liga ko e pihia e mena nei ha kua liga nakai la hoko e magaaho he Atua ke tali e liogi ole pauaki. (Fakamatalaaga 3:1-9) Liga kua fakaata e Iehova e tuaga ke fakaholo atu ki mua ke he vaha ku, ka e to tali moli e ia e tau liogi mo e iloa e magaaho kua lata ke taute ai.—2 Korinito 12:7-9.
16. Ko e ha kua lata ia tautolu ke fakamakamaka ke he liogi, mo e maeke fefe he mena nei ke lauia ha tautolu a fakafetuiaga mo e Atua?
16 Ko e ha tautolu a fakamakamaka ke he liogi kua fakakite mai ha tautolu a hokulo he fiafia he loto ke he mena ne talahau e tautolu ke he Atua. (Luka 18:1-8) Ke fakatai ki ai, liga to ole a tautolu ki a Iehova ke lagomatai a tautolu ke kautu mai he taha mahani fakalolelole. He fakauka ke he liogi mo e gahua ke fakalagotatai atu ke he ha tautolu a tau ole, kua fakakite e tautolu ha tautolu a fakamoliaga. Kua lata ia tautolu ke talahau fakatonu mo e fakamoli ke he ha tautolu a tau ole. Kua mua atu e aoga ke liogi fakamakamaka he magaaho ka ha ha a tautolu ke he kamatamata. (Mataio 6:13) He fakatumau a tautolu ke liogi mo e hane fa e lali ke taofi hifo ha tautolu a tau manako agahala, to kitia e tautolu e puhala ne lagomatai e Iehova a tautolu. To ati hake he mena nei ha tautolu a tua mo e fakamalolo ha tautolu a fakafetuiaga mo ia.—1 Korinito 10:13; Filipi 4:13.
17. To moua fefe e tautolu e aoga ha ko e aga liogi he fekafekau ke he Atua?
17 He feaki hake e aga liogi he foaki e fekafekauaga tapu ke he Atua ko Iehova, to hoko mai a tautolu ke mailoga kua nakai fekafekau a tautolu ki a ia ha ko e ha tautolu ni a malolo. Ko Iehova ni ne fakakautu e tau mena. (1 Korinito 4:7) He fakailoa e mena nei ka lagomatai aki a tautolu ke loto fakatokolalo mo e ke monuina ai ha tautolu a fakafetuiaga mo ia. (1 Peteru 5:5, 6) E, kua ha ha ia tautolu e tau kakano mao ke fakauka ke he liogi. Ko e ha tautolu a tau liogi fakamoli mo e iloilo uho ke he puhala ke fakatata atu ke he ha tautolu a Matua fakaalofa he lagi ka taute ha tautolu a moui ke fiafia moli.
MATUTAKIAGA MO IEHOVA NAKAI FAHI-TAHA
18. Maeke fefe a tautolu ke fanogonogo ke he Atua?
18 Kaeke ke manako a tautolu ke logona he Atua ha tautolu a tau liogi, kua lata ia tautolu ke fanogonogo ke he tau mena ne talahau e ia. (Sakaria 7:13) Kua nakai liu a ia ke fakafano e tau fekau mai he tau perofeta ne omoi he agaga faka-Atua mo e nakai fakaaoga foki e tau puhala fakataulatua. (Teutaronome 18:10-12) Ka e kua maeke ia tautolu ke fanogonogo ke he Atua he fakaako e Kupu hana, ko e Tohi Tapu. (Roma 15:4; 2 Timoteo 3:16, 17) Tuga ni kua liga lata ia tautolu ke fakamahani ke he tau mena kai ne mitaki ma tautolu, kua fakamakamaka mai ki a tautolu ke “manako lahi a mutolu . . . ke he puke huhu he kupu nakai fakavai.” Kia feaki hake e manako ma e mena kai fakaagaga he totou e Kupu he Atua ke he tau aho takitaha.—1 Peteru 2:2, 3; Gahua 17:11.
19. Ko e heigoa e aoga ke hokulo e manamanatuaga ke he mena ne totou e koe i loto he Tohi Tapu?
19 Kia hokulo e manamanatuaga ke he mena ne totou e koe i loto he Tohi Tapu. (Salamo 1:1-3; 77:11, 12) Ko e pehe a ia ke manamanatu atu ke he kakano i ai. Liga to fakatatai e koe e mena nei ke he taviliaga he mena kai. Maeke ia koe ke tavili e mena kai fakaagaga he fakamatutaki atu e tau mena ne totou a koe ki ai mo e tau mena ne fita he iloa e koe. Manamanatu atu ko e lauia fefe e tala ke he moui hau, po ke manamanatu ke he mena ne fakakite hagaao ke he tau fua mo e tau fehagaiaga ha Iehova. Ti mai he puhala he fakaako fakatagata, kua maeke ia koe ke kai e mena kai fakaagaga ne foaki e Ie-hova. To fakatata atu he mena nei a koe ke he Atua mo e to lagomatai a koe ke fehagai mo e tau lekua ke he tau aho oti.
20. Maeke fefe he o atu ke he tau feleveiaaga Kerisiano ke lagomatai a tautolu ke fakatata atu ke he Atua?
20 Maeke foki ia koe ke fakatata atu ke he Atua he fanogonogo ke he hana a Kupu ne fakatutala ki ai he tau feleveiaaga Kerisiano, ke tuga e tau Isaraela ne fanogonogo fakamitaki he magaaho ne fakapotopoto a lautolu ke logona e totouaga he Fakatufono he Atua ke he tau tagata. Ne lafi he tau tagata fakatonutonu he vaha ia e kakano ke he ha lautolu a totouaga ke he Fakatufono, ti kua lagomatai ai ha lautolu a tau tagata fanogonogo ke maama mo e omoomoi ai ke fakagahuahua e mena ne logona e lautolu. Ne takitaki e mena nei ke he iloilo lahi. (Nehemia 8:8, 12) Ti kia eke ai mo mahani hau ke fina atu ke he tau feleveiaaga he Tau Fakamoli a Iehova. (Heperu 10:24, 25) To lagomatai he mena nei a koe ke maama mo e ti fakagahuahua e iloilo ke he Atua ke he hau a moui mo e to tamai ki a koe e fiafia. Ha ko e taha vala he fakamatakainaga Kerisiano he lalolagi katoa to lagomatai ai a koe ke fakapiki atu ki a Iehova. Mo e to kitia e tautolu, ko e maeke ia koe ke moua e puipuiaga moli he vahaloto he tau tagata he Atua.
KAMATAMATA HAU A ILOILO
Ko e ha kua lata ai ia koe ke fakatata atu ki a Iehova?
Ko e heigoa e falu poakiaga ke fakatata atu ke he Atua?
Ko e heigoa ka lafi e koe ke he hau a tau liogi?
Ko e ha kua lata ia koe ke fakauka ke he liogi?
Maeke fefe ia koe ke fanogonogo ki a Iehova he vaha nei?
[Lau Katoa he Fakatino he lau 157]